Say Sankabalgan a Toon Nambilay ed Kapiganman

Kapitulo 69

Say Singbatan ed Inkaama

Kaleganan na piesta, lalon pinmetang so pisisingbatan nen Jesus ed saray Judion pangulo. “Amtak ya poli kayo nen Abraham,” binidbir nen Jesus, “angan ontan ya seseetan yo ak a pateyen, nisengeg ed saray salitak ag onopot ed sikayo. Salitaen ko so saray bengatla ya anengneng ko ed Amak: et sikayo met gawaen yo so saray bengatla a nadngel yo ed ama yo.”

Anggaman agbibitlaen no siopa so ama ra, impalinew nen Jesus a say ama ra so duma ed ama to. Lapud agda kabat no siopa so walad kanonotan nen Jesus, saray Judion pangulo so inmebat: “Say ama mi si Abraham.” Liknaen dan sikara so walaan na parehon pananisia a singa si Abraham, a kaaro na Dios.

Anggaman ontan, binigla ira nen Jesus diad ebat a: “No ana’ kayo nen Abraham, gawaen yo komon so saray gawa nen Abraham.” On, say peteg ya anak so mangaalig ed ama to. “Balet natan seseetan yo ak a pateyen,” inkuan nen Jesus, “anta sakey ak a too ya angibaga ed sikayo na katuaan, ya nadngel ko ed Dios: saya ag ginawa nen Abraham.” Kanian inkuan lamet nen Jesus: “Sikayo gawaen yo so saray gawaen na ama yo.”

Siansia nin agda natebek no siopa so tutukoyen nen Jesus. Mamantinien dan sikara so lehitimon anak nen Abraham, ya ibabaga: “Sikami ag kami nianak ed inpilawan.” Sirin, ibabagan sikara so tuan managdayew a singa si Abraham, insangsang da: “Wala so sakey ya Ama mi, salanti Dios.”

Balet kasin say Dios so Ama ra? “No [say] Dios so ama yo,” inyebat nen Jesus, “aroen yo ak komon: lapu ed pinmaway ak tan nanlapu ak ed Dios; ta agak nanlapu ed inkasiak, noag say inbaki to ak. Akin et ag yo natalosan so salitak?”

Sinali nen Jesus ya ipanengneng ed sarayan relihyoson pangulo iray pansumpalan na panangipulisay da ed sikato. Balet natan et diritsaan ya inkuan nen Jesus: “Sikayo kien kayo na ama yo ya diablo, et saray kalikaliktan nen ama yo sikato so labay yo a gawaen.” Anton klase na ama so Diablo? Sikatoy impakabat nen Jesus bilang manamatey na too tan inkuan met: “Sikato [so] matila, tan ama na tila.” Kanian sinampotan nen Jesus: “Say kayarian na Dios dengelen to so saray salita na Dios: lapu ed saya ag yo ra dengelen, nisengeg ed ag kayo kayarian na Dios.”

Asanokan ed panangondena nen Jesus, inyebat na saray Judio: “Ag kasi maong so pankuan mi ya sakey ka a Samaritano, tan walaan ka na demonio?” Say terminon “Samaritano” so uusaren bilang balikas na panamosol tan panamabaing, a saray Samaritano so totoon kagula na saray Judio.

Diad pangibabaliwala ed makapaingongot a balikas nipaakar ed pagmamaliw a sakey a Samaritano, inyebat nen Jesus: “Angapo so demonio ed siak; ingen pagalangan ko so Amak, et sikayo ibabaing yo ak.” Diad pantutultuloy, si Jesus so nanggawa na makapakelaw a sipan: “No say sakey a too onoren to so salitak, sikato ag to nanengneng so ipapatey angan kapigan.” Siempre, aglabay ya ibaga nen Jesus ya amin iramay ontumbok ed sikato so literal ya agbalot makasagmak na ipapatey. Imbes, labay ton ibaga a sikaray agbalot makanengneng na andi-anggaan a kadederal, odino “komadua ya ipapatey,” a manlapud saya et anggapoy kikioli.

Anggaman ontan, liliteralen na saray Judio iray salita nen Jesus. Kanian, inkuanda: “Natan amta mi ya walaan ka na demonio. Si Abraham inatey, tan saray profetas; et kuan mo, No sakey a too onoren to so salitak, ag to natawayan so ipapatey angan kapigan. Babaleg ka ta nen si ama mi’n Abraham, a sikato inatey tan saray propetas inaatey ira; siopa so pangipasenan mo na inkasika?”

Diad sayan interon singbatan, mapatnag ya idadanet nen Jesus ed sarayan lalaki so katuaan a sikato imay insipan a Mesias. Balet imbes a direktan ebatan so tepet da nipaakar ed pakabidbiran to, inkuan nen Jesus: “No dayewen ko so inkasiak, say dayew ko andikakanaan; say Amak so mangidayew ed siak: saman so kuan yo a sikato so Dios yo; Et sikato so ag yo akabatan; ingen sikato so kabat ko; et no kuan ko, Sikato so ag ko kabat, mipadparaak komon ed sikayo, a matitila.”

Diad pantutultuloy, tinukoy lamet nen Jesus si matoor ya Abraham, ya ibabaga: “Si ama yo’n Abraham nangayaga’n akanengneng ed agew ko; et anengneng to, tan nanliket.” On, tekep na mata na pananisia, si Abraham so ninmengneng ed arapen diad isasabi na insipan a Mesias. Diad agpanisia, inyebat na saray Judio: “Sika angapo ni limanplon taon mo, et anengneng mo si Abraham?”

“Tua, tua, kuan ko ed sikayo,” ebat nen Jesus, “nen ag ni nianak si Abraham, wala ak la.” Siempre, si Jesus so manutukoy ed sakbay na atooan a kiwawala to bilang makapanyarin espiritun persona ed tawen.

Lapud inkasanokan da ed pangibabaga nen Jesus a sikatoy niwala la sakbay nen Abraham, saray Judio so anukdok na bato pian itupak ed sikato. Balet sikato so inmamot tan pinmaway ed templo ya ag-asakitan. Juan 8:37-59; Apocalipsis 3:14; 21:8.

▪ Panon ya impanengneng nen Jesus a sikato tan saray sumusumpa to so walaan na nandumaan ya ama?

▪ Anto so kabaliksan na panatawag na saray Judio ed si Jesus a Samaritano?

▪ Diad anton pantalos ed labay ya ibaga nen Jesus a saray patumbok to so agbalot makanengneng na ipapatey?