Say Sankabalgan a Toon Nambilay ed Kapiganman

Kapitulo 68

Nagkalalo nin Panagbangat Diad Komapiton Agew

Say sampot ya agew na Piesta na saray Tabernakulo, say komapiton agew, so agni asumpal. Si Jesus so manbabangat ed kabiangan na templo a tatawagen na “panangisimpenan na kayamanan.” Saya so mapatnag a walad pasen a tatawagen a say Korte na saray Bibii a no iner a walaray kaban a pangipepelagan na totoo na saray kontribusyon da.

Kada labi kaleganan na piesta, wala so nikadkaduman silew ed sayan pasen na templo. Apatiran ankakabaleg a kandelero so impasen dia, a kada sakey so walaan na apatiran ankakabaleg a palanggana a napno na larak. Say liwawa manlapud sarayan lampara, a mamopool na larak manlapud 16 a palanggana, so mabiskeg lan tuloy pian silewan so kaliber-liber anggad arawin distansya no labi. Say imbaga natan nen Jesus so mangipanonot ed saray dumerengel to ed sayan silew. “Siak so silew na mundo,” inyabawag nen Jesus. “Say ontombok ed siak agmanakar ed kabilungtan, balet wala ed sikato so silew na bilay.”

Saray Pariseo so sinmumpa: “Sika tasian mo so inkasika; say tasim aliwa’n tua.”

Bilang ebat inkuan nen Jesus: “Angan tasian ko so inkasiak, say tasik sikato’y tua; ta amtak no iner so nanlapuan ko, ono iner so laen ko; balet sikayo ag yo amta no iner so panlapuan ko, ono iner so laen ko.” Inyarum to: “Siak tasian ko so inkasiak, tan say Ama ya angibaki dia ed siak tasian to ak.”

“Iner so kawalaan na Amam?” labay ya amtaen na saray Pariseo.

“Sikayo ag yo ak kabat angan si Amak,” inyebat nen Jesus. “No akabatan yo ak, akabatan yo met komon si Amak.” Anggaman siansia nin labay na saray Pariseo ya erelen si Jesus, anggapoy siopaman ya aniwit ed sikato.

“Siak so ontaynan,” (NW) inkuan lamet nen Jesus. “Diman ed laen ko ag yo nayarian so onla.”

Lapud saya et saray Judio so ginmapon manumameng: “Pateyen to kasi so laman to, ta kuan to, No ined so laen ko, ag yo nayarian so onla?”

“Sikayo nanlapu kayo ed [leksab],” kuan nen Jesus. “Siak nanlapu ak ed tagey: taga dia kayo ed saya’n mundo; siak agak taga dia ed saya’n mundo.” Insan inyarum to: “No ag yo sisiaen a siak (Cristo,) ompatey kayo ed saray kasalanan yo.”

Siempre, si Jesus so manutukoy ed sakbay na atooan a kiwawala to tan say pagmamaliw ton say insipan a Mesias, odino Kristo. Anggaman ontan, anggapoy duaruwan intepet da tekep na baleg a sanok: “Siopa ka ta?”

Diad arap na panangipulisay da, inyebat nen Jesus: “Akin a siak ni so mitotongtong ed sikayo?” (NW) Ingen intuloy ya inkuan nen Jesus: “Say angibaki dia ed siak sikato so tua; et saray bengatla’n nadngel ko a nanlapu ed sikato, saraya so salitaen ko ed mundo.” Intuloy nen Jesus: “Sano ipaalage’yo la so Anak na too, saman la nakabatan yo a siak iman, tan angapo so gawaen ko ed inkasiak, noag onong na inbangat na Ama ed siak, salitaen ko so saraya’n bengatla. Et say angibaki dia ed siak wala ed siak; agto ak pinaulian a manbokbokor; ta gawaen ko lawas so saray bengatla a makapaliket ed sikato.”

Sanen inkuan nen Jesus irayan bengatla, dakel so anisia ed sikato. Diad saraya et inkuanto: “No mansiansia kayo ed salitak, sirin petepeteg a sikayo so babangatan ko; Et nakabatan yo so katuaan, et say katuaan sikayo so gawaen to a bolos.”

“Sikami poli kami nen Abraham,” inkuan na saray sumusumpa to, “tan ag kami inpaaripen a balot ed siopaman a too: panon so pangibagam, nagawa kayo a bolos?”

Anggaman mabetbet a nisilong iray Judio ed sankailin panagdomina, sikara so agmamibidbir ed siopaman a managlames bilang katawan. Agda labay so patawag ya ariripen. Balet indanet nen Jesus a diad katuaan et sikaray ariripen. Diad anton paraan? “Tua, tua kuan ko ed sikayo,” inkuan nen Jesus, “balang sakey a mangawa na kasalanan sikato so aripen na kasalanan.”

Say agda pangaawat ed inkaaripen da ed kasalanan so angipasen ed saray Judio ed mapeligron kipapasen. “Say aripen ag manayam ed abung lawas,” impaliwawa nen Jesus. “Say anak manayam lawas.” Lapud say sakey ya aripen et anggapoy kanepegan ton mantawir, sikato so nayarin walad kapeligroay pamatakyas ed anggan anton oras. Mogmon say anak a laki odino inampon ed abung so mansiansia “lawas” salanti, legan a sikatoy manbibilay.

“Kanian no say Anak gawaen to kayo’n bolos,” intuloy nen Jesus, “sikayo so peteg ya bolos naani.” Kanian, say katuaan a mangibulos ed totoo et say katuaan nipaakar ed Anak, si Jesu-Kristo. Dia lambengat ed panamegley na bagat na ayadyarin atooan a bilay to a say siopaman so nibulos manlapud makapatey a kasalanan. Juan 8:12-36.

▪ Iner so nanbangatan nen Jesus ed komapiton agew? Anto so nagagawa diman diad labi, tan panon a saya so mitukoyan ed bangat nen Jesus?

▪ Anto so inkuan nen Jesus nipaakar ed nanlapuan to, tan anto so iparungtal na saya nipaakar ed pakabidbiran to?

▪ Diad anton paraan a saray Judio so ariripen, balet anton katuaan so mangibulos ed sikara?