Say Sankabalgan a Toon Nambilay ed Kapiganman

Kapitulo 67

Sikara so Sinmaew a Mangerel ed Sikato

Legan a say Piesta na saray Tabernakulo so mantutultuloy ni, saray relihyoson pangulo so angibaki na saray opisyal na pulisya pian erelen si Jesus. Agto sinali so inmamot. Imbes, si Jesus so nansiansian mapublikon nanbangat, a kuanto: “Wala ni daiset ya panaon a piayam ko ed sikayo, insan onla ak ed saman so angibaki dia ed siak. Sikayo anapen yoak naani, et ag yoak naalmo: tan no iner so kawalaan ko, ag yo nayarian a laen.”

Ag-iya atalosan na saray Judio, tan kanian sikaray nantetepetan ed sinansakey: “Iner kasi laen to nian too ya ag tayo naani naalmo? Onla kasi naani ed nibuyakan dia ed saray Griegos tan [ibangat] to so saray Griegos? Anto so saya’n salita ya inkuan to, Anapen yoak naani, et ag yoak naalmo: tan no iner so kawalaan ko, ag yo nayarian a laen?” Siempre, si Jesus so manutukoy nipaakar ed manasingger ya ipapatey tan kioli tod bilay ed tawen, a diman et agmakatumbok iray kabusol to.

Asabi so komapito tan sampot ya agew na piesta. Kada kabuasan na piesta, sakey a saserdote so mangikakalboy danum, ya inala to manlapu ed Tangke na Siloam, diad ontan et satan so onagos anggad leksab na altar. Maseguron diad pangipanonot ed totoo na sayan inagew-agew a seremonya, inkelyaw nen Jesus: “No napgaan so siopaman a too, ondago ed siak, tan oninum.”

Diad katuaan, tutukoyen dia nen Jesus so nipaakar ed saray engranden pansumpalan sano say masanton espiritu so ikalbo. Diad tinmumbok a taon, sayan panangikalbo na masanton espiritu so nagawa ed Pentecostes. Diman, onagos so mabilay a danum sano onggapon manlingkor iray 120 babangatan ed totoo. Balet anggad natan, anggapo so espiritu diad pantalos ya anggapo ed saray babangatan nen Kristo so nilanaan na masanton espiritu tan tinawag ed mangatatawen a bilay.

Diad inkiwas ed bangat nen Jesus, arum so ginmapon mangibabaga: “Saya sikato a tua so profeta,” mapatnag a manutukoy ed propetan babaleg nen si Moises ya insipan ya onsabi. Arum so mangibabaga: “Saya sikato si Cristo.” Balet improtesta na arum: “Anto, manlapu ed Galilea so Cristo? Ag ta inkuan na sulat, a say Cristo manlapu ed poli nen David, tan manlapu ed Bethlehem, say aldea a kawalaan nen David nensaman?”

Kanian linmesa so inka-apag-apag ed limog na karaklan. Kaliktan na arum a naerel si Jesus, balet anggapo so anggan sakey a maningkat ed sikato. Sanen saray opisyal na pulisya so pinmawil ya agkaiba si Jesus, intepet na saray manunan saserdote tan Pariseo: “Akin et ag yo inawit?”

“Angapo ni too a nansalita na onia,” inyebat na saray opisyal.

Asanokan a tuloy, saray relihyoson pangulo so angusar na panamalaw, lingon panamalsa, tan panagtami. Mamabalaw ya inkuanda: “Pati sikayo met so nibalang? Anisia ta so siopaman ed saray manouley, ono ed saray Fariseos? Balet saraya a katooan ya agda amta so gangan naayew ira.”

Diad saya, si Nicodemo, sakey a Pariseo tan manuley na saray Judio (salanti, sakey a membro na Sanhedrin), so nanpakpel a mansalita ed biang nen Jesus. Nayarin nanonotan yo ni a duara tan kapalduan taon ed asasakbay, si Nicodemo so linma ed si Jesus diad labi tan angibalikas na pananisia ed sikato. Inkuan nen Nicodemo natan: “Say gangan tayo okomen to ta so sakey a too, ya agni dengelen ya unona so inkasikato tan amtaen no anto so gagawaen to?”

Saray Pariseo so nagkalalon asanokan a say sakey ed sikara so mangiyaagel ed si Jesus. “Sika met taga Galilea ka?” sisasalangsang ya inkuanda. “Osisaen mo, et nanengneng mo ya angapo so profeta ya onletaw ed Galilea.”

Anggaman say Kasulatan so agdirektan mangibabaga a walay propetan manlapud Galilea, saratan so manutukoy ed Kristo bilang manlalapu ditan, ya ibabagan “baleg a liwawa” so nanengneng ed sayan rehyon. Niyarum ni, si Jesus so niyanak ed Bethlehem, tan sikato so kailalakan nen David. Bangta saray Pariseo so nayarin makaamta ed saya, sikara so maseguron responsabli ed pangikakayat na lingon opinyon a wala ed saray totoo nipaakar ed si Jesus. Juan 7:32-52; Isaias 9:1, 2; Mateo 4:13-17.

▪ Anto so nagagawa kada kabuasan na Piesta, tan panon a nayarin si Jesus so mangipapaarap na imano ed saya?

▪ Akin a sinmaew iray opisyal a mangerel ed si Jesus, tan panon a kinmiwas iray relihyoson pangulo?

▪ Siopa si Nicodemo, anto so awawey to ed si Jesus, tan panon so impangipasen na kakaiba ton Pariseos ed sikato?

▪ Anton paneknek so wala a say Kristo so manlapud Galilea?