Say Sankabalgan a Toon Nambilay ed Kapiganman

Kapitulo 66

Diad Piesta na Saray Tabernakulo

Si Jesus so nagmaliw a bantog legan na samay ngalngalin taloran taon nanlapulad bautismo to. Nilibo-libon totoo so akanengneng ed saray milagro to, tan saray report nipaakar ed aktibidades to so nikayat ed interon bansa. Natan, legan a mantitipon so totoo parad Piesta na saray Tabernakulo ed Jerusalem, sikato so inanap da diman. “Ined so kawalaan to?” labay dan amtaen.

Si Jesus so nagmaliw a tema na sangsangan. “Sikato so maong a too,” inkuan na arum. “Andi ingen ibalang to so dakel a katooan,” insangsang na arum. Dakel so onia iran klase na esaesan legan na unaan iran agew na Piesta. Ingen anggapo so anggan sakey a walaay pakpel a mapublikon mansalita ed biang nen Jesus. Saya so lapud tatakotan na totoo so pakabalaw manlapud saray Judion pangulo.

Sanen say piesta so apaldua la, sinmabi si Jesus. Sikato so tinmatdang ed templo, a no iner a saray totoo so nikelawan ed makapakelaw ya abilidad ton manbangat. Lapud agbalot nanaral si Jesus ed eskuelaan na saray rabbi, saray Judio so mankelaw: “Panon so pikakabat na saya’n too ed saray letra, bangta ag nanaral a balot?”

“Say bangat ko ag ko kien,” paliwawa nen Jesus, “balet kien na angibaki ed siak. No siopaman a too manlinawa a gawaen to so linawa to, nakabatan to so bangat ko, no nanlapu kasi ed Dios, ono mansalita ak kasi na manlapu ed inkasiak.” Saray bangat nen Jesus so mitukoyan a tuloy ed ganggan na Dios. Kanian, nepeg a mabitar a sikatoy manaanap na kiglorian na Dios, aliwan diad sikaton dili. “Ag ta [inter] nen Moises ed sikayo so gangan?” intepet nen Jesus. Diad paraan na panamaat, inkuanto: “Angapo ni ed sikayo so mangoonor na gangan.”

“Akin a seetan yo ak a pateyen?” insublay ya intepet nen Jesus.

Saray totoo ed karaklan, anganko ta saray bisita ed piesta, so agmakaamta ed saratan a sagpot. Agda naisip a walay siopaman a malabay a mamatey ed ontan a makapakelaw a managbangat. Kanian sisiaen dan walay problema ed si Jesus a mismo a manisip na ontan. “Sika walaan ka’y sakey a demonio,” inkuanda. “Siopa ta’y maneseet a mamatey ed sika?”

Kaliktan na saray Judion pangulo a napapatey si Jesus, anggaman saya so agnamomoria na karaklan. Sanen pinaabig nen Jesus so sakey a too ed agew na Sabaton a sakey tan kapalduay taon ed asasakbay, sinali na saray pangulo a sikatoy pateyen. Kanian si Jesus natan so angiwalwal ed agda inkamakatunongan diad impantepet: “No say sakey a too awaten to so pangalsim ed agew na sabaton, pian agnasumlang so gangan nen Moises; kaingongot yo ak, lapu ed pinaabig ko a sigpot [so] sakey a too ed agew na sabaton? Ag kayo mangokom unong ed kanengnengan, ingen mangokom kayo ed matonong a panangokom.”

Saray manaayam ed Jerusalem, a makaamta ed kipapasen, so angikuan natan: “Aliwa ta’n saya so seseetan da’n pateyen? Et nia, sikato so mansasalita a [maparungtal], et angapo so kuan da ed sikato. Ompan saray makauley peteg ya amta ra a saya sikato si Cristo?” Sarayan manaayam ed Jerusalem so angipaliwawa no akin a sikara so agmanisian si Jesus et Kristo: “Manwarin ontan amta tayo yan too no [iner] so lapuan to: balet sano onsabi so Cristo, angapo so makaamta no [iner] so lapuan to.”

Inyebat nen Jesus: “Sikayo nanpadpara a kabat yoak, tan amta yo so lapuan ko; et agak nanlapu’d inkasiak, ingen say angibakidia ed siak sikato so tua, a sikato so ag yo kabat. Sikato so kabat ko; lapu’d nanlapu ak ed sikato, tan inbaki to ak.” Diad saya et sinali ran sikatoy singkaten, anganko ta pian sikatoy ipapangaw odino sikatoy ipapatey. Ingen ag-ira ontalona lapud agni panaon na ipapatey nen Jesus.

Siansia ni, dakel so anisia ed si Jesus, a nepeg labat a gawaen da. Agayla, sikatoy akaakar ed tapew na danum, amakalma ed dagem, amareen ed mabagyon dayat, mamilagron amakan ed nilibo diad panamegley na pigaran tinapay tan sira, amaabig na mansasakit, amaakar ed lupoy, angilukas na saray mata na bulag, amaabig ed akating, tan amaoli ni ingen. Kanian intepet da: “Sano say Cristo onsabi, mangawa kasi naani dakdakel a tanda nen saratan a ginawa na saya’n too?”

Sanen arengel na saray Pariseo ya imemeremere na karaklan irayan bengatla, sikara tan saray manunan saserdote so angibaki na saray opisyal pian erelen si Jesus. Juan 7:11-32.

▪ Kapigan sinmabi si Jesus ed piesta, tan antora so ibabaga na totoo nipaakar ed sikato?

▪ Akin a nibaga na arum a si Jesus so walaan na demonyo?

▪ Walaan na anton panmoria ed si Jesus iray ombaley?

▪ Akin a dakel so anisia ed si Jesus?