Say Sankabalgan a Toon Nambilay ed Kapiganman

Kapitulo 65

Maamot a Baroy a Paarap ed Jerusalem

Saman so loglog na 32 K.P., tan asingger lay Piesta na saray Tabernakulo. Inyapasakey nen Jesus so aktibidad to a manuna ed Galilea nanlapulad Paskua na 31 K.P., sanen sinali na saray Judion sikatoy pateyen. Maseguro, nanlapulad saman et onla lambengat si Jesus ed Jerusalem pian atendian so taloran tinaon a piesta na saray Judio.

Saray agagi nen Jesus natan so amaseseg ed sikato: “Tainan ka dia, tan onla ka ed Judea.” Say Jerusalem so manunan syudad na Judea tan say relihyoson sentro na interon bansa. Inkatunongan na agagi to: “Angapo so too a mangawa na antokaman a maamot, tan sikato lanlamang anapen to so nakabatan a mapatnag.”

Anggaman di Santiago, Simon, tan Judas so agmanisia a say pangulowan ya agi ra, si Jesus, so diad kapetegan et say Mesias, labay dan ipanengneng to iray mamilagron pakayari to ed amin na saramay atipon ed piesta. Anggaman ontan, kabat nen Jesus so kapeligroan. “Say mundo ag to kayo nayari’n gulaen,” inkuanto, “balet sikato gulaen to ak, lapu’d panatasik ed sikato, a saray gawa to sikara so mauges.” Kanian imbaga nen Jesus ed agagi to: “Tatdang kayo ed fiesta: Siak agak ontatdang ed saya’n fiesta.”

Say Piesta na saray Tabernakulo so pitoy-agew a selebrasyon. Diad koma walon agew et satan so sasampotan na masanton aktibidades. Say piesta so mananda ed kasampotan na agrikultural a taon tan panaon na baleg a liket tan pisasalamat. Pigaran agew kayari intaynan na agagi nen Jesus pian onatendi a kaibay manunan ulop na saray managbaroy, sikato tan saray babangatan to so linman maamot, ya oniiwas ed pakanengneng na karaklan. Inala ra so rota a dinmalan ed Samaria, imbes ed maslak a dadalanan na totoo ya asingger ed Ilog Jordan.

Lapud nakaukolan nen Jesus tan saray ib-iba to so panpundoan ed sakey a Samaritanon purok, sikatoy angipauna na saray mensahero pian mangiparaan. Anggaman ontan, saray totoo so agmalabay a manggawa na antokaman parad si Jesus kayari impakaamta ra a sikatoy paarap ed Jerusalem. Sisasanok, intepet di Santiago tan Juan: “Katawan, labay mo ya kerewen mi ya onepas so apuy manlapu ed tawen, pian upoten tora?” Binaat nen Jesus ira ed impangisuheri na ontan a bengatla, tan intuloy da so nambaroy a paarap ed sananey a purok.

Kaleganan a sikara so manaakar ed dalan, sakey ya eskriba so angikuan ed si Jesus: “Managbangat, ontombokak ed sika angan [iner] so laen mo.”

“Saray kuyangen wala’y balaong da, tan saray manok ed tawen walaan ira’y obong,” inyebat nen Jesus, “balet say Anak na too angapo’y pangisaralan to na olo to.” Impaliwawa nen Jesus a say eskriba so makaeksperiensia na irap no sikato so magmaliw a patumbok To. Tan ompatnag a say eskriba so makinon a tuloy a mangawat na onian klase na kabibilay.

Diad sananey nin too, inkuan nen Jesus: “Tomboken moak.”

“Yaboloy mo ed siak ya onona pian onla ak tan iponponko so amak,” so ebat na too.

“Paulian mo so saray inatey a mangiponpon ed saray inatey da a dili,” inyebat nen Jesus, “balet onlaka tan ipakabat mo so panaria’y Dios.” Mapatnag a say ama na laki so mabilay ni, ta no andi, maseguron sayan ilalak to so andi’d dia ya ondedengel ed si Jesus. Mapatnag ya onkekerew so anak a laki na panaon pian alagaren so ipatey na ama to. Sikato so ag-akaparaan a mangipasen ed Panarian na Dios a manuna’d bilay to.

Legan na pantultuloy da ed dalan a paarap ed Jerusalem, sananey nin too so angikuan ed si Jesus: “Tomboken taka, Katawan; ingen yaboloy mo ed siak ya onona ya ompatanir ak ed saray wala ed abung ko.”

Bilang ebat et inkuan nen Jesus: “Angapo so too o sano inyan to so lima to ed araro, et onlingay ed beneg, et makana ed panarian na Dios.” Saraman so magmaliw a babangatan nen Jesus so nepeg a mangiyapasakey ed kamataan da ed serbisyo ed Panarian. No panon a say gulis so maseguron napikewet no say managbaka so ag-onnengneng ed arapan, ontan met ed siopaman ya onlilingaw ed sayan daan a sistema na bengabengatla so maseguron natiror ed dalan a mamaarap ed andi-anggaan a bilay. Juan 7:2-10; Lucas 9:51-62; Mateo 8:19-22.

▪ Siopara so agagi nen Jesus, tan anto so liknaan da nipaakar ed sikato?

▪ Akin a saray Samaritano so agmapangasin tuloy, tan anto so labay nen Santiago tan Juan a gawaen?

▪ Anton taloran tongtongan so niwala ed si Jesus ed dalan, tan panon ya indanet to so pankaukolan parad dilin-panagsakripisyon serbisyo?