Say Sankabalgan a Toon Nambilay ed Kapiganman

Kapitulo 76

Pidudungo ed Sakey a Pariseo

Kayarin inebatan nen Jesus iray kritiko ya anuppiat ed lapuan na pakayari ton manpaabig ed sakey a toon agmakasalita, sakey a Pariseo so angimbita ed sikato ed sakey panangan. Sakbay na pangan da, saray Pariseo so akibiang ed ritual a pananguras na lima ra anggad siko. Saya so gagawaen da sakbay tan kayari na sakey a panangan tan angga ni ingen ed kaplesan. Anggaman say tradisyon so agmanusumlang ed insulat a salita na Dios, satan so onlampas ni ed kakaukolanen na Dios ed pamaakaran na seremonial a kalinisan.

Sanen sinmaew si Jesus a mangunor ed tradisyon, say managparawes ed sikato so asurpresa. Anggaman say inkasurpresa to so ag-insalitan imbalikas, si Jesus so akatebek ed satan tan inkuanto: “Bang sikayo’n Fariseo linisanyo so paway na kopa tan lipong; balet say loob yo napno na panagsamsam tan kaugsan. Sikayo makulangkulang, say nangawa ed paway ag ta sikato so akangawa met ed loob?”

Diad ontan et inwalwal nen Jesus so pansimpisimpitan na saray Pariseo a ritualistikon manguuras na saray lima ra balet ta onsasaew a manguras ed kapusuoan da manlapud inkarelmeng. Insimbawa to: “Ipayabol yo so bengabengatla’n wala ed loob; et nia, nalinisan so amin a bengatla ed sikayo.” Say panangiter da so nepeg a pakiwasen na maaron puso, aliwan sakey a pilalek a pandinayewen so arum diad kunkunwarin inkatunong.

“Abagey kayo la a Fariseos,” intuloy nen Jesus, “ta manbayar kayo na kakaplo na menta tan ruda tan amin a pising, et paliisan yo so kaalasan tan panangaro na Dios: balet saraya so nepeg yo komon a ginawa, ya ag yo pinaolian a ginawa so arum.” Say Ganggan na Dios ed Israel so mankakaukolan na pambayar ed kakaplo, odino mikasamplon parte, ed bunga manlapud saray uma. Say menta tan ruda so melag iran tanaman odino pising ya uusaren ed pantimpla na tagano. Maalwar a babayaran na saray Pariseo so mikasamplo na sarayan agtanton makanan tantanaman, balet sikara so kinondena nen Jesus lapud pangibabaliwala ra na mas importantin kakaukolanen a pangipanengneng na aro, pangagamil na panangasi, tan pagmaliw a masimpit.

Diad tultuloy a pangukondena ed sikara, inkuan nen Jesus: “Abagey kayo la a Fariseos, ta labay yo so saray manona a yurongan dia ed saray sinagoga, tan saray panangibano dia ed saray plaza. Abagey kayo la, ta singa kayo saray lobok ya ag nanengneng, et saray totoo a manakar ed tapew da agda amta!” Say inkarumsis da so agmapatnag. Say relihyon na saray Pariseo so walaan na akinpaway a panengneng balet anggapo so akindalem a kablian to! Satan so base ed pansimpisimpitan.

Diad idedengel ed ontan a panangondena, sakey ya abogado, sakey ed saramay marunong ed Ganggan na Dios, so nanreklamo: “Managbangat, dia ed inpansalitam na saya balawen mo kami met.”

Sarayan onsiano ed Ganggan so pangeebaten met nen Jesus, ya ibabaga: “Abagey kayo met makakabat ed gangan, ta pansakbaten yo so totoo ed saray awit ya ambelat ya awiten, et agyo lanlamang diwiten so saray awit na sakey bengat a tamoro yo! Abagey kayo la, ta ipaalage’yo so saray lobok na saray profetas, et pinatey ira na saray ama yo!”

Saray awit a sinaglawi nen Jesus so insalita iran tradisyon, balet sarayan abogado so agmalabay a manakbat ed anggan melag a regulasyon pian manggawan mainomay parad totoo. Imparungtal nen Jesus ya anggan sikara so inmabuloy ed panamatey na saray propeta, tan impasakbay to: “Say dala na saray amin a profeta, a naibung nanlapu’d inkapalsa’y mundo, naanap ed saya a kapulian; manlapu’d dala nen Abel anga ed dala nen Zacarias, ya inatey ed nanleetan na altar tan santuario: on, kuan ko ed sikayo, nasingil naani ed saya’n kapulian.”

Say mundo na narondon a katooan so ginmapo ed inkiyanak na saray ilalak nen Adan tan Eva; kanian, si Abel so nanbilay diad “inkapalsa’y mundo.” Kasumpal na maruksan impamatey ed kinen Zacarias, sakey a puersa na Sirya so angubkob ed Juda. Balet si Jesus so amasakbay na nagkalalon panagkubkob ed kailalakan to lapud babaleg ya inkarelmeng to. Sayan panagkubkob so nagawa ngalngali 38 a taon ed saginonor, diad 70 K.P.

Diad pangitutuloy na panangondena, inkuan nen Jesus: “Abagey kayo la makakabat ed gangan, ta inekal yo so tombok na kakabatan: agkayo linmoob lanlamang et sinebelan yo so saray onloob komon!” Saray onsiano ed Ganggan so walaan na eebatan pian ipaliwawa so Salita na Dios ed saray totoo, ya iwawalwal so kabaliksan to. Balet saya so sinaewan dan gawaen tan aalaen da ni ingen manlapud totoo so pankanawnawan makatalos.

Saray Pariseo tan saray onsiano ed ganggan so asanokan ed impangiwalwal nen Jesus ed sikara. Sanen sikatoy ontaynan ed abung, sikaray ginmapon sinmumpan mapalalo ed sikato tan inataki ra na tepetepet. Sinali ran sikatoy erelen diad pangibaga to na antokaman ya onkanan kaarestoan to. Lucas 11:37-54; Deuteronomio 14:22; Micas 6:8; 2 Awaran 24:20-25.

▪ Akin a kinondena nen Jesus iray Pariseo tan saray onsiano ed Ganggan?

▪ Antoran awit so impasen na saray abogado ed totoo?

▪ Kapigan so “inkapalsa’y mundo?”