Say Sankabalgan a Toon Nambilay ed Kapiganman

Kapitulo 75

Say Lapuan na Liket

Legan na ministeryo to ed Galilea, si Jesus so nanggawa na milagro, tan uuliten to iraya natan ed Judea. Alimbawa, sikato so amapaway manlapud sakey a laki na demonyon amepe ed sikato. Say karaklan so mankelaw, balet saray kritiko so amalesa na parehon isusumpa a singa ed saray pinalesa ra ed Galilea. “Lapu ed pakapanyari nen Beelzebub a principe na saray demonio so pamapapawayan to ed saray demonios,” kuan da. Arum so mankaliktan na babaleg ya ebidensya manlapud si Jesus nipaakar ed pakabidbiran to, tan sinali ran sikatoy tuksoen diad pangekerew na sakey a tanda manlapud tawen.

Lapud amta to no anto so nononoten da, si Jesus so angiter na parehon ebat ed saray kritiko to ed Judea a singa inter to ed saraman so walad Galilea. Ibabaga to a kada panarian a naapag sumpad inkasikaton-dili, so nageba. “Et,” tepet nen Jesus, “no si Satanas naapagapag met sumpa ed sikato lanlamang, panon so yalagey na panarian to?” Impanengneng to so mapeligron talindeg na saramay kritiko to diad pangibabaga: “No lapu’d tamoro na Dios so pamapapawayan ko ed saray demonio, sirin say panarian na Dios sinmabi ed sikayo.”

Saramay makakaimaton ed saray milagro nen Jesus so nepeg ya onkiwas ed parehon paraan a singa ed saramay kinmiwas, a dakel lan siglo ed asakbay et akanengneng ed impanggawa nen Moises na milagro. Sikaray kinmelyaw: “Tamoro na Dios iya!” (NW) “Tamoro na Dios” met so angukit na Samploran Ganggan ed saray tabletan bato. Tan “tamoro na Dios”​—say masanton espiritu to, odino aktibon puersa—​so amakayari ed si Jesus a papawayen iray demonyo tan paabigen iray mansasakit. Kanian say Panarian na Dios so peteg a sinmabi ed sarayan kritiko, lapud si Jesus, say impasen ya Ari ed Panarian, so wadman ed pegley da.

Insan impanengneng nen Jesus a say abilidad ton mamapaway na saray demonyo so ebidensya ed pakayari to sumpad si Satanas, anggan singa say mabiskeg a too so onla tan talonaan so armadon tuloy a toon manbabantay ed palasyo to. Sikato met so angulit ed ilustrasyon ya insalaysay to ed Galilea nipaakar ed sakey a marumsis ya espiritu. Say espiritu so tinmaynan ed sakey a too, balet sanen agpinano na too na maabig iran bengatla so luang, say espiritu so pinmawil a kaibay arum a pitora, tan say kipapasen na too so nagmaliw a mauges nen say nen inmuna.

Legan na idedengel ed sarayan bangat, sakey a bii manlapud karaklan so apakiwas ya onkelyaw na maksil: “Mapalar so eges ya angawit ed sika, tan saray pagew a sinosoan mo!” Lapud say pilalek na kada biin Judio et say pagmaliw ya ina na sakey a propeta tan nagkalalo la’d samay Mesias, natalosan no akin a nibaga iya na sayan bii. Mapatnag ya inisip ton si Maria so nagkalalo lan maliket lapud pagmamaliw ton ina nen Jesus.

Anggaman ontan, tampol a pinetek nen Jesus so bii nipaakar ed tuan lapuan na liket. “[Andi],” inyebat to, “[noagta], Lalo’n mapalar so saray ondengel ed salita na Dios, tan sikato’y onoren da!” Agbalot impatnag nen Jesus a say ina to, si Maria, so nepeg ya ikdan na nikaduman galang. Imbes, impanengneng to a say tuan liket so narumog ed pagmamaliw a sakey a matoor ya aripen na Dios, aliwan diad antokaman a pisikal a siglaotan odino agawaan.

A singa ginawa to ed Galilea, binaat met nen Jesus iray totoo ed Judea lapud pangekerew da na tanda manlapud tawen. Imbaga to ed sikara ya anggapo so tandan niiter ed sikara noag say tanda nen Jonas. Si Jonas so nagmaliw a tanda namparan diad taloran agew to ed loob na sira tan say makpel a panagpulong to, a nansumpal ed impanpataoli na saray taga Nineve. “Et nia!” kuan nen Jesus, “sakey a babaleg nen si Jonas so wadia.” Mipadpara, say reyna na Sheba so mankelaw ed kakabatan nen Solomon. “Et nia!” kuan met nen Jesus, “babaleg nen si Salomon so wadia.”

Impaliwawa nen Jesus a sano selselan na sakey a too so sakey lampara, saya so agto ipapasen ed loob na sakey a kaban odino ed dalem na buksot noagta ed sakey kandelero pian nanengneng na totoo so liwawa. Anganko ta isisiglaot to itan a panbabangat tan panggagawa na milagro ed arapan na sarayan nanpaawet a totoo ed dumerengel to a mipadpara ed pangiyaamot ed silew na sakey a lampara. Say kamataan na saratan a manangimaton so aliwan simpli, odino akaapasakey, kanian say ginetman gagala na saray milagro to so sinmaew.

Si Jesus so agano nin amapaway na demonyo tan ginawa ton makapansalita so sakey a toon emel. Saya so managyat ed totoon walaan na simplin mata, odino akaapasakey, saray matan mangidayew ed sayan maglorian agawaan tan iyabawag so maong a balita! Ingen, diad sarayan kritiko, saya so ag-agawa. Kanian sinampotan nen Jesus: “Nengnengen mo sirin a say silew ya wala ed sika aliwa komon ya ambilunget. [No] sirin say amin a laman mo napno na liwawa, ya angapo so pasen ed sikato ya ambilunget, sikato ya amin masnag, a singa say silew no sinagan to ka ed silew to.” Lucas 11:14-36; Exodo 8:18, 19; 31:18; Mateo 12:22, 28.

▪ Anto so kiwas ed impamaabig nen Jesus ed laki?

▪ Anto so “tamoro na Dios” tan panon a sinmabi so Panarian na Dios ed saray dumerengel nen Jesus?

▪ Anto so lapuan na tuan liket?

▪ Panon a nawalaan so sakey a too na simplin mata?