Say Sankabalgan a Toon Nambilay ed Kapiganman

Kapitulo 74

Simbawa ed si Martha, tan Bilibilin Nipaakar ed Pikakasi

Legan na ministeryo nen Jesus ed Judea, sikato so limoob ed bario na Betania. Dia manaayam si Marta, Maria, tan say agi ran si Lazaro. Anganko ta sarayan talo so akabat nen Jesus ed asasakbay a ministeryo to tan diad ontan et maapit lan kaaro ra. Nibaga ni, si Jesus so linma natan ed abung nen Marta tan sikatoy inabrasa.

Si Marta so magunaet a mangitarya parad si Jesus na sankaabigan a bengatlan wala ed sikato. On, sakey a baleg a pribilihyo a say abung na sakey so nabisita na insipan a Mesias! Kanian si Marta so okupadon tuloy ed panangiparaan na matrabahon tagano tan maniimano na amayamay a detalye a denisenyon manggawa ed ibibisita nen Jesus a lalon makapaliket tan komportable.

Diad biek a dapag, say agi nen Marta a si Maria so imyurong ed salian nen Jesus tan ondedengel ed sikato. Ag-abayag, si Marta so inmasingger tan inkuanto ed kinen Jesus: “Katawan, ag mo ta kapagaan a say agik panbokbokoren toak a manpaga? Ibagam ed sikato a tulongan toak.”

Balet si Jesus so ag-angikuan na antokaman ed si Maria. Imbes, sinimbawa to si Marta lapud pagmamaliw ton alabas a mapaga ed material iran bengatla. “Marta, Marta,” sipapangasin panamaat to, “sika so mapaga tan nagogonigon nipaakar ed dakel iran bengatla. Daiset a bengatla, anggaman ontan, so nakaukolan, odino sakey lambengat.” (NW) Ibabaga nen Jesus ya agnakaukolan a mangusar na dakel a panaon ed panangiparaan na dakel a putahe parad sakey a panangan. Say daiset odino anggan sakey lambengat a putahe so masarag la.

Maabig so gagala nen Marta; labay to a sikatoy sakey a maparawes ya unabong. Ingen, diad panagpaga to ed material iran probisyon, nasasaew to so pankanawnawan mangawat na personal a bilin manlapud dilin Anak na Dios! Kanian sinampotan nen Jesus: “[Parad biang to], si Maria pinili to so maong a betang, a sikato so ag naekal ed sikato.”

Saginonor, diad sananey ya inkagawa, sakey a babangatan so tinmepet ed si Jesus: “Katawan, ibangat mo kami a mikasi, onong met na inpangibangat nen Juan ed saray babangatan to.” Posiblen sayan babangatan so anggapo diman ngalngali sakey tan kapalduan taon ed asasakbay sanen intarok nen Jesus so modelon pikakasi ed Sermon to ed Palandey. Kanian inulit nen Jesus so bilibilin balet intuloy toy angiter na ilustrasyon pian idanet so pankaukolan na pagmaliw a magunaet ed pikakasi.

“Siopa ed sikayo so walaan na kaaro,” kuan nen Jesus, “et onla ed sikato ed pegley labi, tan kuan to ed sikato, Kaaro, pabayes mo ak na talora’n tinapay; ta sakey a kaarok so linma ed siak a nanlapu ed panakar et angapo so iparongok ed sikato? Et sikato manlapu ed loob onebat tan kuan to, Agmoak gonigonen: say pinto akakapot la, et saray ana’ ko kaakdol ko’ra; ag ko nayarian so onbangon tan mangiter ed sika. Kuan ko ed sikayo, angan ag onbangon tan mangiter ed sikato, lapu ed kaaro to, angan ontan lapu ed pangonigon to onbangon tan iter to ed sikato so amin a kaokolan to.”

Diad sayan panangipareng et aglabay ya ibaga nen Jesus a si Jehova a Dios so agmaabuloy ya onebat ed kere-kerew, a singa say kaaro ed istorya to. Andi, noagta sikato so mangiyiilustra a no say sakey ya agmaabuloy a kaaro so onebat ed mapilit a kerew, agta nagkalalo ni ya onebat so maaron mangatatawen ya Ama tayo! Kanian intuloy nen Jesus: “Et kuan ko ed sikayo, kerew kayo, et naitdan kayo; mananap kayo, et makaromog kayo; onpato’ kayo, et nalukasan ed sikayo. Ta balang sakey ya onkerew, mangawat; et say mananap, makaromog; et say onpatok, nalukasan.”

Insan si Jesus so anukoy ed ag-ayadyari, makasalanan ya atooan ya ama, ya ibabaga: “Siopa ed sikayo so ama sano say anak so onkerew ed sikato na tinapay, et sikato so itdan to na sakey a bato; ono sira, et sikato so mangiter na sakey ya uleg a panagkasira? Ono sikato’y onkerew na sakey ya iknol, iter to ed sikato so sakey ya alakdan? No sikayo sirin, anta mauges kayo, amta yo so mangiter na saray maong a panangaro ed saray anak yo, ag kasi nagkalalo a say Ama yo a mangatatawen mangiter na Espiritu Santo ed saray onkerew ed sikato?” On, agaylan makapasagyat a panamaseseg so itatarok nen Jesus a magmaliw a magunaet ed pikakasi. Lucas 10:38–11:13.

▪ Akin a si Marta so ontanlan magunaet ed panangiparaan parad si Jesus?

▪ Anto so ginawa nen Maria, tan akin a sikatoy kinomendaan to imbes a si Marta?

▪ Anto so amakiwas ed si Jesus ya uliten so bilibilin to nipaakar ed pikakasi?

▪ Panon ya inyilustra nen Jesus so pankaukolan na pagmaliw a magunaet ed pikakasi?