Say Sankabalgan a Toon Nambilay ed Kapiganman

Kapitulo 73

Sakey a Mapangasin Samaritano

Anganko ta si Jesus so asingger ed Betania, sakey a bario a ngalngalin duaran milya manlapud Jerusalem. Sakey a lakin onsiano ed Ganggan nen Moises so inmasingger ed sikato tekep na sakey a tepet: “Managbangat, anto’y gawaen ko, pian natawir ko so bilay ya andi angaan?”

Atebek nen Jesus a say too, a sakey ya abogado, so aglambengat manetepet parad impormasyon noagta, imbes, lapud labay ton sikatoy suboken. Nayarin gagala na abogado a paebaten si Jesus ed sakey a paraan a makaopendi ed pakalikna na saray Judio. Kanian ginawa nen Jesus ya ibiang na abogado so inkasikato, ya intepet: “Anto so nisulat ed gangan? Panon so panbabasam?”

Bilang ebat, say abogado, a mangaagamil na nikadkaduman pakatalos, so angaon manlapud ganggan na Dios diad Deuteronomio 6:5 tan Levitico 19:​18, ya ibabaga: “Aroen mo so Katawan [Jehova, NW] a Dios mo ed amin a pusom, tan amin a kamarerwam, tan amin a kasil mo, tan amin ya isip mo; tan say kaparam a too [odino, kaabay] onong ed sika lanlamang.”

“Matunong so inebat mo,” ebat nen Jesus. “Itultuloy mo iyan gawaen tan sika so makagamor na bilay,” NW.

Anggaman ontan, say abogado so agkontento. Say ebat nen Jesus so aliwan espisipikon tuloy parad sikato. Labay ton napaseguroan nen Jesus a saray dilin panmoria to so duga tan sirin et sikato so matunong ed pidedeneng to ed arum. Kanian, intepet to: “Siopan talaga so kaabay ko?” NW.

Sisiaen na saray Judio a say terminon “kaabay” so onaaplika lambengat ed saray Judio, a mapatnag ya ipapanengneng na konteksto ed Levitico 19:18. Diad tua, anggan diad saginonor et si apostol Pedro so angibaga: “Amtayo a mauges ed sakey a Judio so mitipon odino onasinger ed too a sananey a nacion.” Kanian say abogado, tan nayarin saray babangatan met, so manisia a sikaray matunong no saray kapara ran Judio lambengat so sipapangasin tratoen da, lapud diad panmoria ra, saray aliwan Judio so agpeteg a kaabay da.

Panon a napetek nen Jesus so panmoria na dumerengel to ya ag-ira naopendi? Sikato so angisalaysay na sakey ya istorya, posiblen basi ed aktual ya agawa. “Sakey a [Judio],” kuan nen Jesus, “[so] linmasor nanlapu ed Jerusalem ya onla ed Jerico; et naplag ed saray tulisan a sikato so nanparpara a sinamsaman tan kinabil da, tan tinmainan ira, a sikato’y pinaolian da a manpapanabos.”

“Et nibana,” intuloy nen Jesus, “sakey a sacerdote a linmasor ed saman a dalan: et nen sikato so anengneng to, linmabas ed sananey a gilig. Et ontan met sakey a Levita, nen akasabi ed saman a pasen, et anengneng to, linmabas ed sananey a gilig. Balet sakey a Samaritano, nen manaakar, sinmabi ed kawalaan to; et nen sikato so anengneng to, atenyeg so panangabagey to.”

Dakel iran saserdote tan Levita a katulongan da so manaayam ed Jerico, a walay kaarawin 23 kilometro ed sakey a mapeligron dalan a palusor na 900 metro manlapud templon panlilingkoran da diad Jerusalem. Say saserdote tan Levita so nailaloan ya ontulong ed kapara ran Judion walad kairapan. Balet ag-ira tinmulong. Imbes, sakey a Samaritano so tinmulong. Kagulan tuloy na saray Judio iray Samaritano ya agni abayag et ininsulto ray Jesus ed sankabiskegan a termino diad impanawag dad sikaton “Samaritano.”

Anto so ginawa na Samaritano pian tulongan imay Judio? “Dinmago ed sikato,” kuan nen Jesus, “tan binerber to so saray suga’to, a kinalboan to ra na larak tan alak; et sikato’y inpakabayo to ed dili a sinakayan to, et inakar to ed darawesan, et sikato’y pinagaan to. Et dia’d ontombok ya agew angipaway na duara’n denario, et initer to ed akan abung, et inkuan to ed sikato, Sikato’y pagaan mo; et ganagana ni gastosen mo, et, no ompawilak lamet, bayaran ko ed sika.”

Kayari impangisalaysay na istorya, tinepetan nen Jesus imay abogado: “Siopa ed saraya’n talo, so isipen mo ya angipatnag na kapara’n too [a] naplag ed saray tulisan?”

Lapud agto nitepel a say dayew so iter ed sakey a Samaritano, inmebat labat imay Samaritano na onia: “Say nanagamil na panangasi ed sikato.”

“Laka, tan gawam so ontan,” so imbaga nen Jesus.

No diritsaan ya imbaga nen Jesus ed abogado a saray aliwan Judio so kaabay to met, aglambengat nayarin impulisay iya na saman a too noagta dakel a wadman ya ondedengel so nayarin ondapag ed sikato ed saman a pitotongtong ed si Jesus. Anggaman ontan, sayan tua-ed-bilay ya istorya so angiter na linew ed agnasuppiat a paraan a saray kaabay tayo so mangilaktip ed totoon agtayo karasa tan kanasyon. Agaylan makapadinayew a paraan na panagbangat nen Jesus! Lucas 10:25-37; Gawa 10:28; Juan 4:9; 8:48.

▪ Antoran tepet so intepet na abogado ed si Jesus, tan anto so mapatnag a gagala to ed panetepet?

▪ Siopara unong ed pananisia na saray Judio so kakaabay da, tan anton rason so wala pian manisia ya anggan saray babangatan so walaan met na onian pananisia?

▪ Panon ya inyarap nen Jesus so suston panmoria ta pian agnasuppiat na abogado itan?