Say Sankabalgan a Toon Nambilay ed Kapiganman

Kapitulo 72

Imbaki nen Jesus so 70

Saman so loglog na 32 K.P., nagnap a taloy taon nanlapud inkibautismoan nen Jesus. Sikato tan saray babangatan to so agano nin inmatendi ed Piesta na saray Tabernakulo ed Jerusalem, tan maseguron agni ira akaarawi diman. Diad tua, inusar nen Jesus so kaslakan ed nakekeraan ya anemiran bulan na ministeryo to balang la’d Judea odino diad nibaliw labat na Ilog Jordan ed distrito na Perea. Sayan teritorya so nakaukolan met a nakobrian.

Tua, kayari Paskua na 30 K.P., inusar nen Jesus so ngalngalin waloran bulan a nanpupulong ed Judea. Balet kayari impanali na saray Judio a sikato so pateyen diman diad Paskua na 31 K.P., inusar to so tinmumbok a sakey tan kapalduan taon a manuna diad Galilea. Legan na saman a panaon, sikato so anugyop na sakey a baleg, sinanay-a-maong ya organisasyon na saray managpulong, ya anggapo’d sikato ed asasakbay. Kanian sikato natan so mangigagapo na sakey a pinal a malaknab a panagtasin kampanya ed Judea.

Ginapoan nen Jesus so kampanya diad impamili na 70 a babangatan tan ed impangibaki’d sikaran sanderwa. Kanian, ami-amin et wala so 35 ya ulop na manangipulong na Panarian a mankimey ed teritorya. Saraya so linman inmuna ed kada syudad tan pasen a planon laen nen Jesus, mapatnag a kaiba iray apostol to.

Imbes a bilinen so 70 ya onla ed saray sinagoga, imbaga nen Jesus ed sikara ya onloob ed saray pribadon ayaman, ya ipapaliwawa: “Angan anto ya abung a looban yo, kuan yo ya onona, Say deen wala komon ed saya’n abung. Et no ’wadman so sakey ya anak na kareenan, say deen yo manayam ed sikato.” Anto so magmaliw a mensahe ra? “Kuan yo ed sikara,” kuan nen Jesus, “inmasinger ed sikayo so panaria’y Dios.” Nipaakar ed kimey na 70, irereport na Matthew Henry’s Commentary: “Singa say Katawan da, inerman so binisita ra, sikara so nanpulong ed kabkaabungan.”

Saray bilin nen Jesus ed 70 so mipadpara ed saramay inter ed 12 sanen saraya so imbaki to ed kampanyan panagpulong ed Galilea a ngalngali sakey taon ed asasakbay. Agto lambengat pinasakbayan so 70 ed isusumpan naarap da, a mangipaparaan ed sikaran mangiparungtal na mensahe ed saray onabung, noagta sikara so inikdan to na pakayarin manpaabig ed mansasakit. Kanian, sanen ag-abayag et sinmabi si Jesus, dakel so magunaet a makapiarap ed Katawan a saray babangatan to so makayarin manggawa na ontan iran makapakelaw a bengatla.

Say panagpulong na 70 tan say sinmublay a kimey nen Jesus so nambayag na antikey a tuloy a panaon. Ag-abayag et saray 35 ya ulop na manangipulong na Panarian so pinmawil ed si Jesus. “Katawan,” malikeliket ya inkuanda, “angan saray demonios apatolok mira lapu’d ngaran mo.” Say ontan a maabig a report so maseguron amaliket ed si Jesus, ta lapud inyebat to: “Anengneng ko si Satanas a naplag nanlapu ed tawen a singa kirmat. Nia, initdan ta kayo na pakaoley ya ongatin ed saray uleg tan alakdan.”

Kabat nen Jesus a kayari kiyanak na Panarian na Dios ed panaon na anggaan, si Satanas tan saray demonyo to so napataynan manlapud tawen. Balet natan et sayan panamataynan ed agnanengneng iran demonyo na totoo lambengat so onkanan kaaruman a panamaseguro ed satan ya onsasabin ebento. Kanian, si Jesus so manasaglawi ed arapen a kapelag nen Satanas manlapud tawen bilang absoluton kapetegan. Sirin, saman so diad sakey a simbolikon pantalos a say 70 so inikdan na autoridad pian gatinan iray uleg tan alakdan. Ingen, inkuan nen Jesus: “Agkayo manliket nisengeg ed saya, a saray espiritu ontolok ira ed sikayo; manliket kayo ingen ta saray ngaran yo nisulat ira ed tawen.”

Si Jesus so aliketan a tuloy tan sipupublikon angidayew ed Ama to lapud impangusar ed sarayan mapaabeban ariripen to ed sakey a makapanyarin paraan. Diad iyaarap ed saray babangatan to, inkuanto: “Mapalar so saray mata a makanengneng ed saray nanengneng yo: Ta kuan ko ed sikayo, a dakel so saray profetas tan arari a kinaliktan da a nanengneng so saray nanengneng yo, et agda’ra anengneng; tan dengelen so saray narengel yo, et agda’ra nadngel.” Lucas 10:1-24; Mateo 10:1-42; Apocalipsis 12:7-12.

▪ Iner so nanpulongan nen Jesus legan na inmunan taloran taon na ministeryo to, tan anton teritorya so kinobrean to ed unor ya anemiran bulan to?

▪ Iner so angipaarapan nen Jesus ed 70 pian anapen so totoo?

▪ Akin a nibaga nen Jesus ya anengneng ton naplag la si Satanas manlapud tawen?

▪ Diad anton pantalos a nayarin gatinan na 70 iray uleg tan alakdan?