Say Sankabalgan a Toon Nambilay ed Kapiganman

Kapitulo 71

Sigagalan Agpanisia na Saray Pariseo

Saray ateng na datin mipapayabol a bulag so natatakot sanen sikara so pinatawag ya onarap ed saray Pariseo. Amta ran diniterminan papawayen manlapud sinagoga so siopaman a mangibalikas na pananisia ed si Jesus. Say ontan a panamultot na pililimog ed arum diad komunidad so mangitarok na agaylan irap, nagkalautla ed dukan pamilya. Kanian saray ateng so maalwar.

“Sikato ta ya so anak yo, ya kuan yo a nianak a bulag?” intepet na saray Pariseo. “Panon so pakanengneng to sirin natan?”

“Amta mi a saya sikato so anak mi, tan nianak a bulag,” pinekderan na saray ateng. “Ingen no panon so pakanengneng to natan, ag mi amta; ono no siopa so angilukas na mata to’ra, ag mi amta.” Seguradon imbaga na anak da so amin ya agawa, balet sikakabat ya inkuan na saray ateng: “Tepet yo ed sikato; sikato so mataon la; isalitaan to so inkasikato.”

Kanian, tinawag lamet na saray Pariseo so laki. Natan et sinali ran sikatoy pagyawen diad pangipapatnag a sikaray akatugyop na manangakusan ebidensya sumpad si Jesus. “Pagalangan mo so Dios,” ganggan da. “Sikami amta mi ya saya’n too managkasalanan.”

Say datin bulag a laki so ag-angiburi ed panamakasalanan da, a mangibabaga: “No sikato kasi managkasalanan, ag ko amta.” Balet inyarum to: “Sakey a bengatla so amtak, ya, unong a bulag ak nen saman, natan makanengneng ak.”

Diad panasalin pananap na lingo ed salaysay to, intepet lamet na saray Pariseo: “Anto’y ginawa to ed sika? Pano’y inpangilukas to ed saray matam?”

“Inbagak lanti ed sikayo natan,” inreklamo na laki, “et ag yo dinengel. Akin et laba’yo lamet a dengelen?” Painsulton intepet to: “Laba’yo ta met so magmaliw a babangatan to?”

Sayan ebat so amasanok ed saray Pariseo. “Sika so babangatan to,” so akusasyon da, “balet sikami babangatan kami nen Moises. Sikami amta mi ya say Dios akisalita ed Moises: balet nipaakar ed saya a too, ag mi amta [no iner] so lapuan to.”

Diad pankelaw, say mapaabeban mipapayabol so inmebat: “Dia lanti, ed saya so kawalaan na makapakelaw, ta ag yo amta no [iner] so lapuan to, et angan ontan nilukasan to so saray matak.” Anton konklusyon so nepeg a naala manlapud saya? Tinukoy na mipapayabol so aawaten a panangikatunongan: “Amta tayo a say Dios ag to dengelen so saray managkasalanan: ingen no siopaman a too sikato so manangigalang ed Dios, tan gawaen to so linawa to, sikato so dengelen to. Nanlapu ed ingapo na mundo ag nadnadngelan angan kapigan ya wala so sakey ya angilukas na saray mata na sakey a too a nianak a bulag.” Kanian, malinew so impangikuan: “No saya’n too ag nanlapu ed Dios, angapo komon so ayarian to a gawaen.”

Anggapoy niyebat na saray Pariseo ed ontan a diritsaan, malinew a panagkatunongan. Agda naawat so katuaan, tan kanian nantamian da so laki: “Sika niana’ka a sigpot ed saray kasalanan, et ibangat mo kami?” Diad saya et inagsit da so laki, mapatnag a sikatoy pinapaway da manlapud sinagoga.

Sanen naamtaan nen Jesus so nipaakar ed agawa, inanap to imay laki tan kuanto: “Kasin sika so mangipupundar na pananisia ed Anak na too?” NW.

Bilang ebat, intepet na samay datin bulag: “Siopa ta, Katawan, pian manisia ak ed sikato?”

“Sikato so misasalita ed sika,” inyebat nen Jesus.

Tampol, say too so dinmakmomo ed arapan nen Jesus tan inkuanto: “Katawan, manisia ak.”

Impaliwawa natan nen Jesus: “Nisengeg ed pangokom linmaak dia ed mundo, pian saray ag makanengneng makanengneng ira; tan saray makanengneng magmaliw ira’n bulag.”

Diad saman, saray Pariseo ya ondedengel so nantepet: “Bulag kami ta met?” No bidbiren dan sikaray bulag ed kanonotan, makatunongay isumpa ra ed kinen Jesus. A singa ibabaga nen Jesus ed sikara: “No komon ta bulag kayo, angapo komon so kasalanan yo.” Ingen ta sikaray nanpaawet a mangipipilit a sikara so aliwan bulag tan agmankaukolan na espiritual a kaliwawaan. Kanian inkuan nen Jesus: “Natan kuan yo, Makanengneng kami: say kasalanan yo mansiansia.” Juan 9:19-41.

▪ Akin a saray ateng na samay datin bulag a mipapayabol so natatakot sanen sikaray tinawag ed arapan na saray Pariseo, tan kanian panon a sikaray maalwar ya inmebat?

▪ Panon a sinali na saray Pariseo a pagyawen imay datin bulag a laki?

▪ Anton makatunongan ya argumento na laki so amasanok ed saray Pariseo?

▪ Akin a saray Pariseo so anggapoy rason parad isusumpa ra ed kinen Jesus?