Imatalek ya Amin so Kapagaan Yo ed si Jehova
“Mangabeba kayo . . . ed silong na makapanyarin lima’y Dios, pian itandoro to kayo ed Kanepegan ya panaon; imatalek yo ya amin ed sikato so kapagaan yo; ta sikato asikasoen to kayo.”—1 PEDRO 5:6, 7.
1. Panon a makakaapekto so kapagaan ed sikatayo, tan panon iyan niyilustra?
SAY kapagaan so walaan na baleg ya epekto ed bilay tayo. Niyaliling itan ed static a no maminsan et maneral ed marakep a togtog a narerengel ed radyo. No anggaporay makasbel ed radio waves, napangayagaan so makapaliket iran togtog tan mamakalma ed onderengel. Anggaman ontan, say magararagar ya ingal na static so makaderal ed anggan sankarakpan a tonada, a sengegay paningongot tan kadismayaan. Say kapagaan so nayarin nawalaan met na ontan ya epekto ed inkapalna tayo. Pabebelatan to itayon tuloy ya agtayo la nagawaan iray lalon importantin bengatla. On, “say kabelatan ed puso na too mamatuek ed sikato.”—Uliran 12:25.
2. Anto so imbaga nen Jesu-Kristo nipaakar ed ‘saray kapagaan ed bilay’?
2 Sinaglawi nen Jesu-Kristo so nipaakar ed kapeligroan na pakakasbel manlapud alabas a kapagaan. Diad propesiya to nipaakar ed kaunoran iran agew, insimbawa to: “Manlikas kayo ed inkasikayo ompan saray puso yo napano ed inkasiba, tan panagbuek, tan saray kapagaan ed saya’n bilay, et onsabi ed sikayo ed kasanlilikna so saman ya agew a singa sakey a patit. Ta ontan so isabi to ed saray amin a manaayam ed tapew na amin a dalin. Balet manbantay kayo ed amin a panaon, a mikasi kayo, pian ontalona kayo a nilaban ed sarayan amin a bengatla’n nagawa, tan makaalagey ed arap na Anak na too.” (Lucas 21:34-36) No panon a say alablabas a panangan tan alablabas a panag-inom so mamakapuy ed panag-isip, kanian say pakabebelatan lapud ‘saray kapagaan ed bilay’ so mangekal ed abilidad tayon mantalos, tekep na saray makapasesgan resulta.
No Anto so Kabaliksan na Kapagaan
3. Panon a naukeran so “kapagaan,” tan antoray pigaran sengegan na saya?
3 Say “kapagaan” so naukeran bilang “makapaot-ot odino makapataktakot a pakasigensigen ed kanonotan lapud pagani-gani odino iilaloan a pakaperdi.” Satan so “walaay takot a paga odino panagnonot” ontan met ed “aliwan normal tan sobran pakasigensigen a mabetbet a pakabidbiray pisyolohiko iran tanda (a singa say panlinget, pakagonigon, tan maples a parok na puso), diad panduaruwa ed kapetegan tan nengneng na kasisigenan, tan say panduaruwa ed dilin abilidad a natalonaan itan.” (Webster’s Ninth New Collegiate Dictionary) Kanian say kapagaan so nayarin magmaliw a makagutgut a problema. Pigara ed dakel iran sengegan et say pansakit, itatatken, takot ed krimen, kaandi trabaho, tan paga parad pankaabigan na dilin pamilya.
4. (a) Anto so maabig a nonoten nipaakar ed totoo tan ed saray kapagaan da? (b) No sikatayo so manasagmak na kapagaan, anto so nayarin gawaen?
4 Malinew, walaray nanduruman balitang na kapagaan, no panon a walaray nanduruman kipapasen odino sirkumstansyan nayarin pansengegan na satan. Agpareho so kiwas na amin a too ed sakey a situasyon. Kanian, kaukolan tayon talosan ya anggaman say sakey a bengatla et agtayo panpapagaan, satan so nayarin sengegan na kapagaan a tuloy na arum a kapara tayon managdayew ed si Jehova. Anto so nayarin gawaen no say kapagaan so onsabi’d punton agtayo la naisip iray mantutunosan tan makapasagyat a katuaan na Salitay Dios? Anto no sikatayoy talagan aapektoan na kapagaan ya agti la nasarag ya imanoen iray salisalan na inkasoberano nen Jehova tan Kristianon integridad? Nayarin agtayo la nauman iray sirkumstansya tayo. Imbes, nepeg tayon anapen iray Makasulatan a punton ontulong ed sikatayon natalonaan so alabas a kapagaan a sengegan na makagutgut a problema ed bilay.
Walay Tulong
5. Panon a sikatayoy nayarin onkiwas a mitunosan ed Salmo 55:22?
5 Sano nakaukolan na saray Kristiano so espiritual a tulong tan nabebelatan lapud saray kapagaan, makala ra na ligliwa manlapud Salitay Dios. Itatarok to so napanmatalkan a panangiwanwan tan mangiiter ed sikatayo na dakel a pakaseguroan ya agtayo bokbokor bilang matoor ya ariripen nen Jehova. Alimbawa, inkanta na salmistan si David: “Paawit mo ed Jehova so awit mo, et sikato benbenan to ka: Ag ton balot paulian so matunong a natenyeg.” (Salmo 55:22) Panon tayon onkiwas a mitunosan ed sarayan salita? Diad panamegley na pangipasakbat na amin a kapagaan, panaburidoan, takot, tan pakadismayaan ed maaron mangatatawen ya Ama tayo. Saya so ontulong ed sikatayon naikdan na liknaan a maligen tan kalmadon puso.
6. Unong ed Filipos 4:6, 7, anto so nagawaan na pikakasi parad sikatayo?
6 Say maparanay tan impapuson pikakasi so kaukolan no imatalek tayoy awit tayo, pati amin a kapagaan tayo, ed si Jehova. Saya so mangitarok ed sikatayo na akindalem a kareenan, lapud insulat nen apostol Pablo: “Ag kayo mapaga ed antokaman; noag dia ed ganagana lapu ed pikakasi tan pikekerew a tekep na pisasalamat nipakabat komon ed Dios so saray kerew yo. Tan say deen na Dios, a talonaan to’n amin a pakatalos, bantayan to so kapusoan yo tan saray nonot yo ed Cristo Jesus.” (Filipos 4:6, 7) Say anggapoy kaparan “deen na Dios” so sakey a nikadkaduman inkaligen a pangagayagaan na dedikadon ariripen nen Jehova anggaman walad sankairapan a kipapasen. Saya so resulta na maapit tan personal a relasyon ed Dios. Anggaman ipipikasi tayo so masanton espiritu tan aabuloyan ya onkiwas iya ed sikatayo, agnaaandi so amin a problema ed bilay tayo, balet talagan pangagayagaan tayo so bunga na espiritun kareenan. (Lucas 11:13; Galacia 5:22, 23) Agtayo tatalonaan na kapagaan, lapud kabat tayon gagawaen nen Jehova ya amin a matoor a totoo to so ‘manayam ed andi kaatapan’ tan agto abuloyan a nagawa so antokaman a pansengegan na permanentin pakasakitan tayo.—Salmo 4:8.
7. Anto so betang a nayarin gawaen na mamatatken diad itulong ed sikatayo pian natalonaan so kapagaan?
7 Ingen, panon to no mantultuloy so kapagaan tayo, anggano dadalepdepen tayoray Kasulatan tan mantutultuloy ed panagpikasi? (Roma 12:12) Saray aturon mamatatken ed kongregasyon so probisyon met nen Jehova pian natulongan itayo ed espiritual. Naliligliwa tan natutulongan da itayo diad panamegley na panguusar ed Salitay Dios tan panpikasin kaiba tan parad sikatayo. (Santiago 5:13-16) Pinaseseg nen apostol Pedro so kapara ton mamatatken a pastolan so pulok na Dios a sibubulos, sigugunaet, tan diad ehemplon paraan. (1 Pedro 5:1-4) Sarayan lalaki so talagan interesado ed pankaabigan tayo tan labay day ontulong. Siempre, pian sigpot a nagunggunaan ed tulong na mamatatken tan pian napaabig so espiritual a kipapasen ed loob na kongregasyon, sikatayon amin so nepeg a mangiyaplika ed simbawa nen Pedro: “Mamalangwer, toekan yo so masiken. On, amin yo balkesan yoy inkasikayo na panagpaabeba, a manlilinkoran so sinansakey: ta say Dios kaingli’to so saray atatagey a linawa, et itdan to na gracia so saray mapaabeba.”—1 Pedro 5:5.
8, 9. Anton ligliwa so nayarin nagamoran manlapud 1 Pedro 5:6-11?
8 Inyarum ni nen Pedro: “Mangabeba kayo sirin ed silong na makapanyarin lima’y Dios, pian itandoro to kayo ed Kanepegan ya panaon; imatalek yo ya amin ed sikato so kapagaan yo, ta sikato asikasoen to kayo. Mandangka kayo, manbantay kayo; ta say kabusol yo, say diablo, wala ed kaliberliber yo ya singa omoang a leon a mananap na buagen to. A sikato so sumpaen yo na mabiskeg a pananisia yo, amta yo a peteg ta saratan a kairapan nagawa met ira ed utel na agagi yo ya wala ed mundo. Tan say Dios na amin a gracia, ya anawag ed sikayo ed andi anga a gloria to lapu ed Cristo, dia ed kayari inpantepel yo na irap ed magano, sikato’n dili, payadyarien, paleten, pabiskegen to kayo komon. Dia ed sikato komon so pakauley ed ando lan ando. Ontan pakomon.”—1 Pedro 5:6-11.
9 Agaylan makaligliwa so pakamorian nayarian tayon ‘imatalek so amin a kapagaan [ed Dios] ta asikasoen to itayo’! Tan no arum ed kapagaan tayo et nisesengeg ed pangegetma na Diablo a deralen so siglaotan tayo ed si Jehova diad kapasegsegang tayo tan arum niran kairapan, agta makapaliket a naamtaan a magmaliw a maabig so amin parad saray manamenben na integridad? On, kayari na maganon panirap tayo, say Dios na amin ya agkanepegan a panangasi et panganggaen to so panangipasal ed sikatayo tan gawaen to itayon maligen tan mabiskeg.
10. Say 1 Pedro 5:6, 7 so manutukoy ed antoran taloran kualidad ya ontulong pian nabawasan so kapagaan?
10 Say 1 Pedro 5:6, 7 so manutukoy ed taloran kualidad ya ontulong ed sikatayo pian natalonaan so kapagaan. Say sakey et say inkamapaabeba, odino “kaabebaan na nonot.” Say 1Pe 5 bersikulo 6 so sasampotan na balikas a “Kanepegan a panaon,” a mangisusuheri na pankaukolay pagmaliw a maanos. Ipapanengneng na 1Pe 5 bersikulo 7 a makapanmatalek tayon imatalek so amin a kapagaan tayo ed Dios ‘ta asikasoen to itayo,’ tan saratan a salita so mamapaseseg ed sikatayon nawalaan na sigpot a panmatalek ed si Jehova. Kanian nengnengen tayo no panon a say inkamapaabeba, anos, tan sigpot a panagmatalek ed Dios so makatulong pian nabawasan so kapagaan.
No Panon a Makatulong so Inkamapaabeba
11. Panon a makatulong ed sikatayo so inkamapaabeba pian natalonaan so kapagaan?
11 No sikatayoy mapaabeba, bidbiren tayo a saray kaisipan na Dios so matalonan tuloy nen say kaisipan tayo. (Isaias 55:8, 9) Say inkamaapabeba so ontulong ed sikatayon bidbiren a limitado lambengat so abilidad tayon mannonot no ipareng ed interon-lalaktipen na panmoria nen Jehova. Nanengneng toray bengatlan agtayo natebek, a singa ipapanengneng na agawa ed kinen matunong a Job. (Job 1:7-12; 2:1-6) Diad pangipaabeba tayo na inkasikatayo ed “makapanyarin lima’y Dios,” bibidbiren tayo so abeban kipapasen tayo no nipaakar ed Supremon Soberano. Ontutulong met iya ed sikatayo pian natalonaan iray sirkumstansyan aabuloyan to. Ompan panpilalekan na kapusoan tayo so maganat a solusyon, balet lapud saray kualidad nen Jehova so sigpot ya asimbang, pihon kabat to no kapigan tan no panon so ikiwas to ed sikatayo. No ontan, singa saray ugugaw, mapaabeban ompeket tayo ed makapanyarin lima nen Jehova, a matalek a tulongan to itayo diad panalona ed saray kapagaan tayo.—Isaias 41:8-13.
12. Panon a naapektoan so kapagaan nipaakar ed kaligenan ed materyal no sipapaabeba tayon iyaplika iray salita ed Hebreos 13:5?
12 Lalaktipen na inkamapaabeba so inkamabulos a mangiyaplika ed simbawa manlapud Salitay Dios, a mabetbet a mansusumpal ed pakabawasan na kapagaan. Alimbawa, no say kapagaan tayo so resulta na kalalanor a tuloy ed materyal a gegemtan, maabig parad sikatayo a nonoten a maong so simbawa nen Pablo: “Nabolos kayo komon a manlapu ed aro na pilak, panliketan yo so bengatla ya wala ed sikayo. Ta sikaton dili inbaga to: Ag taka naani tainan, tan ag taka naani ikaindan.” (Hebreos 13:5) Diad mapaabeban pangiyaplika ed ontan a simbawa, dakel so angibulos ed inkasikara manlapud baleg a kapagaan nipaakar ed kaligenan ed materyal. Bangta say kipapasen da ed materyal so agmet inmaligwas, satan so agmanodomina ed kanonotan da a sengegay pakasakitan da ed espiritual.
Say Betang na Inka-anos
13, 14. (a) No nipaakar ed maanos a panagsungdo, anton alimbawa so intarok nen Job? (b) Anto so nagawaan ed sikatayo na panalagar ed si Jehova?
13 Say balikas a “Kanepegan ya panaon” ed 1 Pedro 5:6 so mangisusuheri ed pankaukolan na maanos a panagsungdo. No maminsan, say problema so mantultuloy ed andukey a panaon, tan diad ontan et mamapaloor ed kapagaan. Nagkalautla ed ontan a situasyon a kaukolan tayon imatalek ed saray lima nen Jehova iray pamaakaran. Insulat nen babangatan a Santiago: “Ibilang tayo a mapalar so saray managtepel: nadngelan yo so inpantepel nen Job, tan anengneng yo so angaan ya initer na Katawan [Jehova, NW]; no panon a say Katawan [Jehova, NW] maabagey a toloy, tan mapangasi.” (Santiago 5:11) Asagmak nen Job so inkagba na panagbilay, inateyan na samploran ilalak, nanlikna na makapadimlan sakit, tan lingon kinondena na saray palson managligliwa. Anggan panon et natural lambengat a makalikna na kapagaan ed silong na saratan a sirkumstansya.
14 Anggaman ontan, si Job so nagmaliw ya uliran na maanos a panagsungdo. No sikatayo so manasagmak na alabas a subok ed pananisia, ompan kaukolan ya alagaren tayo so tulong, a singa ginawa to ed sikato. Balet kinmiwas so Dios nisesengeg ed sikato, a diad kaunoran et tinulongan si Job ed paniirap to tan tinumangan na daakan. (Job 42:10-17) Say siaanos a panalagar ed si Jehova so mamabayubo ed panagsungdo tayo tan mangipaparungtal na aralem a debosyon ed sikato.—Santiago 1:2-4.
Manmatalek ed si Jehova
15. Akin a sigpot tayon manmatalek ed si Jehova?
15 Pinaseseg nen Pedro iray kapananisiaan ya ‘imatalek ya amin ed sikato so kapagaan ed Dios ta aasikasoen to ra.’ (1 Pedro 5:7) Kanian nayarin nawalaan tayo na sigpot a panagmatalek ed si Jehova tan saya so manepeg lambengat. Say Uliran 3:5, 6 so mangibabagan: “Manmatale’ ka ed Jehova ed simoon a pusom, tan agka onsaral ed tapew na dili a pakatalos mo: Dia ed saray amin a dalan mo sikato so bidbiren mo, et sikato itonton to so saray basbas mo.” Lapud apalabas iran eksperiensia, aromog na arum a napno na kapagaan a mairap a panmatalkan so arum a too. Balet walaan tayo na amin a rason pian manmatalek ed Manamalsa tayo, say mismon Lapuan tan Mananustini na bilay. Anggaman agtayo matalek ed dilin reaksion tayo ed sakey a pamaakaran, sikatayo so lawas makapanilalon iliktar nen Jehova manlapud saray kairapan tayo.—Salmo 34:18, 19; 36:9; 56:3, 4.
16. Anto so imbaga nen Jesu-Kristo nipaakar ed kapagaan ed materyal a bengabengatla?
16 Katekep na panagmatalek ed Dios so katutulok ed Anak to, si Jesu-Kristo, ya angibangat na naaralan to manlapud Ama to. (Juan 7:16) Pinaseseg nen Jesus iray babangatan to a ‘mantipon na kayamanan ed tawen’ diad panlingkor ed si Jehova. Balet komusta so materyal a pankaukolan nipaakar ed tagano, kawesen, tan siroman? “Ag kayo mapaga,” so simbawa nen Jesus. Sinaglawi ton tataganoen na Dios iray manok. Kakawesan na marakep iray rosas. Agta nagkalalo ni ed totoon ariripen na Dios? Siempre ontan. Kanian, intuloy nen Jesus: “[Mantultuloy] ya anapen yo ni’n onona so panarian tan say inkatunong to; et amin iraya a bengatla niarum ira ed sikayo.” Inyarum ni nen Jesus: “Kanian ag kayo sirin mapaga nipaakar ed agew ya onsabi; ta say agew ya onsabi manpaga nipaakar ed sikato’n dili.” (Mateo 6:20, 25-34) On, kaukolan tayo so tagano, inumen, kawesen, tan siroman, balet no sikatayoy manmatalek ed si Jehova, agtayo tanton panpagaan irayan bengatla.
17. Panon tayon niyilustra so pankaukolay pangiyuna ed Panarian?
17 Pian anapen ya ununa so Panarian, kaukolan tayon manmatalek ed Dios tan oksuyen iray nepeg tayon iyuna ed dugan alasir. Say sakey a lumelegep ya andian na apparatus pian makaengas so nayarin onlegep pian mananap na talaba (oyster) a walaay perlas. Saya so paraan to ed pangitatarok na pinansyal parad pamilya to. Talagan nepeg ya unaen! Balet anto so mas importanti? Dagem! Sikato so nepeg ya onletaw a tunggal paminsan pian onengas. Nepeg a mas unaen so dagem. Mipadpara, ompan sikatayo so medyo nalalanor ed sayan sistema na bengabengatla pian nagamoran iray pankaukolan ed bilay. Anggaman ontan, nepeg tayon unaen ni so espiritual a bengabengatla lapud say mismon bilay na sankaabungan tayo so mandedependi ed sarayan bengatla. Pian napaliisan so sobran panagpaga ed materyal a bengabengatla, nepeg a nawalaan itayo na sigpot a panagmatalek ed Dios. Nilikud ed satan, say ‘pamadaak ed kimey ed Katawan’ so makatulong pian nabawasay kapagaan lapud “say liket nen Jehova” so napapaneknekan a biskeg tayo.—1 Corinto 15:58; Nehemias 8:10.
Mantultuloy ya Imatalek ed si Jehova so Kapagaan Yo
18. Anto so walan ebidensya a talagan makatulong ed sikatayo so pangimatalek na amin a kapagaan tayo ed si Jehova?
18 Pian makapansiansian akaapasakey so kanonotan ed espiritual, nepeg a mantultuloy ya imatalek ed si Jehova so amin a kapagaan tayo. Lawas nonoten a sikatoy tuan manatalima ed ariripen to. Diad pangiyilustra: Lapud ag-inkamatoor na asawa ton laki, limoor so kapagaan na sakey a Kristianon bii a sengegay agto pakakaugip. (Ipareng so Salmo 119:28.) Anggaman ontan, diad dokolan, inmatalek to ed si Jehova so amin a kapagaan to. Ibabaga ed sikato so ot-ot a sasagmaken to tan say duaran ankelag ya anak ton bibii. Kayari masimoon a pikakasi ton patulongan et sikatoy naynay lan makaugip, lapud sikatoy nanmatalek a sikato tan saray duaran anak to so asikasoen nen Jehova. Sayan Makasulatan a diborsyadon bii so malikeliket la natan ya akiasawa’d sakey a matatken.
19, 20. (a) Anto so pigaran paraan pian natalonaan so kapagaan? (b) Anto so nepeg a mantultuloy tayon gawaen ed saray kapagaan tayo?
19 Bilang totoo nen Jehova, walaray nanduruman paraan ed pananalona ed kapagaan. Say panangiyaplika ed Salitay Dios so nagkalautlan makatulong. Walaan tayo na mayaman ya espiritual a taganon itatarok na Dios diad panamegley na “matoor tan makabat ya aripen,” pati say makatulong tan makaligliwa iran artikulo a nipalapag ed Say Panag-Bantayan tan Awake! (Mateo 24:45-47) Walaan tayo na tulong na masanton espiritu na Dios. Say maparanay a panagpikasi so walaan na baleg a gungguna. Saray aturon Kristianon mamatatken so akaparaan tan mabulos a mangitarok na espiritual a tulong tan ligliwa.
20 Say dilin inkamapaabeba tan anos tayo so talagan makagungguna ed pideneng ed kapagaan a nayarin manisigensigen ed sikatayo. Nagkalautlan importanti et say sigpot a panagmatalek ed si Jehova, ta say pananisia tayo so lalon ombiskeg legan a nalilikna tayo so tulong tan panangiwanwan to. Say pananisia met ed Dios so ontulong pian agtayo alabas a nasigensigen. (Juan 14:1) Pakiwasen itayo na pananisia ya anapen nin ununa so Panarian tan magmaliw ya okupado ed makapagayagan kimey na Katawan, ya ontulong ed sikatayo pian natalonaan so kapagaan. Diad panamegley na ontan iran kimey et nalikna tayon sikatayoy maligen ed leet na saramay mankakanta na galang na Dios ed ando lan ando. (Salmo 104:33) Mantultuloy tayon imatalek sirin so amin a kapagaan tayo ed si Jehova.
Panon Yon Ebatan?
◻ Panon a nayarin ukeran so kapagaan?
◻ Antoray pigaran paraan pian natalonaan so kapagaan?
◻ Panon a makatulong so inkamapaabeba tan anos pian nabawasan so kapagaan?
◻ Diad panalona ed kapagaan, akin ya importanti so pakawalaan na panagmatalek ed si Jehova?
◻ Akin a sikatayoy mantultuloy a mangimatalek na amin a kapagaan tayo ed si Jehova?
[Litrato ed pahina 24]
Kasin amta yo no akin ya imbaga nen Jesus a, ‘Ag kayo mapaga’?