Say Manepeg a Pasen na Bilay Tayo ed Panagdayew ed si Jehova
“Agewagew ya igalang taka; tan idayew ko so ngaran mo lawas lan lawas.”—SALMO 145:2.
1. No nipaakar ed panagdayew, anto so kakaukolanen nen Jehova?
“SIAK si Jehova a Dios mo a sakey ak a maimon a Dios.” (Exodo 20:5) Nadngel nen Moises itan a deklarasyon manlapud si Jehova, tan diad saginonor et inulit to iya sanen manpapaliwawa ed nasyon na Israel. (Deuteronomio 5:9) Malinlinew ed kanonotan nen Moises ya iilaloan nen Jehova a Dios iray ariripen To a mangiter na nikabkabiig a debosyon ed Sikato.
2, 3. (a) Anto so amaneknek ed saray Israelita a say agawa ed asingger na Palandey Sinai so nikabkabiig? (b) Antoran tepet so usisaen tayo no nipaakar ed panagdayew na saray Israelita tan ariripen na Dios natan?
2 Saray Israelita tan say “magangana a karakel na bilang” a tinmaynan ed Ehipto a kaiba ra so akatasi ed sakey a bengatlan nikadkaduma so nankampamento’d asingger a Palandey Sinai. (Exodo 12:38) Aliwan singa ed panagdayew ed dirios na Ehipto, a nipaabeba lapud samploran bakbak, odino salot. Katekep na impangipatnag nen Jehova na kiwawala to ed si Moises et sakey a makapataktakot ya agawan milagro: karol, kirmat, tan makbaw a tanol na tamboyog a nanggawa ed amin a nankampamenton manggiwgiw. Kayari to et niwala so apuy tan asewek legan a say interon palandey et nayeyegyeg. (Exodo 19:16-20; Hebreos 12:18-21) No kaukolan na siopaman ya Israelita so nagkalalon prueba a say nagagawa et talagan nikadkaduma, kaukolan ton nengnengen lambengat si Moises sanen sikatoy linmasor a nanlapud palandey kayari impangawat to na saray ganggan na Dios. Unong ed apuyanan a salaysay, “say baog na lupa [nen Moises] nipatnag; et antakot ira [totoo] nen saman ya onasinger ed sikato.” Talagan, sakey ya agnalingwanan, labas-nen-toon pakayarin eksperiensia!—Exodo 34:30.
3 Parad satan a tipikon nasyon na Dios, anggapoy suppiat nipaakar ed kipasenan na panagdayew ed si Jehova. Sikato so Manangiliktar da. Otang daray bilay da’d sikato. Sikato met so Manangiter-na-ganggan da. Balet kasin intultuloy dan manunaan so pandayew ed si Jehova? Tan komusta iray modernon-agew ya ariripen na Dios? Anto so pasen na panagdayew ed si Jehova ed saray bilay da?—Roma 15:4.
Say Panagdayew na Israel ed si Jehova
4. Anto so inkaayos na kampo na Israel legan na impanbaroy da ed kalawakan, tan anto so sentro na kampo?
4 No nadungawan mo so nankampamentoan na Israel ed kalawakan, anto ta so nanengneng mo? Sakey a maawang, balet ta mauksoy iran linya na tolda a nayarin mankarga na taloran milyon odino onsulok niran totoo, ya atugtugyop unong ed taloran-tribo iran dibisyon ed amianen, abalaten, sagur tan bukig. No nengnengen mon maong, nayarin naimanom so sananey a grupon walad bandad pegley na kampamento. Sarayan apatiran memelag a grupo na saray tolda so panaayaman na saray pamilya na tribo nen Levi. Diad mismon pegley na kampamento, diad sakey a lugar a sinaraan na sakey a tela, et walay sakey a nikadkadumay inkaayos to. Saya et say “tolda na doypo,” odino tabernakulo, ya impaalagey tekep na “makalakal a puso [makabat-impanpuso, NW]” iran Israelita unong ed plano nen Jehova.—Numeros 1:52, 53; 2:3, 10, 17, 18, 25; Exodo 35:10.
5. Anto so gagalan kinanaan na tabernakulo diad Israel?
5 Diad kada sakey ed ag-onkulang ya 40 nankampamentoan da legan na impanbaroy ed kalawakan, angipaalagey so Israel na tabernakulo, tan saman so nagmaliw a pinagkasentro na panagkampoan da. (Numeros, kapitulo 33) Matukoy lambengat a si Jehova so dedeskribien na Biblia bilang miaayam ed limog na totoo to diad mismon sentro a kampo ra. Say gloria to so amano ed tabernakulo. (Exodo 29:43-46; 40:34; Numeros 5:3; 11:20; 16:3) Ikokomento na libron Our Living Bible: “Sayan niyalis-alis ya altar so sankaimportantian, ta satan so nagmaliw a pinagkasentro na relihyoson panuulopan na saray tribo nipaakar ed relihyon. Diad ontan et mantultuloy a pinankasakey tora legan na abayag a paanon na impanyatawyataw ed disierto tan kinmana bilang manamakasakey a kiwas.” Nilikud ed saya, say tabernakulo so kinmana bilang mantultuloy a panonot a say panagdayew na Israelitas ed Manamalsa ra so sankaimportantian ed bilay da.
6, 7. Anton paalagey parad panagdayew so sinalatan na tabernakulo, tan panon a kinmana itan ed nasyon na Israel?
6 Kayari insabi na Israelitas ed Insipan a Dalin, say tabernakulo so nantultuloy a pinagkasentro na panagdayewan na Israel. (Josue 18:1; 1 Samuel 1:3) Asabi panaon, improponi nen Arin David so pangipaalagey na permanentin inkasangal. Saya et say templon impaalagey ed saginonor na ilalak ton si Solomon. (2 Samuel 7:1-10) Diad inagurasyon to et sakey a lurem so linmeksab pian mangipatnag ed panangabobon nen Jehova ed saman a paalagey. “Siak petepeteg a sika inpaalageyan ko na abung a panayaman,” impikasi nen Solomon, “pasen a nipaakar ed sika a panayaman ed ando lan ando.” (1 Arari 8:12, 13; 2 Awaran 6:2) Say balo nin nipaalagey a templo natan so nagmaliw a sentro parad panagdayew na nasyon.
7 Amin ya Israelitan lalaki so oonlan mamitlon danay ed sakey taon nen saman ed Jerusalem pian atendian iray magayagan selebrasyon ed templo diad pamidbir ed bendisyon na Dios. Matukotukoy, sarayan panuulop so nidesigna bilang “saray nigetar a fiesta nen Jehova,” a mangiyaapasakey na imano’d panagdayew ed Dios. (Levitico 23:2, 4) Saray debotadon bibii so inmatendi met a kaibay arum niran membro na pamilya.—1 Samuel 1:3-7; Lucas 2:41-44.
8. Panon a papaneknekan na Salmo 84:1-12 so kaimportantian na panagdayew ed si Jehova?
8 Mapatnag a binidbir na apuyanan a salmista no kaunongan kaimportanti so panagdayew ed bilay da. “Agayla ya aaroen so tabernaculom, O Jehova na saray ejercitos!” inkanta na ilalak nen Kore. Maseguron aliwa lambengat a sakey a paalagey so pandadayewan da. Imbes, intagey daray boses da bilang panangigalang ed si Jehova a Dios, ya iyaabawag: “Say pusok tan laman ko tatawagen to so Dios a mabilay.” Say impanlingkor na Levitas so angitarok na baleg a liket ed sikara. “Mapalar so saray manaayam ed abung mo”! inyabawag da. “A sikara idayew da ka ni.” Diad katuaan to et amin ya Israel so makapankanta: “Mapalar so too ya wala ed sika so biskeg to; a dia ed puso to so kawalaan na saray daladalan. . . . Onla ra manlapu ed biskeg ya anga ed biskeg; balang sakey ed sikara ompatnag ira ed arapan na Dios ed Sion.” Anggaman say panbaroy na sakey ya Israelita a mamaarap ed Jerusalem so andukey tan makapakesaw, say biskeg to so napasimbalo sano nasabi to lay kabisera. Say puso to so napno na gayaga legan ya ipaparungtal to so pribilihyo ton panagdayew ed si Jehova: “Ta say sanagew ed loob na saray saban mo magmaong ni nen say sanlibo. Labalabay ko ni ompasen a sakey a bantay-pinto ed abung na Dios ko, nen say manayam ed alolong ya abel na kabaglan. . . . O Jehova na saray ejercitos, mapalar so too a manmatalek ed sika.” Saratan a balikas so mangipaparungtal ya iyuuna na saray Israelita so panagdayew ed si Jehova.—Salmo 84:1-12.
9. Anto so agawa ed nasyon na Israel sanen sinmaew ya amasiansian manuna ed panagdayew ed si Jehova?
9 Makapaermen, sinmaew so Israel ed panamasiansian manunaan ed tuan panagdayew. Inabuloyan dan pinaletey na panagdayew ed palson dirios so seseg da ed si Jehova. Diad ontan et inkaindan ira nen Jehova ed saray kabusol da, ya inabuloyan iran nadakep na Babilonia. Sanen sikaray apapawil ed dilin dalin da kayari na 70 a taon, intarok nen Jehova ed Israel so makasagyat iran bilin manlapud matoor iran propeta a di Ageo, Zacarias, tan si Malaquias. Say saserdoten si Esdras tan si Gobernador a Nehemias so anagyat ed totoo na Dios a mangipaalagey-lamet ed templo tan mangiletneg lamet na tuan panagdayew diman. Balet legay ilalabas na saray siglo, say tuan panagdayew so ginawan segunda ed nasyon.
Inmunan-Siglon Seseg Parad Tuan Panagdayew
10, 11. Anto so pasen na panagdayew ed si Jehova ed bilay na saray matoor sanen wadiad dalin si Jesus?
10 Insan, diad aturon panaon nen Jehova, pinmatnag so Mesias. Saray matoor a sinansakey so maniilalo’d si Jehova parad kililiktar. (Lucas 2:25; 3:15) Say Ebanghelyo nen Lucas so diriktan manedeskribe ed 84-años ya Ana bilang sakey a balo ya “ag la onaalis ed templo a manlilinkor ed labi tan agew pati panagayunal tan pikakasi.”—Lucas 2:37.
11 “Say kanen ko,” kuan nen Jesus, “so pangawak na linawa na saman so angibaki ed siak, tan manumpal na kimey to.” (Juan 4:34) Tandaan no panon so inkiwas nen Jesus sanen inarap toray managsalat na kuarta diad templo. Impakalimpog toray lamisaan ontan met iray yurongan na saray managtagilako na malapati. Isasalaysay nen Marcos: “Ag inaboloyan [nen Jesus] so siopaman a too ya mangitarok na boksot ed templo. Tan nanbangat, tan inkuan to ed sikara, Agta nisulat, Say abung ko natawag ya abung na pikakasi nipaakar ed saray amin a naciones? balet sikayo sikato’y ginawa yo a sakey a balaong na mamatakew.” (Marcos 11:15-17) On, ag-anggan inabuloyan nen Jesus a dalanan na siopaman so loob na templo pian makapanapora sano walaay aawiten a bengabengatla ed basil na syudad. Saray kiwas nen Jesus so mamabiskeg lambengat ed inter ton simbawa ed inmuna: “Ingen anapen yo ni’n onona so panarian, tan say inkatonong [na Dios].” (Mateo 6:33) Intilak nen Jesus ed sikatayoy maabig ya alimbawa diad panangiter ed si Jehova na nikadkaduman debosyon. Talagan inagamil to no antoy impulong to.—1 Pedro 2:21.
12. Panon ya indemostra na saray babangatan nen Jesus so panangiyuna ed panagdayew ed si Jehova?
12 Inletneg met nen Jesus so padron parad babangatan ton tumboken diad impanumpal to’d kimey ton ibulos iray pakaskasi, balet ta matoor, iran Judio manlapud saray pabelat na palson relihyoson ag-agamil. (Lucas 4:18) Diad katutulok ed ganggan nen Jesus a manggawa na babangatan tan bautismoan ira, saray inmunan Kristiano so sipapakpel ya angiyabawag ed linawa nen Jehova nipaakar ed apaolin Katawan da. Si Jehova so aliketan a tuloy ed panangiyunan ginawa ra ed panagdayew ed Sikato. Kanian, say dilin anghel na Dios so mamilagron angibulos ed kinen apostol Pedro tan Juan manlapud inkipangaw tan binilin iran: “Nakila, et alagey kayo ed templo, tan salitaen yo ed saray ombaley so amin a salita na sayan Bilay.” Lapud apabiskeg lamet, sikaray tinmulok. Inagew-agew, namparan diad templo na Jerusalem tan diad kabkaabungan et “ag ira tinmonda a nanbabangat tan nanpupulong a si Jesus et Cristo.”—Gawa 1:8; 4:29, 30; 5:20, 42; Mateo 28:19, 20.
13, 14. (a) Nanlapulad inmunan Kristianon panaon, anto so sasalien nen Satanas a gawaen ed ariripen na Dios? (b) Anto so intultuloy na matoor ya ariripen a gawaen?
13 Legan ya ompepetang so isusumpa ed panagpulong da, inwanwan na Dios so matoor ya ariripen ton mangisulat na nipanpanaon a simbawa. “Imatalek yo ya amin ed sikato so kapagaan yo; ta sikato asikasoen to kayo,” insulat nen Pedro ag-abayag kayari 60 K.P. “Mandangka kayo, manbantay kayo; ta say kabusol yo, say diablo, wala ed kaliberliber yo ya singa omoang a leon a mananap na buagen to: A sikato so sumpaen yo na mabiskeg a pananisia yo, amta yo a peteg ta saratan a kairapan nagawa met ira ed utel na agagi yo ya wala ed mundo.” Saray inmunan Kristiano so maseguron akaromog na panamaseguro ed saraman a salita. Kabat da a kayari maganon impanirap da et sumpalen na Dios so panagsanay da. (1 Pedro 5:7-10) Legan na saraman a kaunoran ya agew na Judion sistema na bengabengatla, saray tuan Kristiano so nitandoro ed maaron panagdayew ed si Jehova ed balon alagey.—Colosas 1:23.
14 Unong ed impasakbay nen apostol Pablo, say apostasya, say iyaarawi ed tuan panagdayew, so agawa. (Gawa 20:29, 30; 2 Tesalonica 2:3) Dakel iray atugyop ya ebidensya ed sarayan agawa ed kaunoran iran dekada nen inmunan siglo. (1 Juan 2:18, 19) Tinmalona si Satanas ed impangisibwag na alig-alig a Kristiano ed limog na saray tua, a manggagawan mairap a bidbirey “zizanas” manlapud saray singa-trigon Kristianos. Anggaman ontan, diad inlabas na saray siglo, inyuna na arum so panagdayew ed Dios, anggan diad niiyan ed kaatapan so bilay da. Balet aliwan anggad saray kaunoran na dekada na “aturon panaon na nasyones” a say Dios so anugyop ed ariripen to pian mangitandoro ed tuan panagdayew.—Mateo 13:24-30; 36-43; Lucas 21:24, NW.
Nipaatagey a Panagdayew ed si Jehova Natan
15. Nanlapulad 1919, panon a saray propesiya na Isaias 2:2-4 tan Miqueas 4:1-4 so nasusumpal?
15 Nen 1919, inikdan nen Jehova na pakayari so alanaan a nakdaan a mangipakurang na mapkel a panagtasin kampanya ed sankamundoan ya angipaatagey ed panagdayew ed tuan Dios. Diad idadagsa na simbolikon ‘arum a carnero’ manlapud 1935 ya anggad natan, say agos na totoo a diad espiritual et ontatakdang ed “palandey na abung nen Jehova” so ondarakel lan ondarakel. Nen 1993 a serbisyon taon, 4,709,889 a Tastasi nen Jehova so angigalang ed sikato diad pangiimbita’d arum a miulop ed nipaatagey a panagdayewan ed sikato. Agaylan nidumaduma iya ed abebbeban espiritual a kipapasen na sektarianismo ‘iran pokdol’ na sankamundoan ya imperyo na palson relihyon, a sankanengneng ed Kakristianoan!—Juan 10:16; Isaias 2:2-4; Miqueas 4:1-4.
16. Anto so kaukolan a gawaen na amin ya ariripen na Dios nisesengeg ed nipasakbay ed Isaias 2:10-22?
16 Momoriaen na saray patumbok na palson relihyon iray simbaan tan katedral da, tan anggan saray pari ra, bilang “marangal,” a papagalangan ira na engranden titulo tan kagalangan. Balet imanoey impasakbay nen Isaias: “Saray malangas a kanenengneng na too napaabeba, tan saray karangalan na totoo nipadakmomo, et si Jehova lambengat sikato naani napaatagey ed saman ya agew.” Kapigan iya? Diad panaon na asingsingger a baleg a kairapan sano “saray talintao naekal ira naani a sigpot.” Nisesengeg ed kinaasingger na satan a makapataktakot a panaon, amin ya ariripen na Dios so kaukolan a seryoson mangusisa no antoy pasen na panagdayew ed si Jehova ed bilay da.—Isaias 2:10-22.
17. Panon ya idedemostra natan na ariripen nen Jehova so panangiyuna ed panagdayew ed si Jehova?
17 Bilang sakey ya internasyonal ya impanaagi, saray Tasi nen Jehova so kabkabat ed seseg da ed panangipulong na Panarian. Say panagdayew da so aliwan paspasaray a relihyon, a nigana ed loob na sakey ya oras odino onsulok na daiset ed sakey simba. Andi, noagta satan so legay bilay. (Salmo 145:2) On, nen imbeneg a taon et masulok a 620,000 a Tastasi so angiyarunsa ed saray kurang na bilay da pian mibiang ed sigpot-panaon a Kristianon ministeryo. Say arum so maseguron agmangibabaliwala ed panagdayew ed si Jehova. Satan so manunan napatnagan ed namparan inagew-agew a pitotongtong da tan ed mapublikon panagpulong da, anggan sikaray kakaukolanen na saray obligasyon da ed pamilyan mankimey ya impasya ed trabaho ra.
18, 19. Mangibaga na saray alimbawa na panamaseseg a naawat yo ed impanbasa yo ed saray istorya’d bilay na Tastasi?
18 Saray istoryay bilay na Tastasi a nipalapag ed Say Panag-Bantayan so mangitatarok na aralem a pakatalos ed saray paraan na nanduruman agagin lalaki tan bibin nansiansian angiyuna ed panagdayew ed si Jehova ed saray bilay da. Sakey a kalangweran ya agin bii ya angidedika ed bilay to ed si Jehova a manedad na anemira so angipasen ed misioneron serbisyo bilang kalat to. Sikayoran kalangweran ya agagin lalaki tan bibii, anton kalat so napili yon ontulong ed sikayon makapansiansian mangiyuna ed panagdayew ed si Jehova ed saray bilay yo?—Nengnengen so artikulon “Pursuing a Goal Set at Six Years of Age,” diad The Watchtower na Marso 1, 1992, pahina 26-30.
19 Sakey a balon maedad lan agin bii so mangitatarok na sananey nin maabig ya alimbawa ed panangipasen ed dugan pasen na panagdayew ed si Jehova. Akala na baleg a panamaseseg a mansungdo manlapud saramay tinmulong ed sikaton manaral ed katuaan. Sikara so “pamilya” to. (Marcos 3:31-35) No aromog yo so inkasikayo ed mipadpara iran sirkumstansya, kasin awaten yo so suporta tan tulong na saray mas malangwer ed kongregasyon? (Ipangasin imanoen no panon a si Sister Winifred Remmie so angibalikas ed inkasikato diad “I Responded in Harvesttime,” ya impalapag ed The Watchtower na Hulyo 1, 1992, pahina 21-3.) Sikayoran sigpot-panaon ya ariripen, idemostran say panagdayew ed si Jehova so talagan manunaan ed kabibilay yo diad sipapaabeban panaglingkor inerman so pakaasainan yo, a mapasakup tan mabulos ed teokratikon panangiwanwan. (Ipangasin imanoen so alimbawa nen Brother Roy Ryan, unong a nisalaysay ed artikulon “Sticking Close to God’s Organization,” ed The Watchtower na Disyembre 1, 1991, pahina 24-7.) Tandaan a sano iyuuna tayo so panagdayew ed si Jehova, walaan tayo na panamaseguro ya asikasoen to itayo. Agtayo kaukolan so magmaliw a mapaga nipaakar ed saray pankaukolan ed bilay. Saray eksperiensia nen Sister Olive tan Sonia Springate so mangiyiilustra ed saya.—Nengnengen so artikulon “We Have Sought First the Kingdom,” ed The Watchtower na Pebrero 1, 1994, pahina 20-5.
20. Antoran mitunosan a tepet so nepeg ya itepet tayo ed inkasikatayo natan?
20 Sirin, parad balang sinansakey, agta nepeg a tepetan tayo so inkasikatayo na pigaran matudion tepetepet? Anto so pasen na panagdayew ed si Jehova ed bilay ko? Kasin siak so manbibilay unong ed dedikasyon kon gawaen so linawa na Dios ed sankaabigan ya abilidad ko? Diad antoran pasen ed bilay ko a napaaligwas ko? Say sakey ya aralem a panangunsidera ed onggendan ya artikulo so mangiyopresi ed pankanawnawan mangipatnag no panon ya usaren tayoray kayarian tayo pian makapipakna ed pinili tayon manunaan ed bilay tayo—say panagdayew ed Soberanon Katawan a Jehova, say maaron Ama tayo.—Eclesiastes 12:13; 2 Corinto 13:5.
Diad Panrepaso
◻ No nipaakar ed panagdayew, anto so kakaukolanen nen Jehova?
◻ Diad anto so kinanaan na tabernakulo bilang panonot?
◻ Nen inmunan siglo K.P., sioparay matalonggaring ya alimbawa ed inka-seseg parad tuan panagdayew, tan panon?
◻ Nanlapulad 1919, panon a nipaatagey so panagdayew ed si Jehova?