Say Sankabalgan a Toon Nambilay ed Kapiganman

Kapitulo 79

Sakey ya Adesyang a Nasyon, Balet Aliwan Amin

Ag-abayag kayari impisingbatan nen Jesus ed saramay nantipon ed paway na abung na sakey a Pariseo, pigara ed sikara so angibaga ed sikato “[nipaakar] ed saray Galileos, ya inlaok nen Pilato so dala ra ed saray bagat da.” Sarayan taga Galilea so nayarin saraman so pinatey sanen nilibon Judio so nanprotesta ed panangusar nen Pilato ed kuartan manlapud panangisimpenan na kuarta ed templo pian mamaalagey na sakey a paralanan na danum pian mangitarok na danum ed Jerusalem. Saraman a mangisasalaysay na sayan pamaakaran ed si Jesus so nayarin mangisusuheri a saray taga Galilea so nanlikna na kalamidad lapud dili ran marelmeng iran gawa.

Anggaman ontan, sikara so impetek nen Jesus, ya itetepet: “Isipen yo a [sarayan] Galileos sikara so managkasalanan a labas nen saray amin a Galileos, ta intepel da so saraya’n bengatla? Andi,” inyebat nen Jesus. Insan inusar nen Jesus so agawa pian pasakbayan iray Judio: “No ag kayo manpataoli, natawtaw kayo met ya amin ed ontan.”

Diad pantutultuloy, impanonot nen Jesus so sananey a lokal a trahedya, anganko ta miulibay met ed panagpaalagey na paralanay danum. Intepet to: “Ono saraman so labinwalo, a sikara’y atapilan na ilang ed Siloe, et pinatey to ra, isipen yo a sikara so akautang a labas nen saray amin a too a manaayam ed Jerusalem?” Andi, saman so aliwan lapud inkauges na sarayan totoo a sikara so atigway, kuan nen Jesus. Imbes, “panaon tan ag-iilaloan a nagawa, NW” so inkalapagan a responsabli ed satan iran trahedya. Anggaman ontan, inusar lamet nen Jesus so agawa pian mamasakbay: “No ag kayo manpataoli, natawtaw kayo met ya amin ed ontan.”

Insan intultuloy nen Jesus so pangiter na sakey a matukoy ya ilustrasyon, ya ipapaliwawa: “Sakey a too walaan na sakey a kiew ya higos ya intanem to ed cauvasan to; et linma a nananap na bunga to, et ag akaromog. Et inkuan to ed manbabantay na kauvasan, Nia, saraya a talo’y taon linlinmaak dia a mananap na bunga ed saya a kiew ya higos, et agak makaromog: popoen mo; akin et makaskasbel ed dalin? Et nen inmebat kuan to ed sikato, Katawan, paolian mo ni ed saya a taon met, anga ed nabayoboan ko, tan nainan ko na pamabona: Et no manbunga ed saman la, maong; et no andi, popoen mo.”

Diad loob na masulok a taloran taon, sinali nen Jesus so mamayubo na pananisia ed limog na Judion nasyon. Balet pigaran lasus lambengat a babangatan so nayarin nibilang a bunga na saray kimey to. Natan, legan na sayan mikapat a taon na ministeryo to, sikato so mangipapasya ed gunaet to, simbolikon mamabayubo tan mangiiyan na guano ed paliber Judion igos a kiew diad impasyan panagpulong tan panagbangat ed Judea tan Perea. Ingen ta anggapoy agawa! Agnilabay na nasyon so magbabawi tan sirin et akadasig ed kadederal. Sakey lambengat a nakdaan na nasyon so kinmiwas.

Ag-abayag kayari na saya et si Jesus so manbabangat ed sakey a sinagoga diad sakey a Sabaton. Diman et sikatoy akanengneng na sakey a biin, lapud pamapairap na sakey a demonyo, so abukot ed 18 taon. Siaabagey, inkuan nen Jesus ed sikato: “Bii, nabolos ka ed sakit mo.” Diad saman et intapew toy lima to ed sikato, tan tampol a sikato so akaunat tan ginmapon angigloria ed Dios.

Anggaman ontan, say manangimaton ya opisyal so masanok. “Wala so anem agew a makana’n pankimeyan na totoo,” improtesta to. “Dia ed saraya sirin so idago yo tan natambal kayo, et aliwa’n dia ed agew na sabaton.” Say opisyal sirin so mamibidbir ed pakayari nen Jesus a manpaabig balet mangokondena ed totoo parad ipepegdat da pian napaabig ed Sabaton!

“Sikayo [a] pakalala,” inyebat nen Jesus, “sakey tan sakey ed sikayo, agto kasi okbaran ed agew na sabaton so baka to ono asno to ed atotong, tan yakar to’n painumen? Et saya a bii, bangta anak nen Abraham, sikato a binalor nen Satanas, nia, sarayan labinwalo a taon, ag kasi manepeg ya okbaran ed saya a [balor], ed agew na sabaton?”

Bueno, diad impakadngel ed saya, saramay onsusumpa ed si Jesus so abaingan. Anggaman ontan, nangayaga so karaklan ed amin a maglorian bengatla ya anengneng dan ginawa nen Jesus. Bilang ebat et inulit nen Jesus so duaran mapropetikon ilustrasyon nipaakar ed Panarian na Dios, saraman so insalaysay to manlapud sakey baloto ed Dayat na Galilea a ngalngalin sakey taon ed asasakbay. Lucas 13:1-21; Eclesiastes 9:11; Mateo 13:31-33.

▪ Antoran trahedya so asaglawi’d dia, tan anton leksyon so impabitar nen Jesus manlapud sikara?

▪ Anton panangiyaplika so nayarin nagawaan nipaakar ed agmabungan igos a kiew, ontan met ed impanalin pagmaliwen a mabunga?

▪ Panon a binidbir na manangimaton ya opisyal so abilidad nen Jesus a manpaabig, ingen panon ya inwalwal nen Jesus so pansimpisimpitan na laki?