Say Sankabalgan a Toon Nambilay ed Kapiganman

Kapitulo 78

Mansiansian Akaparaan!

Kayarin pinasakbayan iray karaklan nipaakar ed inkaagum, tan panaalwaren iray babangatan to nipaakar ed panangiter na alabas a panangimano ed material iran bengatla, impaseseg nen Jesus: “Agkayo antakot, daiset a papastolan; ta kaliktan na Ama yo ya iter ed sikayo so panarian.” Imparungtal to sirin a melag lambengat a tuloy a bilang (akabatan ed saginonor bilang 144,000) so onla ed mangatatawen a Panarian. Karaklan ed saramay mangawat na andi-anggaan a bilay so magmaliw a mangaraldalin a sakop na Panarian.

Agaylan makapakelaw a langkap, ‘say panarian’! Diad panedeskribi ed manepeg a magmaliw a kiwas na babangatan diad pakaawat ed satan, impaseseg nen Jesus ed sikara: “Ilakoyo so wala ed sikayo, et mamayabol kayo.” On, nepeg ya usaren daray kayarian da pian nagunggunaan daray arum ed espiritual tan diad ontan et makapangipaalagey na “sakey a kayamanan ya ag onkulang ed saray tawen.”

Insan pinaseseg nen Jesus iray babangatan to a mansiansian akaparaan parad ipapawil to. Inkuanto: “Balkesan yo so saray awak yo, tan akaselsel so saray silew yo; et sikayo komon so singa saray totoo a manaalagar ed katawan da, no kapigan so ipawil ton manlapu ed bansal; pian, sano ompawil et ontoktok, tampol a sikato so lukasan da. Mapalar so saray ariripen, a sano onsabi katawan da naromog tora a manpupuyat: tua kuan ko ed sikayo, a sikato lanlamang manbalkes, tan payorongen tora ed pananganan, et onla tan manlinkor ed sikara.”

Diad sayan ilustrasyon, say inka-maparaan na ariripen diad ipapawil na katawan da so nipapanengneng diad pangililislis ed andukey a balabal da tan ipapandalem iraya ed saray balkes da tan diad pantutultuloy dan pangasikaso ed saray responsabilidad da anggad labi diad liwawa na alarakan-a-maong iran lampara. Impaliwawa nen Jesus: ‘Sano onsabi katawan ed komaduan panagbantay [manlapud ngalngali alas nueve ed labi anggad pegley labi], tan no dia et komatlo [manlapud pegley labi anggad ngalngali alas tres ed kabuasan], tan naromog toran akaparaan, maliket ira!’

Tinumangan na katawan so ariripen to ed nikadkaduman paraan. Sikara so pinatameg to diad dulang tan ginmapon nanserbi ed sikara. Sikara so ipapasen to, aliwan bilang ariripen, noagta bilang matoor a kakaaro. Agaylan maabig a tumang nisesengeg ed tuloytuloy a kimey dan sanlabi lapud panatalaran da ed isabi na katawan da! Sinampotan nen Jesus: “Sikayo met, mansiansian akaparaan, lapud diad oras ya agyo iilaloan et maseguron say Anak na too so onsabi,” NW.

Intepet natan nen Pedro: “Katawan, salitaen mo ed sikami so saya’n alimbawa, ono ed amin met?”

Imbes ya onebat a deritsaan, si Jesus so angiter na sananey ya ilustrasyon. “Siopa sirin so managpaga a napanmatalkan tan [makalakal],” tepet to, “ya inyan na Katawan to a manbantay ed sankaabungan to, pian sano kanepeganto iter to ed sikara so nabebetangan dan tagano? Mapalar so satan ya aripen, a sano onsabi so katawan to naromog to a mangagawa na ontan. Dia ed tua ikuan ko ed sikayo, a sikato so igaton to’n manbantay ed amin a kayarian to.”

Malinew a say “katawan” et si Jesu-Kristo. Ilalaman na “managpaga” so “daiset a papastolan” na babangatan bilang sakey ya atugyop ya ulop, tan say “sankaabungan” so ontutukoy ed sayan parehon grupo na 144,000 ya mangawat na mangatatawen a Panarian, balet sayan balikas so mangipapabitar na kimey da bilang indibidual. Say “kayarian” ya angigangganan ed matoor a managpaga ya asikasoen et say interesis na maarin katawan ed dalin, a mangilalaktip ed mangaraldalin iran uuleyan na Panarian.

Diad pangitutuloy na ilustrasyon, impabitar nen Jesus so posibilidad ya aliwan amin a membro na satan a managpaga, odino aripen, a klase so magmaliw a matoor, ya ipapaliwawa: “No satan ya aripen ikuan to ed puso to, Say katawan ko mantantan ya onsabi; et gapoan ton kabilen so saray ariripen a lalaki tan bibii, et mangan tan oninum, tan manbuanges; onsabi katawan na satan ya aripen dia ed agew ya agto ilaloan . . . , et sikato so leweten to na masakit.”

Impaimano nen Jesus a say isasabi to so angitarok na makasubok a tuloy a panaon parad saray Judio, legan a say arum so mangaawat tan say arum so mangipupulisay ed bangabangat to. Diad loob na taloran taon ed asasakbay, sikato so binautismoan ed danum, balet natan et say bautismo to ed patey so lalon manasingger ed kasampotan, tan singa inkuanto: “Siak so nagogonigon anggad satan so nasumpal!, NW”

Kayarin impaarap irayan balikas ed saray babangatan to, si Jesus so nansalita lamet ed karaklan. Sikatoy nantagleey ed nampatunger a panangipulisay da ed pangawat ed malinew ya ebidensya na pakabidbiran to tan say kaimportantian to. “Sano nanengneng yo so lurem ya onalagey ed sagur,” inkuanto, “kuan yo a tampol, Mayamaya so onsabi; et ontan so nagawa. Et no sakey a dagem ya abagat so onsibok, kuan yo Makaatong a petang so wala naani; et sikato so nagawa. Sikayo’n pakalala, amta yo ya ipatalos so nengneng na dalin tan tawen; balet panon ya agyo amta ya ipatalos so saya’n panaon?” Lucas 12:32-59.

▪ Pigara so manugyop na “daiset a papastolan” tan anto so naawat da?

▪ Panon ya indanet nen Jesus so pankaukolan parad ariripen to ed pagmaliw ya akaparaan?

▪ Diad ilustrasyon nen Jesus, siopa so “katawan,” say “managpaga,” say “sankaabungan,” tan say “kayarian”?