Say Sankabalgan a Toon Nambilay ed Kapiganman

Kapitulo 77

Say Singbatan ed Tawir

Mapatnag ya amta na totoo a si Jesus so akirungo diad abung na Pariseos. Kanian sikara so nantitipon a nilibo ed paway tan nanalagar ed ipaway nen Jesus. Aliwan singa saray Pariseon onsusumpa ed si Jesus tan manasalin maneral ed sikato ed pangibaga na bengatlan aliwa, sigugunaet ya ondengel so totoo ed sikato tekep na panangapresya.

Diad iyaarap ya ununa ed saray babangatan to, inkuan nen Jesus: “Manlikas kayo ed levadura na saray Fariseo, a sikato so pakalala.” A singa nipanengneng legan na panangan, say interon relihyoson sistema na saray Pariseo so napno na pansimpisimpitan. Balet anggaman say karelmengan na saray Pariseo so nayarin iyamot diad pangipanengneng na inkasanto, diad kaunoran et satan so niwalwal. “Angapo so asakbongan,” kuan nen Jesus, “ya ag nipatnag: tan niamot, ya ag nakabatan.”

Intultuloy nen Jesus ya uliten so panamaseseg ya intarok to ed saray 12 sanen sikara so imbaki to ed sakey a panagpulong a baroy ed Galilea. Inkuanto: “Ag kayo antakot ed saray mamatey na laman, et kayari to angapo la so arum a nayarian da a gawaen.” Lapud aglilingwanan na Dios so anggan sakey ya anuyaw, pinaseguroan nen Jesus iray patumbok to a sikaray aglingwanan na Dios. Inkuanto: “Sano idongora kayo ed saray sinagoga, tan ed saray pangolo, tan ed saray makaoley, . . . say Espiritu Santo ibangat to kayo naani ed satan met lanlamang ya horas no anto so nepegyo’n salitaen.”

Sakey a laki manlapud karaklan so nansalita. “Managbangat,” kerew to, “ibagam ed agik ya yapagantoak na tawir.” Say Ganggan nen Moises so mangisisipan a say panguloan ya ilalak a laki so mangawat na duaran parte na tawir, kanian nepeg ya anggapoy rason parad suppiatan. Balet say laki so mapatnag mankaliktan na nagkalalo ni nen say legal ya apag ton tawir.

Makatunongan ya agnilabay nen Jesus so nalanor. “Too, siopa so nangawa ed siak a mangokom ono mangapag ed sikayo?” tepet nen Jesus. Insan intarok to iyan importantin simbawa ed karaklan: “Nengnengen yo, et manlikas kayo ed amin a kaagapan: ta say bilay na too andi ed karakel na saray bengatla a bebenbenan to.” On, anggan panon lay karakel a niwalad sakey a too, genda-gendat a sikatoy ompatey tan taynanan to itan ya amin. Pian idanet iyan katuaan, ontan met ed pangipanengneng na kakulangkulangan ed isaew a mamaaligwas na maabig a talindeg ed Dios, si Jesus so angusar na ilustrasyon. Impaliwawa to:

“Say dalin na sakey a too’n mayaman binmunga na dakel: Et minolimoli to ed loob ton dili, a kuan to, Anto so gawaen ko naani, ta angapo so pangyatolan ko ed saray bungak? Et inkuan to, Saya so gawaen ko: igebak so saray kamalir ko, et ipaalagey ko so babaleg; et yatol ko ya amin diman so trigok tan saray kayamanan ko. Et kuan ko naani ed kamarerwak, Kamarerwa, dakel so saray kayamanan mo ya inyatol nipaakar ed dakel a taon; manpainawa ka, mangan ka, uninum ka, manliket ka. Ingen inkuan ed sikato na Dios, Sika makulangkulang, natan a labi nakerew ed sika so kamarerwam; et saray bengatla ya intadiam, siopa naani mankayarian ed sikara?”

Diad impanampot, inkuan nen Jesus: “Ontan so mantipon na kayamanan nipaakar ed sikato, et aliwa a mayaman dia ed Dios.” Bangta saray babangatan so nayarin agnatukso ed kakulangkulangan a panangisimpen na kayamanan, lapud inagew-agew iran aasikasoen ed bilay et sikaray mainomay a nisuawi manlapud sigpot-kamarerwan serbisyo ed si Jehova. Kanian inusar nen Jesus so pankanawnawa pian uliten so maabig a simbawan intarok to a ngalngalin sakey tan kapalduay taon ed asasakbay diad Sermon ed Palandey. Diad iyaarap ed saray babangatan to, inkuanto:

“Kanian kuan ko ed sikayo, Ag kayo mapaga ed bilay yo, no anto’y kanen yo; tan angan nipaakar ed laman yo, no anto so kawesen yo. . . . Morekdek yo ’ray wawak, ya ag ira mantanem, tan ag ira manani; ya andian ira na pantiponan ono kamalir; et tataganoen ira na Dios. . . . Nonoten yo so saray lirio, no panon so katotobo ra: ag ira mansagpot, tan ag ira maninaramey; angan ontan kuan ko ed sikayo, Angan si Salomon dia ed amin a gloria to ag akawesan a singa sakey ed saraya. . . .

“Agyo sirin kapagaan so kanen yo, ono say inumen yo, tan agyo met panduaruaen so linawa yo. Ta amin so saraya a bengatla anapen na saray naciones ed mundo: balet say Ama yo amta to a kaokolan yo so saraya’n bengatla. Bangbalet anapen yo so panarian to, et saraya a bengatla niarum ira ed sikayo.”

Nagkalautla legan na panaon na kairapan ed ekonomya a saray salita nen Jesus so walaan na maapit a panangunsidera. Say toon magmamaliw ya alabas a mapaga nipaakar ed material iran pankaukolan to tan onggapon onkesay ed espiritual iran gegemtan so, diad katuaan, mangipapanengneng na sakey a kakulangay pananisia ed abilidad na Dios a mangitarok parad ariripen To. Lucas 12:1-31; Deuteronomio 21:17.

▪ Akin, a nayarin nantepet imay laki nipaakar ed tawir, tan anton simbawa so intarok nen Jesus?

▪ Anton ilustrasyon so inusar nen Jesus, tan anto so ipapabitar to?

▪ Anton simbawa so inulit nen Jesus, tan akin a satan so manepeg?