Saray Nansumpal ed Gilead Magunaet a Mangipalaknab ed Maong a Balita

“SAY sankamakapakelawan a bengatlan naisip tayo.” Ontan so liknaan nen Anders tan Amalia Groth ed inkipasal da parad inka-misionero. Imbalikas daray liknaan na amin a 48 nansumpal ed koma-97 a klase na Watchtower Bible School of Gilead diad impangikuan nin: “Say panangipasal na Gilead so mamabayubo tan mangipaparaan ed sikami, kanian sigugunaet kamin onla ed saray balon asainmin mi.”

Natebek tayo iyan gayaga legan a mangokomento iray estudyante ed programa na impansumpal; 6,240 so nantitipon nen Setyembre 4, 1994, parad sayan ebento.

“Si Theodore Jaracz na Mananguley ya Ulop so angilukas na programa diad impansalita ed teman ‘Pakakabangatan ed si Jehova,’” kuan nen David Abel tan say asawa ton si Kelli. “Say punton agmin balot nalingwanan et sanen inkuan Brother Jaracz: ‘Nepeg tayon bidbiren so inkamelag tayon dili no ipareng ed si Jehova,’ tan inyilustra itan diad panamegley na mabiskeg a leksion a naromog ed Job kapitulo 38 tan 39 na Job. Ispisipikon sinaglawi nen Brother Jaracz a legan a padadaaken mi pikakabat ed Biblia diad panamegley na Gilead School, agmi amta so ebat ed amin a tepet. Nepeg min itultuloy so panaral ed Salitay Dios.”

Natan si Christian tan Angele Coffy so nansalita: “Sikami asagyat ed paliwawan inter nen Max Larson ed teman, ‘Anto so Kablian na Maong a Letnegan?’ Agustoan mi so impangipareng to’d sikami ed sakey a paalagey a mankakaukolan na aralem a pundasyon diad anawet a dalin ta pian makapansiansia anggan walay yegyeg. Diad siseseet a panaral et nabayuboan mi so mas maapit a siglaotan ed si Jehova tan nibase mi pananisia mi ed aralem a pikakabat ta pian makapansiansia kami ed panaon na kairapan.”

“Say paliwawa nen Milton Henschel, presidenti na eskuelaan, ed teman ‘Saray Lawak So Amputi La Parad Panagani’ so natandaan ed andukey a panaon,” kuan nen Gary tan Lynn Elfers. “Say manunan kasulatan et say Juan 4:35-38, so angidanet ed pribilihyon niwalad sikami ed iloob ed sakey a lawak a tinaneman la na saray komikimey ed apalabas. Saya so managyat ed sikamin mankimey tekep na inkaganatan.” Mipapakna ed saya, si Jan tan Sirpa Vaahtola diad impangikuan: “Sinagyat nen Brother Henshel so pitamitam mi nipaakar ed nagawa nin panagani diad impangiter ed kaplesan a report manlapud Baltic States. Say indaak diad Estonia et 51 porsiento, diad Latvia et 106 porsiento, tan diad Lithuania et 51 porsiento. Agaylan makapaliket! Saray agagi diman so onkekerew ed Katawan a mangibaki ni na saray komikimey. Sikami so nagkalautlan aliketan ed impakadngel ed saya, unong ta say asainmin mi et diad Estonia.”

“Tinmumbok a nampaliwawa si Joel Adams ed teman ‘Manmatalek ed si Jehova,’” nanonotan nen Kevin tan Evelyn Cortina. “Sinimbawa to kamin agbalot iisipen a no maminsan et makapanmatalek kami ed si Jehova tan no maminsan et makapanmatalek ed dilin kakabatan mi. Diad asainmin mi et nidunget kami ed dakel ya angat​—bunigas, tagano, lenguahe, kustombre, tan arum nira. Amin iratan et mankaukolan na panmatalek mi ed si Jehova.”

Say tinmumbok ya ispeker et si Gerrit Lösch, membro na Mananguley ya Ulop, so anibukel na teman “Mantultuloy a Mangisindag ed Panangasi nen Jehova.” Inkuan nen Alen tan Ann Marie Gokavi: “Indanet to’d sikami a panangipatnag na Kristianon inkatatken so pangipanengneng na panangasi ed kapara iran misionero tan ed saramay panginanabangan mi na maong a balita. Saray asainmin ed biek-taew so mankakaukolan na sakripisyo, balet no anggapoy panangasi, say bagat mi so magmaliw a melmelag so kablian to.” (Mateo 9:13) Inyarum nen Peter tan Fleur Hupston: “Inkuan nen Brother Lösch a sikami so magmaliw a mapangasi ed saray agagi mi met, a nengnengen ira diad biek a dapag na largabista ed gendagendat a pannengnengan, a singa panangibaga, ta pian saray kakulangan da et agnapabaleg.”

“Si Jack Redford, sakey ed saray instruktor na Gilead, et tinumbokan to na teman ‘Kasin Ontulok Ka ed Panamaat?’” so atandaan nen Mickey tan Sherry Minsky. “Indanet to a say kinon so manggawan mairap ed pangawat na panamaat tan no sikami so masyadon masenti ed simbawa, nabalang miray gungguna to. Insan angiter na pigaran praktikal a suhestion ed panangawat na panamaat a nibase’d Tagleey 3:27-31.” Inyarum nen Charles tan Joan Held: “Mabetbet a sikatayo so agmikabat ed dili iran pakaluksoan tayo; kanian, nepeg tayon moriaen so panamaat bilang manangipakabat ed bengabengatlan agtayo kabat. Say panamaat odino simbawa manlapud si Jehova so sakey ya ebidensya na aro to parad sikatayo.”

“Sananey nin instruktor, si Ulysses Glass, so nansalita ed teman ‘Mangamor na Praktikal a Kakabatan a Mangitonton ed Bilay.’ Intepet to: ‘Panon yon iyaplika so naaralan yo?’” kuan nen Kenneth tan Lisbeth Ardkäll. “Insan sikatoy angiter na sakey ya ilustrasyon a nibased Uliran 3:24-26 nipaakar ed melag a rock badger tan no panon a si Jehova so sigpot ya anginlong ed satan parad kililiktar. Sikami, diad biek a dapag, so agnisipor a makabat, kanian kaukolan mi so mangisekar ed inkasikami pian mangamor na kakabatan. Kikinlongan kami nen Jehova na amin a bengatlan kaukolan pian nagawaan itan. Legan na iyaasingger ed si Jehova tan ed balang sakey diad aro, dakel so nasumpal mi.”

Manunan Paliwawa

“Si Brother Karl F. Klein, membro na Mananguley ya Ulop, so sisisimoon ya angunsidera ed koma-19 a Salmo ed sikami diad paliwawa ton ‘Sakey ya Alahas ed Limog na Saray Alahas,’” kuan nen Jay tan Gwen Abraczinskas. “Impabitar to so aralem ya apresasyon na salmistan David parad si Jehova tan say pankaliktan to ed Salitay Dios.” “Inapag nen Brother Klein so salmos ed taloran parte,” inkuan nen Keith tan Donna Hornback. “Parte 1 (Sal 19 bersikulo 1-6) so mangipapanengneng ed apresasyon nen David parad palsa na Dios, parte 2 (Sal 19 bersikulo 7-10) so mangibabalikas ed apresasyon to parad saray ganggan na Dios, tan parte 3 (Sal 19 bersikulo 11-14) so mangipapanonot ed sikami a singa si David, labay mi met so nawalaan na maong a siglaotan ed si Jehova.”

“Nangayagaan mi so punton say takot ed si Jehova so makana no kaukolan tayon paliisan so mauges. Saya so mangitotonton ed sikatayo a manggawa na dalisay ed imaton to,” kuan nen David tan Raylene Long. Pinekderan nen Frank tan Vibeke Madsen. “Saray komento nen Brother Klein nipaakar ed no panon a makagungguna iray panonot, ley, tan ganggan nen Jehova so matukotukoy a nasegek ed naaralan mi ed Gilead,” inkuan da. “Satan so nanggawa ed sikamin nagkalalon determinadon ontulok ed Salita na Dios diad arapen tan ipasen itan bilang sakey a simpenan na saray alahas.”

Kayari na sayan manunan paliwawa, inawat na saray estudyante iray diploma ra, tan saray asainmin da ed biek-taew so niyanunsio. Kayari na intermesyon parad merienda, amin so nandaragup parad sesyon ed ngarem. Saray nansumpal so akibiang ed panangebat na saray tepet a pinalesa legan na apatikey a Panagaral na Panag-bantayan.

“Insan tinumbokan na programa na estudyante a ‘Nipasal pian Magmaliw Iran Manangiyabawag na Panarian ed Amin a Dalin,’” natandaan ni nen Bob tan Shannon Lakatos. “Say inmunan kabiangan na programan niparungtal et saray eksperiensia na estudyante ed lawak a serbisyo legan na limay-bulan a kurso. Niyapasakey itan ed onsianon panangusar ed tepetepet ed ministeryo tayo. Sakey ya interbio so angipanengneng ed positibo iran paraan ed iyarap ed saray angat tan manguman-uman iran sirkumstansya na bilay na misionero. Saray taloran slide a presentasyon, ed Costa Rica, India, tan Malawi, so angiter ed sikami na bista ed sankamundoan ya organisasyon nen Jehova.”

“Say tinmumbok a drama, Magmaliw a Teokratiko, Aliwan Minumundo, so angiyilustra ed mauges ya epekto na pigaran minumundo, independentin-kanonotan na kakanayon ed sikatayo,” kuan nen Jesse tan Michelle Duncan. “Impanengneng to a saray Kristiano so nepeg a mamidbir ed saray totontonen tan panangiwanwan na Teokrasya bilang kapilitan tan makagungguna,” inyarum nen Wenzel tan Kelly Koula.

Sakey a kaunoran a kanta tan pikakasi so angitarok ed makapaliket a programa ed kasampotan. Legan a maniilalo iray nansumpal ed iyalis da parad saray asainmin da ed biek-taew diad 18 daldalin, saray kanonotan da so nibalikas a maong ed sayan panamatanir a komento nen Tommi tan Jael Kauko: “Sikami so magunaet a tuloy ya onla ed asainmin mi tan pian iyaplika so naaralan mi. Dakel a tuloy so naawat mi​—natan et betang mi met so mangiter.”

[Litrato ed pahina 26]

Koma-97 a Klase na Watchtower Bible School of Gilead

Diad listaan ed leksab, saray dasig so anumeroan manlapud arap a pabeneg, tan saray ngaran so akalista manlapud kawigi a manpakawanan ed kada dasig.

(1) Hong, J.; Hong, D.; Groth, A.; Cortina, E.; Lakatos, S.; Hornback, D.; Acevedo, L.; Coffy, A. (2) Elfers, L.; Gokavi, A.; Ardkäll, L.; Abraczinskas, G.; Knott, K.; Lizer, T.; Abel, K.; Abel, D. (3) Duncan, M.; Gokavi, A.; Held, J.; Hupston, F.; Lakatos, B.; Long, R.; Minsky, S.; Acevedo, E. (4) Ardkäll, K.; Kauko, J.; Vaahtola, S.; Cortina, K.; Carson, N.; Minsky, M.; Lizer, G.; Koula, K. (5) Duncan, J.; Abraczinskas, J.; Vaahtola, J.; Madsen, F.; Madsen, V.; Long, D.; Carson, C.; Elfers, G. (6) Kauko, T.; Hupston, P.; Held, C.; Groth, A.; Hornback, K.; Koula, W.; Knott, D.; Coffy, C.