Eskuelaan na Gilead​—50 Taon la tan Onaaligwas!

“DAKEL so pasen no iner a say panagtasi nipaakar ed Panarian so agni nilaknab a maong,” inkuan nen N. H. Knorr ed inmunan klase na Gilead nen Pebrero 1, 1943, say agew a panangilukas na eskuelaan. Inyarum to: “Talagan nilasus anggan nilibo nin totoo so nasabi no dakel so managkimey ed lawak. Diad panamegley na agkanepegan a panangasi na Dios, ondakel ni.”

Tan dinmakel iray managkimey​—minilyon ni! Saray manangipalapag na Panarian so dinmaak manlapud 129,070 diad 54 a daldalin nen 1943 ya anggad 4,472,787 diad 229 a daldalin nen 1992! Baleg so intulong na Eskuelaan na Gilead diad panagtasin nansumpal ed idadaak. Kayari 50 taon nantultuloy itan a walaan na manunan betang ed panangipasal na saray managkimey a misionero a manlingkor ed inerman a sikaray nakakaukolan diad lawak na mundo.

Nen Marso 7, 1993, walaray 4,798 a naimbitaan a bisita tan membro na pamilya’y Bethel ed E.U. a nandaragup ed Jersey City Assembly Hall, diad New Jersey, para’d pangraduar na koma-94 a klase. Saya so peteg a nikadkaduman okasyon ya angitarok met na pankanawnawan narepaso so 50 taon na Eskuelaan na Gilead. Kasin kaliktan yon amtaen so arum nipaakar ed programa?

Kayari na panangilukas a kanta, si George D. Gangas na Mananguley ya Ulop so angitarok na masimoon a pikakasi. Insan, kayari na panangilukas a balbalikas na tserman a si Carey W. Barber, saray mangraduar tan ed amin ya inmatendi so tinmalineng a maong ed nantutumbokan ya antikey iran paliwawa.

Si Robert W. Wallen so nansalitan inmuna, ed teman “Agyon Balot Bokbokor.” Diad ampetang a tonada, inkuanto: ‘Diad saray arapen ya agew, onlesa iray kipapasen ed bilay yo sano liknaen yon bokbokor yo, ya arawin tuloy manlapud pamilya tan kakaaro yo.’ Panon sirin a nibagan, “Agyon balot bokbokor?” Insalaysay to: ‘Lapud niwala ed balang sakey ed sikayo so posibilidad na biglaan a pitatalosan ed si Jehova a Dios.’ Pinaseseg toray mangraduar a pablien so pribilihyon panagpikasi tan usaren itan ya inagew-agew. Insan, singa si Jesus, sikara so makapangibagan, “Ag ko bokbokor.” (Juan 16:32) Agaylan makapaseseg iraman a salita ed saray mangraduar!

Say impanibukel na teman “Bembenan a Malet so Ilalo Yo” (a nibase’d inagew-agew a teksto na Marso 7), so sinmublay a sinalita nen Lyman A. Swingle na Mananguley ya Ulop ed pankaukolan na duaran kalidad​—panagsungdo tan ilalo. ‘Say panagbalaw, panamusol, gula, kipangaw, tan anggan ipapatey, so saray sengegan no akin a nakakaukolan na saray Kristiano so panagsungdo,’ inkuanto. ‘Anggapo so getar ed biskeg a labas nen say gendat ed matoor a Tastasi nen Jehova a naawat ed panaon na pankaukolan. Saya so peteg a makapaseguro, nagkalautla ed sikayon mangraduar.’ Komusta so nipaakar ed ilalo? ‘Say ilalo so nakakaukolan a tuloy,’ insalaysay to. ‘Unong a say hilmit et sasalimbengan to so ulo na mansulong, ontan met a say ilalo ed kilalaban so mamabantay tan manasalimbeng ed saray pakayari na nonot na Kristiano, a mamakayari ed sikaton mamasiansia ed katooran to.’​—1 Tesalonica 5:8.

Say tinmumbok ya espiker et si Ralph E. Walls, a pinili to so makapasagyat a teman, “Panon Tayon Makabatik ed Kaligenan na ‘Baleg a Kuarto’?” Anto iyan “baleg a kuarto”? (Salmo 18:19) “Sakey a kipapasen na kililiktar a mangitatarok na deen na nonot tan kaligenan na puso,” insalaysay na espiker. Para’d anto a nakakaukolan tayo so kililiktar? ‘Para’d sikayon mismo, lapud saray dilin kakulangan mo.’ Inyarum to: ‘Kaukolan tayo met so niliktar manlapud palaway iran kipapasen a paparngaten nen Satanas.’ (Salmo 118:5) Panon tayon makabatik ed salimbeng na baleg a pasen? ‘Diad pananap ed ganggan nen Jehova ed amin a gawaen tayo tan diad ikerew ed si Jehova ed amin a kapagaan tayo.’

“Anto so Manaalagar ed Sikayo?” so teman pinili nen Don A. Adams. Tan anto so talagan manaalagar para’d saray balon misionero? Panaon na panangibagay, insalaysay to. “Walara met so dakel a bendisyon ed arap yo.” Singa bilang, sinaglawi to so nipaakar ed sanasawan balon misionero a kasabi ra ed asainmin da et nansulat: “Nonot yo so sankaabigan ya agew a niwala ed sikayo diad serbisyo, tan ontan ed kada agew. Agmi sarag so mangawit na nakakaukolan a literatura, tan kekerewen na saray totoo a paiyaralan.” Impaarap na espiker so pigaran komento ed pamilya tan kakaaro na saray mangraduar: ‘Agyo pampapagaan irayan mangraduar. Natulongan yora diad pansulat na panamaseseg ed sikara.’​—Uliran 25:25.

Tinmumbok a nansalita iray instruktor na eskuelaan. Pinili nen Jack D. Redford so teman “Agkayo Maniilalo na Antokaman Manlapud Siopaman.” Sakey ed saray angat na saray mangraduar et say pidedeneng ed totoo, insalaysay to. Anto so makatulong? “Lingwanan iray pakalukso ra. Agkayo maniilalo na alabas ed arum a totoo. Lawas yon ag-ilaloan so nagnap a sukat no anto so ipapasen yon kanepegan yo. Talosan so ag-inkayadyari na arum a totoo, tan sayan panangasi so ontulong ed sikayon mideneng ed arum. Say abilidad yon milimog ed arum so magmaliw a pananukatan ed inkatatken yo.” (Uliran 17:9) Maseguron say pangiyaplika ed sayan makabat a konseho et ontulong ed saray mangraduar a manalona ed panangibagay diad pagmaliw dan misionero ed biek taew a dalin!

“Walaan so sayan kayarian tayo ed vaso a pitek,” kuan na 2 Corinto 4:7. Kinomentoan nen Ulysses V. Glass, say registrar na Eskuelaan na Gilead, iyan teksto diad impanibukel to na teman “Panmatalekan Iray Asubok, Matoor ya Agagi,” Antoray “vaso a pitek”? “Peteg a saraya so ontukoy ed sikatayo bilang ag-ayadyarin totoo,” impabitar to. Anto so “kayarian”? “Satan so Kristianon ministeryo tayo,” insalaysay to. (2 Corinto 4:1) Tan anto so nepeg a gawaen ed sayan kayarian? “Say kayarian ya impabtang nen Jehova ed sikatayo so agkaukolan ya isimpen. Kanian, sikayoran pinablin prospektibon misionero, ibunog yo itan a kayarian ed inerman a laen yo, tan bangatan iray arum no panon so pangibunog ed satan.”

Makatiknan momento sanen ginmapon mansalita si Albert D. Schroeder ed entablado, say registrar diad inggapo na Gilead School. “Kapalduan Siglo na Teokratikon Panangipasal” so tema to. “Kabat nen Jehova no panon so pangiter na epektibon panangipasal, tan saya so gagawaen to,” inkuanto. Panon? Tinukoy nen Brother Schroeder so panangipasal ya inawat diad panamegley na duaran eskuelaan ya inletneg 50 taon la’y apalabas​—say Eskuelaan na Teokratikon Ministeryo tan Eskuelaan na Gilead. Indanet to a wala so makanan kagawaan diad pangitatarya na suston pikakabat diad New World Translation. Pinaseguroan toray mangraduar: “Makakar kayo ed saray asainmin yo ed biek taew a walaan na baleg a kumpiyansa ya itultuloy na Sosyedad a pawitan kayo na suston suplay tekep na suston pikakabat ed saray gagala nen Jehova.”

Si Milton G. Henschel, say presidente na Watch Tower Bible and Tract Society of Pennsylvania, so angipaliwawa ed teman “Nagkalalo Nen Saray Mananalo.” Inaon nen Brother Henschel so tema to manlapud tinaon a teksto parad 1943: “Lalo ni nen saray mananalo ed panamegley na saman so angaro ed sikatayo.” (Roma 8:37, King James Version) Saman so matukotukoy a tinaon a teksto, insalaysay to, lapud diad utel na Guerra Mundial II, saray agagi tayo ed dakel a bansa so akaeksperiensia na graben panamasegsegang. Binasa nen Brother Henschel so pigaran inaon manlapud paway na Watchtower ya aningbat ed saman a tinaon a teksto tan insan insalaysay: “Sayan artikulo na Watchtower [Enero 15, 1943] so inaral ed bulan na Pebrero na say inmunan klase na Gilead, tan satan so angitarya ed sikara ed no anto so walad arapen da.” Dakel ed saray graduado ed apalabas a 50 taon so amaneknek la ed inkasikara a sikara la so mananalo, insalaysay to. Komusta so koma-94 a klase? “Mansiansian maapit ed si Jehova, mansiansian maapit ed panangaro to, tan napaseguro so pambiktorya yo.”

Kayari na saray paliwawa ed kabuasan, angipanabang so tserman na pigaran pabano a naawat nanlapud nanduruman daldalin. Insan sinmabi la so panaon ya aalagaren na 24 a sanasawa​—say kibunog na saray diploma. Siempre, saray estudyante na Gilead so opisyal a graduado la ed Gilead! Sikara so nanlapu ed 5 bansa, balet saray asainmin da so mangiyakar ed sikara ed 17 a daldalin, pati ed Hong Kong, Taiwan, Mozambique, tan saray kabiangan na Mamabukig a Europa.

Kayari na intermisyon, say programa ed ngarem so ginapoan na apatikey a Panagaral na Panag-Bantayan, ya indaulo nen Robert L. Butler. Insan inyinsayo na saray graduado so pigara ed matalonan nangayagaan dan eksperiensia legan na impanpulong ed kabangibang a Wallkill, New York. Insindag na programa so sakey ed saray bengatla ya agpanduaruwaan ya angitarok ed sikara ed Gilead​—say aralem a panangaro ra para’d lawak a ministeryo.

Kasumpal na programa na estudyante, dakel ed dumerengel so manuumameng no kasin mangipabitar so programa na bengatlan nikadkaduma diad panselebra ed 50 taon la na Eskuelaan na Gilead. Ag-ira asaot!​—Nengnengen so akatekep a kahon, “Panagrepaso ed 50 Taon la ed Eskuelaan na Gilead.”

Limamplon taon la’y apalabas, indemostra nen Brother Knorr a sikato so toon walaan na pananisia tan pasingawey. Say kumbiksyon to a say Eskuelaan na Gilead so ontalona et nibalikas ed manangilukas a paliwawa to ed inmunan klase, sanen inkuanto: “Manisia kami, a tua ed ngaran to, say ‘pungol na tasi’ so manlapu dia a pasen a mamaarap ed amin a parte na mundo tan satan a tasi so ontalindeg bilang pakatandaan ed gloria na Dios ya agbalot naderal. Sikayo bilang ordinadon ministros so sigpot a manmatalek ed Sankatagyan, a kabkabat yon mangigiya tan mangiwanwan ed sikayo diad amin a panaon a nakaukolan yo, tan naamtaan yo met a sikato so Dios na panamendisyon.”a

Limamplon taon ed saginonor, say Eskuelaan na Gilead so siansian ombibiskeg! Saray nangraduar natan ed koma-94 a klase so walaan na pribilihyon mangalig ed masulok a 6,500 a tinumbokan dan graduado. Komon ta manmatalek iran sigpot ed Sankatagyan legan a gawaen da so betang ed panangibunton na ‘pungol na tasi’ ya ontalindeg bilang pakatandaan ed gloria nen Jehova a Dios.

[Paimano ed leksab]

[Kahon ed pahina 25]

Saray Estatistika na Klase

Dagup a bilang na saray estudyante: 48

Bilang na saray nirepresentan bansa: 5

Bilang na saray bansan angi-asainan: 17

Promedyon edad: 32

Promedyon taon ed katuaan: 15.3

Promedyon taon ed sigpot-panaon a ministeryo: 9.6

[Kahon ed pahina 26, 27]

PANREPASO ED 50 TAON ED ESKUELAAN NA GILEAD

Anto ni so magmaong a paraan a pannonot ed awaran na Gilead nen say diad panamegley na saray eksperiensia na saramay akasagmak​—saray akaunan graduado, instruktor, tan saray arum nin tinmulong ya angorganisa ed satan? Aliketan iray dumerengel legan a tinalineng da so betang a “Panagrepaso ed 50 Taon ed Eskuelaan na Gilead,” ya indaulo nen Theodore Jaracz.

Antoray sirkumstansyan angipaarap ed inkiletneg na say eskuelaan? Insalaysay nen Brother Schroeder a sikato tan saray duara nin instruktor so naikdan labat na apatiran bulan a mangorganisa ed eskuelaan. “Balet diad Lunes, na Pebrero 1, 1943, sikami la so akaparaan para’d dedikasyon.”

Anto so liknaan na saramay inmunan imbakin misionero? Atandaan nen Brother Henschel: “Impakarga mi ed departamento na shipping na Sosyedad so amin a kayarian a labay ya awiten na saray misionero ed tablan kahon. Sanen sinmabi ed destinasyon daray tablan kahon, siaalwar dan nilukasan tan impaway daray kagawaan da. Insan ginawa daray tablan kahon a muebles.” Diad kaunoran et atandaan to so oksuyan na Sosyedad a mangitarok na kabkaabigan iran ayaman na misionero.

Say tinmumbok ed programa et say impangipanabang na pigara ed saray graduado na akadkaunan klase na Gilead a membro la natan na pamilya na Bethel ed E.U. ed saray pakanodnonotan, liknaan, tan eksperiensia ra. Saray balikas da so peteg ya akatikna ed kapusoan na amin ya inmatendi.

“Kayari impangawat ko na imbitasyon ya onatendi ed ununan klase, akabatan kon awalaay kanser si nanay ko. Balet lapud ta sikato so akapanpayunir nanlapula’d edad ton 16 a manpatuloy, mapekder a sinimbawa toak ya awaten ko so imbitasyon. Kanian diad agnibagan liknaan tan talek ed si Jehova, siak so nambaroy ya amaarap ed South Lansing. Sigpot kon nanliketan tan apresyaen a tuloy so panangipasal ed Gilead. Asumpal nen nanay ko so mangaraldalin a kurso to pigaran bulan kayari impangraduar ko.”​—Charlotte Schroeder, nanlingkor ed Mexico tan El Salvador.

“Lapud inasikaso ak la nen Jehova diad dalin a panaayaman ko, namoriak ya inerman a laen ko et siansian dalin to, tan asikasoen toak. Kanian maliket ak a tuloy ya angawat ed imbitasyon ed inmunan klase.”​—Julia Wildman, nanlingkor ed Mexico tan El Salvador.

“Makapakelkelaw so misioneron kimey! Makapitongtong kami ed kada puerta. Diad inmunan bulan, akapalima ak na 107 libro tan akapangikondukta na 19 a panangiyaral ed Biblia. Diad komaduan bulan awalaan ak na 28 a panangiyaral ed Biblia. Siempre, walaray bengatlan nepeg min iluaman​—petang, unido, saray piseng. Balet saman so makapakelkelaw a pribilihyon kiwala mi diman. Bengatlan lawas kon pablien.”​—Mary Adams, komaduan klase, nipaakar ed asainmin to ed Cuba.

“Say klima so sakey ed saray baleg a babeng a kaukolan min talonaan ed Alaska. Diad amianen et ambetebetel, a walaay temperaturan onabeba ed 60 digri a leksab na zero Fahrenheit tan mas ambetel. Saray baley na Indian tan ankelag iran nisulinek a pasen diad mamaabalaten-bukig na Alaska so asabi balanglan diad barko odino eroplano.”​—John Errichetti, komatlon klase.

“Para’d siak say Gilead so imbitasyon a nanlapud si Jehova diad panamegley na mangaraldalin ya organisasyon to a mamabiskeg ed espiritualidad tayo tan mangipanengneng ed sikatayo na makapakelkelaw a paraan na kabibilay.”​—Mildred Barr, koma-11 a klase, nanlingkor ed Ireland.

Tinmumbok iray lalon makapasayaksak ya interbio​—Lucille Henschel (koma-14 a klase, nanlingkor ed Venezuela), Margareta Klein (koma-20 a klase, nanlingkor ed Bolivia), Lucille Coultrup (koma-24 a klase, nanlingkor ed Peru), Lorraine Wallen (koma-27 a klase, nanlingkor ed Brazil), William tan Sandra Malenfant (koma-34 a klase, nanlingkor ed Morocco), Gerrit Lösch, (koma-41 a klase, nanlingkor ed Austria), tan David Splane (koma-42 a klase, nanlingkor ed Senegal).

Komusta iray arum ya agagin nanlingkor bilang instruktor? Dakel ed sikara so ininterbio met​—Russell Kurzen, Karl Adams, Harold Jackson, Fred Rusk, Harry Peloyan, Jack Redford, tan Ulysses Glass. Insindag da ed pribilihyo ra, diad impangibalikas no panon ya angapekta ed sikara anggad sayan panaon.

Say makapaliket a testimonya ed inka-epektibo na saray nipasal-ed-Gilead a misionero so inter nen Lloyd Barry, a nanlingkor ed Hapon. Nen 1949, sanen 15 misionero so imbaki diman, kulang a 10 iray manangipalapag ed interon Hapon. Balet 44 taon ed saginonor, wala so inmatagey a 175,000 a manangiyabawag na Panarian diad satan a dalin! Insan imbaga nen Robert Wallen so matalonggaring ya intalona na arum a misionero diad impanulong ed totoo ya onloob ed katuaan, pati ed sakey a misioneron agin bii a mankikimey ed Panama ed masulok a 45 taon tan akatulong ed 125 a totoo ed dedikasyon tan bautismo.

Say pantok na interon programa so adampot sanen amin ed limog na dumerengel a nangraduar ed Gilead so naimbitaan ya onla ed entablado. Talagan saman so makapatiknan momento. Say mantultuloy ya agos na agagin lalaki tan bibii​—89 ed pamilya na Bethel pati ed ombibisita iran nangraduar so nanakar ed pegley na assembly hall tan tinmatdang a nampaarap ed entablado. Sikara so inulop na saray agagin nanlingkor bilang instruktor ed loob na saratan a taon, insan tinmumbok so koma-94 a klase​—ami-amin et ngalngali 160!

“Kasin say kimey na Gilead School diad panangipasal na saray misionero para’d biek taew a daldalin so peteg a matalona?” intepet nen Brother Jaracz. “Say ebidensya ed apalabas a 50 taon so manbayembeng ya