Manliket ed si Jehova tan Manggayaga
SAY matalonan pakasumpal ed antokaman a makanan proyekto so lawas makapaliket a panaon. Saray programa ed graduation ya agawa nen Marso 13, 1999, diad Watchtower Educational Center dima’d Patterson, New York, so petepeteg ya ontan ya okasyon parad 48 ya estudyante na koma-106 a klase na Watchtower Bible School of Gilead.
Saray manangilukas a komento nen Theodore Jaracz, membro na Mananguley ya Ulop, a nangraduar met ed koma-pito a klase na Gilead, tan tsirman ed programa na graduation, so angipabitar ed saray balikas ed Salmo 32:11: “Manliket kayo ed Jehova tan manggayaga kayo a matunong.” Oniay inkuanto diad impangipaliwawa to no akin a matukoy parad amin so panliket ed sayan okasyon: “Manliket itayo ed saray okasyon a singa onia lapud gagawaen nen Jehova ed saramay maptek-impanpuso, kalaktip laray estudyante tayo ed Gilead.” Anggaman namplano laray estudyante pian makaatendi ed Gilead School tan mapeleng dan insekar so inkasikara pian onkualipika ed panagmisionaryo, si Jehova so nanggawan posibli ed matalonan pakasumpal na amin a bengatla. (Uliran 21:5; 27:1) Unong ed indanet nen Brother Jaracz, satan so rason no akin a ‘manliket ed si Jehova.’
Kaiba ed saramay walad auditoryum diad Patterson et saray kapamilyaan tan bisita na saray estudyante a nanlapu ed 12 bansa pian onimaton ed sayan magayagan ebento. Legan a tatalaranan na 5,198 ya inmatendi—pati saray membro na pamilyay Bethel ed Brooklyn, Patterson, tan Wallkill, a nikonekta diad panamegley na audio tan video—so kigapo lay programa, napatnagan a wala lay magayagan awawey.
Asimbawan Manmantini ed Magayagan Awawey
Diad impanampot nen Brother Jaracz ed manangilukas iran komento to, impresenta to so pilimero ed limaran espiker, ya angiparaay makapaseseg a simbawa manlapud Kasulatan, ya aliwa lambengat a parad saray mangraduar ed Gilead noagta ontan met ed amin ya inmatendi.
Say inmunan nampaliwawa et si William Malenfant, a nangraduar ed koma-34 a klase na Gilead, a manlilingkor natan bilang katulongan ed Teaching Committee na say Mananguley ya Ulop. Mitukoyan ed say tema ton “‘Amin a Bengatla’ Et Aliwan Kaapaan!” a nibase ed Eclesiastes 1:2, imbangon toy tepet a: “Kasin say labay ya ibaga nen Solomon et kaapaan so amin a bengatla, diad sigpot a talos na salita?” Say ebat: “Andi. Ipapabitar ton saray kimey na too a mangibabaliwala ed linawa na Dios, saray gegemtan a biig ed linawa na Dios—amin na saratan so kaapaan.” Misunian, say pandayew ed tuan Dios, si Jehova, et aliwan kaapaan; ontan met ed panaral na Salitay Dios, say Biblia, tan say pangibangat ed satan diad arum. Aglilingwanan na Dios so ontan iran pansasagpot na saray lingkor to. (Hebreos 6:10) Diad tua, anggano onsabi so kalamidad ed saramay aabobonan na Dios, sikara so “nisinger ed singer na bilay ed Jehova.” (1 Samuel 25:29) Agaylan makapaligsay-puson kanonotan! Makatulong ed amin a mandadayew ed si Jehova so pannonot ed sarayan punto pian namantini so magayagan awawey.
Si John Barr, a membro na Mananguley ya Ulop, so amaseseg ed mangraduar lan klase diad paliwawa ton “Panliketan so Asainmin Yo Bilang Misionaryo.” Impabitar ton say panagmisionaryo et sakey a bengatlan lawas maap-apit ed puso nen Jehova a Dios. “Satan a bengatla et makanan kabiangan na balikas nen Jehova ed panangaro to’d katooan. Imbaki toy bogbogtong ya Anak to diad dalin. Si Jesus so sankatalonggaringan a misionaryo, say sankamanunaan a misionaryo.” Anggaman namolimoli na saray mangraduar iray pananguman a kinaukolan a gawaen nen Jesus pian magmaliw a matalona ed asainmin to diad dalin, saray gungguna nipaakar ed impanmisionaryo nen Jesus so niwala nin siansia ed amin a manganamot ed saratan. Singa impabitar la nen Brother Barr, satan et lapud nanliketan nen Jesus so panggaway kimey na Dios, tan inaro to met iray ananak na katooan. (Uliran 8:30, 31) Pinaseseg nen Brother Barr iray mangraduar a mansiansia ira ed saray asainmin da, ya aliwa lambengat a nepeg ya anosan, noagta lapud panliketan dan gawaen itan. “Manmatalek ed si Jehova; agto iyabuloy a nadismaya kayo,” so inkuan to ed klase.—Salmo 55:22.
“Manakar Unong ed Ngaran nen Jehova Diad Ando lan Ando” so teman pinili na ontumbok ya espiker, si Lloyd Barry, membro met na Mananguley ya Ulop. Diad impanlingkor bilang misionaryo ed loob na masulok a 25 taon diad Hapon kasumpal to ed koma-11 a klase na Gilead, insalaysay nen Brother Barry so pigara ed saray eksperiensia na saray akadkaunan misionaryo tan deneskribe toray angat a kinaukolan dan arapen. Anto so walan praktikal a bilin to ed mangraduar lan klase? “Manuna’d amin, mantinien yoy espiritualidad yo. Ontan met, aralen so lenguahe tan say kultura. Pantultuloyen yoy inkasayaksak yo. Tan mansiansia ed kimey; ag-onkekesaw odino ontutunda.” Inkuan nen Brother Barry ed saray mangraduar a diad saray asainmin da ed biek-taew et napitongtongan day dakel a totoon manaakar unong ed ngaran na nanduruman dirios, tan pinanonotan tora nipaakar ed saray salita nen Miqueas: “Amin a baley manakar ira balang sakey ed ngaran na dios to; et manakar itayo naani dia ed ngaran nen Jehova a Dios tayo ed ando lan ando lawas.” (Miqueas 4:5) Maseguron say alimbawa na dati iran misionaryo so mabiskeg a mamakiwas ed amin a lingkor na Dios pian mantultuloy a manakar unong ed ngaran nen Jehova tan matoor a manlingkor ed sikato.
Say tinmumbok ed programa et say instruktor ed Gilead a si Lawrence Bowen. Say tema na paliwawa to so amalesa na tepet ya, “Anto Kasi Pagmaliwan Yo?” Impabitar ton say italona ed panaglingkor ed Dios et mandependi ed pananisia tan panagmatalek ed si Jehova. Lapud sigpot a panagmatalek ed si Jehova, si Arin Asa so pirmin nambiktorya sumpad kalaban to a sakey ya armadan walaay sakey milyon a sundalo. Ingen sikatoy pinanonotan nen propetan Azarias nipaakar ed pankaukolan a mantultuloy a manmatalek ed Dios: “Si Jehova wala ed sikayo, leleg a wala kayo ed sikato.” (1 Awaran 14:9-12; 15:1, 2) Lapud say ngaran na Dios, a Jehova, so mangipapasabi na ideya a paneknekan toy antokaman a nakaukolan pian nasumpal so gagala to—balanglan mankabaliksan itan na pagmaliw a Manangitarya, Mananalimbeng, odino Manangipaakseb ni ingen—saray misionaryo a manmatalek ed si Jehova tan mankimey a mitunosan ed gagala to so napaneknekan a matalona ed saray asainmin da. (Exodo 3:14) Oniay impangisampot nen Brother Bowen, “Agbalot lilingwanan a no say gagalam et gagala nen Jehova, pagmaliwen tokan antokaman a nakaukolan pian nasumpal moy asainmin mo.”
Say unor ya espiker ed sayan parti na programa et si Wallace Liverance, datin misionaryo tan natan et registrar lay eskuelaan. Say diskurso to, ya apauloay “Pansiansiaen a Mabilay tan Walaay Epekto ed Sikayo so Salitay Dios,” so angipaimano ed ag-onsaew a mensahe, odino sipan, na Dios a lawas ontutundas ed kasumpalan. (Hebreos 4:12) Impluensiaan toy kabibilay na saramay paimpluensiaan ed satan. (1 Tesalonica 2:13) Panon a satan a salita et napansiansian mabilay tan walaay epekto ed kabibilay tayo? Diad panamegley na maseet a panagaral na Biblia. Pinanonotan nen Brother Liverance iray mangraduar nipaakar ed saray metodo na panagaral na Biblia a naaralan da ed Gilead a mangilaktip ed panagbasa tan panamalaknab ed talos tan kiyaplikaan na Salitay Dios. Inaon toray salita nen Albert Schroeder, membro na Mananguley ya Ulop a nanserbi bilang tsirman na komite ya angiletneg ed Gilead School diad masulok lan 50 taon so apalabas: “Diad pangusar ed konteksto, nagamoran na sakey so nagnap, susto, maespiritual a puersa ya intarya na Dios diad Salita to.” Sayan paraan na panagaral na Biblia so mamasiansia ed Salitay Dios a mabilay tan walaay epekto.
Makapaliket Iran Eksperiensia tan Interbio
Kayari na saray paliwawa, nanliketan na dumerengel so pigaran makapaliket ya eksperiensia manlapud saray estudyante. Diad panangidirehi nen Mark Noumair, datin misionaryo tan peles ya instruktor ed Gilead, insalaysay tan indemostra na sakey a grupo na saray estudyante no panon dan nanggunaetan so impanpulong ed nanduruman situasyon. Arum so akapangigapo tan akapangikondukta na saray panangiyaral na Biblia ed totoo diad teritorya diad pagmaliw a maimanon tuloy ed saray kipapasen tan paraan na saray totoo tan diad impangipanengneng day personal ya interes. Kanian saray estudyante so ‘nanimanon maong ed inkasikara tan ed bangat da’ tan interesado iran talaga diad panulong ed arum pian makagamor na kilalaban.—1 Timoteo 4:16.
Dakel so niiter iran praktikal a suhestion, tan say gayaga ed panagmisionaryo so nipatnag met na pigaran eksperiensiadon agagi a nipapasal ed eskuelaan parad saray membro na branch committee a nikondukta diad Watchtower Educational Center. Mabilabilay ya inkondukta di Brother Samuel Herd tan Robert Johnson a kabiangan na saray staff na hedkuarter iray impan-interbio ed saray manangilaman na saray sangan opisina na Sosyedad ed Bolivia, Zimbabwe, Nicaragua, Central African Republic, Dominican Republic, Papua New Guinea, tan Cameroon.
Kayari na saray eksperiensia tan interbio, si Gerrit Lösch, nangraduar ed koma-41 a klase ed Gilead tan membro natan na Mananguley ya Ulop, so angiter ed unor a paliwawa diad makapatenyeg-kanonotan a teman “Kasin Sakey Kan ‘Makaparoyroyon Too’?” Pinanonotan ya unona nen Brother Lösch iray mangraduar a si Jesus, say ayadyarin Anak na Dios, so ag-impasen na totoo a makaparoyroyo, noagta “sikato so amudmora, tan inkaindan na saray totoo.” (Isaias 53:3) Kanian agla pankelawan a diad dakel a parti na mundo natan, saray misionaryo so momoriaen bilang persona non grata, odino aglabalabay a totoo. Diad biek a dapag, legan na andukey iran taon na serbisyo nen Daniel diad Babilonia, diad panamegley na sakey ya anghel et amitlon tinawag na Manamalsa si Daniel bilang “too ya inad-aro a maong.” (Daniel 9:23; 10:11, 19) Akin a nagmaliw ya ontan si Daniel? Agton balot inkompromiso iray prinsipyo na Biblia sanen onaadapta ed kultura ed Babilonia; diad amin a paraan et sikatoy matua, ya agton balot inusar so posisyon to parad personal a pankaabigan; tan sikato so maseseg a manag-aral na Salitay Dios. (Daniel 1:8, 9; 6:4; 9:2) Sikato met so naynay a nampikasi ed si Jehova tan lawas akaparaan a mangigloria ed Dios nisesengeg ed saray agawaan to. (Daniel 2:20) Diad panumbok ed alimbawa nen Daniel, napaneknekan na saray lingkor na Dios so pagmaliw a makaparoyroyo, ya aliwan ed mundo, noagta ed si Jehova a Dios.
Bilang pansara ed programan makapabiskeg ed espiritual, binasa na tsirman so pigara ed saray telegrama tan mensahen nanlapud intiron mundo. Insan, balang sakey ed 24 a sanaasawa so angawat ed saray diploma ra, tan niyanunsio so bansan angiyasainan ed sikara. Diad kaunoran, binasa na manangilaman ed klase so sulat a parad Mananguley ya Ulop tan ed pamilyay Bethel, a mangibabalikas ed apresasyon ya alikna na klase parad panangipasal tan panangiparaan ed sikara ed loob na apalabas a limaran bulan.
Diad pansampot lay programa, narengel so ‘panangisaklang a sigagayaga’ ed limog na saray ombubuat lan ulop.—Nehemias 12:27.
[Kahon ed pahina 27]
Saray Estadistika na Klase
Bilang na saray bansan nanlapuan: 10
Bilang na saray bansan angiyasainan: 19
Bilang na saray estudyante: 48
Bilang na saray sanasawa: 24
Promedyon edad: 33
Promedyon taon ed katuaan: 16
Promedyon taon ed sigpot-panaon a ministeryo: 13
[Litrato ed pahina 25]
Koma-106 a Nangraduar a Klase na Watchtower Bible School of Gilead
Diad listaan ed leksab, saray dasig so anumeroan a manlapud arap a pabeneg, tan saray ngaran so akalista manlapud kawigi a manpakawanan ed kada dasig.
(1) Deakin, D.; Puopolo, M.; Laguna, M.; Davault, S.; Dominguez, E.; Burke, J. (2) Gauter, S.; Vazquez, W.; Seabrook, A.; Mosca, A.; Helly, L.; Breward, L. (3) Brandon, T.; Olivares, N.; Coleman, D.; Scott, V.; Petersen, L.; McLeod, K. (4) McLeod, J.; Thompson, J.; Luberisse, F.; Speta, B.; Lehtimäki, M.; Laguna, J. (5) Gauter, U.; Dominguez, R.; Helly, F.; Smith, M.; Beyer, D.; Mosca, A. (6) Scott, K.; Seabrook, V.; Speta, R.; Coleman, R.; Breward, L.; Davault, W. (7) Smith, D.; Lehtimäki, T.; Petersen, P.; Thompson, G.; Vazquez, R.; Beyer, A. (8) Luberisse, M.; Deakin, C.; Brandon, D.; Puopolo, D.; Olivares, O.; Burke, S.