Manlapud Matalona Iran Estudyante ya Anggad Matalona Iran Misioniro
“AGKO ni napanisiaan ya awalaan kami na onian pribilihyo!” so inkelyaw nen Will, diad panutukoy ed panangipasal a kapkapansumpal to tan say asawa ton, si Patsy, bilang estudyante na koma-103 a klase na Watchtower Bible School of Gilead. Inmabobon si Zahid tan si Jeni. “Liknaen min pribilihyo so pakapibilang ed saya,” so inkuanda. Nampelengan na amin ya estudyante so nanaral. Natan et magunaet da lan igapo so karera ra bilang misioniros. Balet sakbay ni, diad programay impangraduar nen Setyembre 6, 1997, akaawat iray maaron simbawan ontulong ed sikaran ontalona ed panmisioniron asainmin da.
Say tsirman na programa et si Theodore Jaracz, membro na Mananguley ya Ulop. Impabitar to—kaiba lay pamilyan Bethel tan saray manangilaman na 48 sanga na say Watch Tower Society—kakaaro tan kakanayon a nanlapud Canada, Estados Unidos, Europa, tan Puerto Rico so presenti bilang panamaseguro’d pananuporta tan aro ra’d saray estudyante. Sinaglawi nen Brother Jaracz a saray misioniron imbaki na saray relihyon na Kakristianoan so mabetbet a naisusuawi ed panmisioniron kimey da lapud ginapoan dan gegemtanen iray akademikon sagpot odino akibabali ni ingen ed politika. Misunian, gagawaen na saray nangraduar ed Gilead so inkipasalan dan gawaen. Ibabangat da’d totoo so Biblia.
Insan impaliwawa nen Robert Butler a nanlapud opisina na Sosyedad ed Brooklyn so teman “Gawaen Yon Matalona so Dalan Yo.” Impaliwawa to ya anggaman say pananukatay totoo ed itatalona et base’d pinansyal odino arum nin personal ya agamoran, say importanti et no antoy pananukatan na Dios ed itatalona. Matalona so ministeryo nen Jesus, aliwan lapud dakerakel so akomberti to, noagta lapud sikatoy matoor ed asainmin to. Inggloria toy Jehova, tan sikatoy nansiansian ag-atilolan na mundo. (Juan 16:33; 17:4) Saraya so bengatlan nagawaay kada Kristiano.
“Paaripen ed Amin a Totoo,” so insimbawa nen Robert Pevy, datin misioniro ed Bukig. Si apostol Pablo so matalonan misioniro. Antoy sekreto to? Sikatoy nampaaripen ed amin. (1 Corinto 9:19-23) Impaliwawa na espiker: “Say sakey a nangraduar ed Gilead a walaay ontan ya awawey so agmangipasen ed misioniron serbisyo bilang sakey a nengneng na tinmagey a karera, kialigwasan ed mas importanti iran posisyon ed organisasyon. Onla so sakey a misioniro ed asainmin to tekep na saksakey a motibo—pian manlingkor, lapud ontan so gawaen na saray aripen.”
Manunan ibabase so simbawa to’d 2 Corinto kapitulo 3 tan 4, binilin nen Gerrit Lösch na Mananguley ya Ulop iray estudyante ya “Isindag a Singa Saray Salming so Gloria nen Jehova.” Pinanonotan toran say pikakabat na Dios et singa silew a limbosen toy sakey a Kristiano sano ilukas toy puso to diad pangawat ed satan. Isisindag tayo itan a liwawa diad pangipupulong na maong a balita tan diad panmamantini ed maabig a kondukta. “Panapanaon et nayarin liknaen yon agkayo onggenap,” so inaksobi to. “No onlesa so ontan iran liknaan, manmatalek ed si Jehova, ‘pian say sankatageyan ya inkabaleg na pakayari et kien komon na Dios.’” (2 Corinto 4:7) Iyaaniweng iray salita nen Pablo a nirekord ed 2 Corinto 4:1, inmapelo si Brother Lösch ed saray estudyante: “Agyo isusuko so panmisioniron asainmin yo. Pansiansiaen yon masileng so salming yo!”
Si Karl Adams, sakey a membroy faculty na Gilead, so angipaliwawa’d makapainteres a teman “Iner so Kawalaan nen Jehova.” Say tepet so manutukoy, aliwan say pasen a kawalaay Dios ed uniberso, noagta say pankaukolan ya ikonsidera so punto de bista nen Jehova tan saray pakanengnengay panangidirehi to. “Diad pakadedetdet,” inkuanto, “anggan say sakey a toon walaay andukey lan rekord na serbisyo’d si Jehova so makalingwan ed satan.” (Job 35:10) Komusta’d modernon agew tayo? Nen 1942, say totoo na Dios et mankaukolay panangigiya. Kasin mansumpal lay panagpulong, odino dakel nin kimey so gagawaen? Anto so linawa nen Jehova ed totoo to? Legan dan aaralen so Salitay Dios, nagmaliw a malinew so ebat. “Sakbay a manampot so taon,” inyabawag nen Brother Adams, “nidatak laray plano parad Watchtower Bible School of Gilead.” Maseguron benindisionan nen Jehova so kimey na saray misioniro a nibaki panamegley na satan ya eskuelaan.
Si Mark Noumair so komaduan instruktor a nansalita. Diad paliwawa to, ya atituloay, “Panon Yon Usaren so Talento Yo?” et pinaseseg toray estudyante a mangiyaplika’d inkipasalan da’d Gilead kasabi ran tampol ed balon asainmin da. “Sabien so Arum,” so inkuanto. “Magmaliw ya interesado’d sikara. Panpagaan ya aralen iray kustombre, say awaran, say bengatlan makapalek ed bansa. No maples yon naaralay lenguahe, magmainomay so kiyadapta yo.”
Saray Maseseg ya Estudyante so Makaromog na Gayaga’d Ministeryo
Niarum ed saray panpepelengan dan aaralen legan a walad Gilead, niasain iray estudyante’d 11 a lokal a kongregasyon. Diad saray sampot-simba, maseseg iran mibibiang ed panagpulong. Inimbitaan nen Wallace Liverance na faculty na Gilead so pigara’d sikara pian inabang ed dumerengel so arum ed saray eksperiensia ra. Mapatnag so gayaga ra legan dan isasalaysay iray naeksperiensia ra diad impanpulong da’d saray shopping mall, diad saray paradaan, diad panag-negosyoan, diad kalye, tan diad kabkaabungan. Arum ed sikara so angiremedyo pian nasabi iray mansasalitay-dayo a manaayam tan mantratrabaho ed teritoryay kongregasyon da. Manga samploran iyaaralan na Biblia so nigapo tan kokonduktaan na saray membro na koma-103 a klase legan na limay bulan a panaaral da.
Innabang na Ababayag Laran Misioniro Iray Sekreto na Itatalona
Kayari na sayan makapaliket a parti na programa, inimbitaan di Patrick Lafranca tan William Van de Wall so pitoran membro na Branch Committee pian idatak iray leksion a naaralan da diad saray misioniron karera ra parad kagunggunaay klase. Binilin daray mangraduar ya ipasen so misioniron asainmin da bilang nanlapud si Jehova tan magmaliw a determinadon mansiansia ed asainmin. Sinaglawi daray positibon epekto a walad saray nipasal ed Gilead a misioniro diad kimey ed arum a dalin.
Antoy tinmulong ed sarayan membroy Branch Committee a makapanlingkor ed loob na dekadekada bilang maliket, mabungan misioniro? Maapit iran akikimeyan ed saray agagin tagad’man tan nanaral manlapud sikara. Nampelengan dan inaral so lenguahe kasabi ran tampol ed asainmin da. Naaralan day magmaliw a manangitukoytukoy tan miadapta’d lokal iran kustombre. Si Charles Eisenhower, sakey a nangraduar ed inmunan klase na Gilead tan misioniro ed loob na 54 taon la, so anginabang ed limaran “sekreto” a naaralan na saray matalonan misioniro: (1) Regular ya aralen so Biblia, (2) aralen so lenguahe, (3) man-aktibo’d ministeryo, (4) mankimey parad kareenan diad loob na misioniron ayaman, tan (5) naynay a manpikasi’d si Jehova. Asagyat iray estudyante aliwa lambengat ed praktikal a simbawan naawat da balet diad mapatnag a gayagan wala’d sarayan eksperiensiadon misioniro diad serbisyo’d si Jehova. Singa impangikuan di Armando tan Lupe, “maliket ira sano totongtongen day nipaakar ed bilabilay da.”
Kayari na saray interbio, wala ni sampot a diskurso. Pinili nen Albert Schroeder, membro na Mananguley ya Ulop, so tema ton “Matoor a Panamenben ed Salitay Dios so Mangiparungtal na Ankablin Batobato na Katuaan.” Lapud say Biblia so manunan libron panaralan ed Eskuelaan na Gilead, interesado iray estudyante ed no antoy ibaga to. Impabitar nen Brother Schroeder a sanen ginmapoy impanarabaho’d New World Translation of the Holy Scriptures 50 taon lay linmabas, ag-inimano na saray alanaan a membro na New World Bible Translation Committee so panangaboboy totoo balet nanmatalek ed panangigiya na masanton espiritu. (Jeremias 17:5-8) Balet, agano nin binidbir na pigaran autoridad so atagey ya estandarten inletneg na New World Translation. Diad sakey a sulat ed Sosyedad, insulat na sakey ya iskolar: “Binidbir koy sakey a de-kalidad a publikasyon sanen anengneng ko iya, tan say ‘New World Bible Translation Committee’ yo so akagaway ekselentin trabaho.”
Kayari na sayan paliwawa, naawat na saray estudyante iray diploma ra, tan niyanunsio ed dumerengel iray asainmin da. Makapatenyeg itan a pankanawnawa parad saray membro na klase. Legan a babasaen na manangipresinta na klase so sulat a mangibabalikas na apresasyon, dakel so akaliknay ma-emosyon a pisasalamat tan manlua iray kamataan da. Dakel lan taon a manpaparaan iray arum ya estudyante parad misioniron kimey. Momoriaen a say kursoy Gilead so ikondukta’d Ingles, pigaray inmalis ed mansasalitay-Ingles iran kongregasyon pian napaaligwas day panag-Ingles da. Arum so inmalis ed walaay babaleg a pankaukolan parad saray payunir, balanglan diad dili ran bansa odino biek-taew. Arum ni so namparaan diad panamegley na impanbasa’d saray eksperiensia, impan-research, odino aminpigapigan impanbantay na videocassette na Sosyedad a To the Ends of the Earth.
Si Will tan Patsy, ya asalambit ed gapo, so atenyeg a tuloy ed personal ya interes a nipanengneng ed saray estudyante. “Anggan saray totoon agda kami kabkabat et nilalakap da kami tan nililitrato ra kami. Sakey a membro na Mananguley ya Ulop so nampasamano’d sikami tan angikuan, ‘Ikinon mi kayo!’” Anggapoy duaruwa’d satan, saray estudyante na koma-103 a klase so pinabpablin tuloy. Nipasal iran maong. Say impaneskuela ra’d Gilead so mangiyabuloy ed sikaran manggaway pananguman manlapud matalonan estudyante ya anggad matalonan misioniro.
[Kahon ed pahina 22]
Saray Estadistika na Klase
Bilang na saray nirepresintan bansa: 9
Bilang na saray bansan angiyasainan: 18
Bilang na saray estudyante: 48
Bilang na saray sanasawa: 24
Promedyon edad: 33
Promedyon taon ed katuaan: 16
Promedyon taon ed sigpot-panaon a ministeryo: 12
[Litrato ed pahina 23]
Koma-103 a Klase na Watchtower Bible School of Gilead
Diad listaan ed leksab, saray dasig so anumeroan a manlapud arap a pabeneg, tan saray ngaran so akalista manlapud kawigi a manpakawanan ed kada dasig.
(1) Bunn, A.; Dahlstedt, M.; Campaña, Z.; Boyacioglu, R.; Ogando, G.; Nikonchuk, T.; Melvin, S. (2) May, M.; Mapula, M.; Lwin, J.; Hietamaa, D.; Hernandez, C.; Boyacioglu, N.; Sturm, A.; Melvin, K. (3) Thom, J.; Mapula, E.; Nault, M.; Teasdale, P.; Wright, P.; Pérez, L.; Shenefelt, M.; Pak, H. (4) Murphy, M.; Campaña, J.; Stewart, S.; Cereda, M.; Reed, M.; Pérez, A.; Teasdale, W.; Pak, J. (5) Stewart, D.; Wright, A.; Cereda, P.; Nikonchuk, F.; Reed, J.; Hietamaa, K.; Ogando, C.; Shenefelt, R. (6) Murphy, T.; Hernandez, J.; Nault, M.; Bunn, B.; Thom, R.; Dahlstedt, T.; Lwin, Z.; May, R.; Sturm, A.
[Litrato ed pahina 24]
Iner so laen mi?