Nangraduar Iran Estudyante ed Salita na Dios

DIAD pangaalig ed inmunan-siglon Kristianos, akabatan iray Tastasi nen Jehova ed sankamundoan lapud kada-puertan panagpulong. Nidanet iyan kimey diad manangilukas a parti na programa na koma-102 a klase na Watchtower Bible School of Gilead.

Nen Marso 1, 1997, si Albert Schroeder, membro na Mananguley ya Ulop na Tastasi nen Jehova, so angipaimano ed agano nin artikulo ed Pranses a palapagan a Le Point. Nikuan ya iplaplano na Romano Katoliko ya igapoy panagkabkaabungan diad Italya. “Pian [saray misioniro na Vatican] so agkalimaliman onsabi legay pikompetensya ra ed teritorya na Tastasi nen Jehova,” inkuan na artikulo, “nampaimprinta ni ingen so Vatican na sakey milyon a kopyay Ebanghelyo nen San Marcos, unong ta miaarapan iray ibabaki ra ed saray eksperto [Tastasi] diad kada-puertan ‘panangipalima’ ed maong a balita.”

Saray 48 nangraduar so kaiba na saramay onaalig ed eksperton panagpulong iran metodo nen Jesus diad panangikayat ed Salita na Dios. Sikaray nanlapud waloran daldalin a linma’d Watchtower Educational Center ed Patterson, New York. Legan na limay bulan a paneeskuela ra, naaral day intiron Biblia. Nilaktip met ed kurso ra so awaray organisasyon na Dios, praktikal iran aspeto ed bilay na misioniro, tan saray bunga na espiritu na Dios. Amin na saya et saksakey so gagala ed kanonotan​—pian iparaan ira ed panagmisioniro ed biek-taew diad 17 daldalin a kibakian da. Diad pangraduar da, 5,015 na internasyonal a dumerengel so akigayaga’d okasyon. Antoy unor a praktikal a konsehon naawat na saray estudyante na Gilead?

Nipanpanaon a Panamaseseg Parad Balon Misioniros

Kayari manangilukas a parti na tsirman, si Ralph Walls, katulongan na Personnel Committee na Mananguley ya Ulop, so inmunan nampaliwawa’d antikey na praktikal a simbawa parad balon misioniros. Say tema to et “Lawas Tandaay Pangaro.” Impabitar toy impangipasakbay na Biblia, diad 2 Timoteo kapitulo 3, a say mundo so ompalalon andiay aro. Inter to iyan nipanpanaon a panonot ed balon misioniros, a mitunosan ed deskripsion na aro ed 1 Corinto 13:1-7: “Sikayoran misioniro, nayarin nalampasan yoy kalat yon oras. Anganko ta walaan kayo na daakan a pikakabat manlapud inkipasal yo’d Gilead. Odino nayarin siseseseg tayon man-overtime ed saray asainmin tayo ed sanga. Balet baliwalan amin iray impansagpot tan impansakripisyo tayo no lingwanan tayoy mangaro.”

Say tinmumbok et si Carey Barber, na Mananguley ya Ulop, ya angidalatdat ed teman “Itotonton Itayo nen Jehova a Manbiktorya.” Manlapud daiset a gapoan da kayari Guerra Mundial I, intonton la nen Jehova a Dios iray matoor ya ariripen to a manbiktorya ed panangiproklama na maong a balita na Panarian to, anggaman ed panamasegsegang. Nen 1931 saray Estudyante na Biblia, bilang datin kabat ed sikara, so angadapta ed ngaran a Tastasi nen Jehova, ya akaingongotan na klero na Kakristianoan. “Say koma-102 a klase na nipasal-ed-Gilead a misioniros so walaan natan na engranden pribilihyo ed pamalaknab a pibiang ed maglorian kimey a panangiter na dakel a posiblin pankanawnawa a naamtaan itan a sagradon ngaran,” inkuan nen Brother Barber. Niarum ira ed andukey a listaan na 7,131 a misioniron nipasal la’d Gilead School tan makakatulong a mangilaknab ed panangipulong ed Salita na Dios manlapud 54 daldalin nen 1943 ya anggad 233 a daldalin natan.

Say tinmumbok ya espiker, si Lloyd Barry, membro met na Mananguley ya Ulop, a nansumpal ed koma-11 a klase na Gilead tan nanmisioniro ed Hapon diad loob na masulok a 25 taon. Sikatoy amaseseg diad tema ton, “Mansiansia ed Sarayan Bengatla.” “Dakel so gayaga ed panagsungdo,” inkuanto’d saray estudyante. Antoray tumang no mansungdo ed panagmisioniro odino dinanman a teokratikon asainmin? “Manuna ed amin, mamaliket ed puso nen Jehova so panagsungdo tayo . . . Naromog so baleg ya inkapnek diad pansiansian matoor ed silong na subok . . . Gawa yon bilay yoy panagmisioniro . . . Say tumang so makapaligsay-puson ‘maabig a gawa.’” (Mateo 25:21; Uliran 27:11) Diad panasampot ed paliwawa to, impapuson inrekomenda nen Brother Barry ed balon misioniros a “mansiansia ed sarayan bengatla” diad pagmaliw a determinado a say misioniron lawak so magmaliw a mismon kabibilay da.​—1 Timoteo 4:16.

“Antoy Nanengneng Yo?” so intepet nen Karl Adams, ya akapibiang ed impanbangat ed dakel lan klase ed Gilead. Impabitar ton say nanengneng na balon misioniros ed asainmin da et aglabat mandidipindi ed literal a pakanengneng noagta ontan met ed kamataan na puso ra. (Efeso 1:18) Niyilustra iya ed anengneng na saray espiyan Israelita sanen sinurbi da so Insipan a Dalin. Pariho so anengneng na amin a 12 espiya manlapud panmoria na too, balet duatduara so akanengneng ed Insipan a Dalin unong ed punto-de-bista na Dios. Namoria met na misioniros iray bengatla ed nanduruman dalan. Diad arum a daldalin a panlingkoran da, nayarin naimano ray inkaduka, kairapan, tan inka-andiay ilalo. Balet kaukolan ya ag-ira manigatibo a taynan da lay asainmin da. Sinalambit nen Brother Adams so inkuan na sakey a misionira ed agano nin klase: “Inpamoria na sarayan eksperiensia a kaukolan a mansiansia ak dia. Nakaukolan na sarayan totoo so ilalo parad arapen. Labay kon napaaligwas so kabibilay da.” Sinampotan nen Brother Adams diad impamaseseg ed balon misioniros ya ikuenta ray daldalin a kiasainan da bilang lugar a denitermina nen Jehova a kabiangan na sankagloboan a Paraiso To tan moriaen so totoo diman bilang prospektibon membro na balon mundon sosyedad.

Say unor a diskurso na programa so parti nen Wallace Liverance, a nanlingkor ed dakel a taon ed pan-misioniron lawak sakbay a nagmaliw ya instruktor ed Gilead. “Onkiwas Tekep na Aralem a Pakatalos Diad Makapakelaw Iran Gawa na Dios” so tema to. Say ikikiwas tekep na aralem a pakatalos et lalanoren toy ikiwas a walaay kasiliban, kaalwaran, tan sentido komon. Ag-itan agawaan nen Arin Saul ed Israel.​—1 Samuel 13:9-13; 15:1-22.

Say sakey a paraan ya ikiwas tekep na aralem a pakatalos et diad pangawat ed saray angat a miadapta’d balon paraan na panagbilay, pati panaral ed balon lenguahe tan pangamta ed totoo. Saray eksperiensia na misioniros diad panangabet ed saray angat tan pananalona ed saray babeng so mamabiskeg ed sikara diad espiritual a paraan a singa ed akapabiskegan di Josue tan Caleb legan a kokobkoben da so dalin ya inter na Dios ed sikara.

Saray Interbio

Inlaktip na tinmumbok a parti na programa so mantutumbokan iran interbio. Ininterbio nen Harold Jackson si Ulysses Glass, a managrehistro (registrar) tan abayag lan instruktor na Gilead School, ya 85 años to la natan. Sankanonot na dakel nin manmimisioniro iray taon na matoor ya impanbangat tan impangipasal to. Sinmumblay si Mark Noumair, instruktor na Gilead a nanlingkor ed pigaran taon diad Aprika sakbay a kaiban managbangat (staff) ed Gilead School. Ininterbio toray estudyante nipaakar ed ministeryo ra legan na limay bulan ya impaneskuela ra. Malinew ya impatnag na saray eksperiensia ra a walaray totoon interesado ed Salita na Dios ed lokal a teritorya.

Insan kinatongtong nen Robert Ciranko tan Charles Molohan iray eksperiensiadon lalaki a manaaral met ed sananey diad pasilidad, ya eskuelaan parad personahe sanga. Inlaktip na simbawa ra’d mangraduar a klase a nakaukolan a manpaabeba tan mitulongan ed pankakasakey na kongregasyon. Insuhiri ra’d saray mangraduar ya agnawalaay padesir no antoy nagawa ed panagmisioniro ra noagta, imbes, basta awatey antokaman ya onsabi. Say pangiyaplika ed sayan konseho so maseguron ontulong ed balon misioniros a manumpal ed asainmin da bilang managbangat ed Salita na Dios.

Kaunoran, si Theodore Jaracz, membro na Mananguley ya Ulop, so angipaliwawa’d dumerengel na teman “Siopay Naiimpluensyaan?” Impaliwawa ton sano ipatnag tayo bilang Kristianos ira bunga na espiritu, magmaliw itayon maong ya impluensya ed arum a totoo. “Saray misioniron imbabaki na organisasyon nen Jehova so akapawala lay nakomendaan a rekord ed impakaimpluensya’d totoo diad mabunigas, espiritual a paraan,” inkuanto. Insan to binitla iray inkomento na saray indibidual a natutulongan a manlingkor ed Dios bilang resulta na maong iran alimbawan impanengneng na misioniros. “Namantini yo komon so reputasyon ya agamoran na totoo nen Jehova tan tuloytuloy ya ontoktok ed saray puerta diad biek-taew ya asainmin yo pian naanap iray makana . . . Ontan met, diad maptek tan malinis a kondukta yo, resistian so espiritu na sayan mundo, tan magmaliw a maong ya impluensya diad kirayewan tan kigalangan nen Jehova,” so insampot to.

Diad pangisampot ed programa, imbasa na tsirman iray pabano manlapud nanduruman pasen insan inter iray diploma tan inyanunsio iray panmisioniron asainmin. Kayari na satan, binasa na sakey ed saray nangraduar so resolusyon na klase a mangibabalikas na pisasalamat parad nitaryan instruksion. Malinlinew, say programa ed koma-102 so lalon amadeterminado ed amin ya inmatendin onabanti ed panangipalapag ed Salita na Dios.

[Litrato ed pahina 31]

Koma-102 a Klase na Watchtower Bible School of Gilead

Diad listaan ed leksab, saray dasig so anumeroan manlapud arap a pabeneg, tan saray ngaran so akalista manlapud kawigi a manpakawanan ed kada dasig.

(1) Duffy, C.; Alexis, D.; Harff, R.; Lee, J.; Corey, V.; Nortum, T.; Mora, N.; Journet, F. (2) Djupvik, L.; Singh, K.; Hart, B.; Kirkoryan, M.; Lee, S.; Rastall, S.; Zoulin, K.; Kollat, K. (3) Singh, D.; Pitteloud, J.; Pitteloud, F.; Bokoch, N.; Torma, C.; Muxlow, A.; Richardson, C.; Nortum, D. (4) Harff, J.; Journet, K.; Barber, A.; Loberto, J.; Loberto, R.; Muxlow, M.; Mora, R.; Hart, M. (5) Torma, S.; Rastall, A.; Diaz, R.; Diaz, H.; Weiser, M.; Weiser, J.; Kirkoryan, G.; Zoulin, A. (6) Alexis, R.; Barber, D.; Djupvik, H.; Duffy, C.; Kollat, T.; Richardson, M.; Bokoch, S.; Corey, G.