Say Sankabalgan a Toon Nambilay ed Kapiganman

Kapitulo 80

Saray Panangipokokan na Karnero tan say Managpastol

Si Jesus so linma ed Jerusalem parad Piesta na Dedikasyon, odino Hanukkah, sakey a piesta a maniselebra na panangidedika-lamet na templo ed si Jehova. Nen 168 K.K.P., ngalngalin 200 a taon ed asasakbay, dinakep nen Antiochus IV Epiphanes so Jerusalem tan dinumsisan so templo tan say altar to. Anggaman ontan, taloran taon ed saginonor et say Jerusalem so abawi tan say templo so indedika-lamet. Kayari na saya, sakey a tinaon a panangidedika-lamet a selebrasyon so gagawaen.

Sayan Piesta na Dedikasyon so nagagawa ed Chislev 25, say Judion bulan a mipetekan ed unor a kabiangan na Nobyembre tan ununan kabiangan na Disyembre diad modernon kalendaryo tayo. Kanian, masulok lambengat a sanlasus ya agew so nakekeraan anggad makatantandan Paskua na 33 K.P. Lapud saman so ambetel a panaon, tatawagen nen apostol Juan itan bilang “panaon na ambetel.”

Si Jesus so angusar natan na sakey ya ilustrasyon a diad satan et sikatoy anaglawi na taloran panangipokokan na karnero tan say betang to bilang say Maabig a Managpastol. Say ununan panangipokokan na karnero a sinaglawi to so abidbiran ed uksoyan na Mosaikon Ganggan a sipanan. Say Ganggan so kinmanan pader, a mangibibiig ed saray Judio manlapud makaderal iran agamil na saramay totoon anggapod sayan nikaduman sipanan ed Dios. Impaliwawa nen Jesus: “Tua, tua, kuan ko ed sikayo, Say ag onloob ed pinto na panangipokokan ed saray carnero, ingen onkalab ed sananey a dalan, sikato lanlamang so matakew tan tulisan, Balet say onloob ed pinto sikato so pastor na saray carnero.”

Arum so sinmabi tan nankuan bilang Mesias, odino Kristo, balet sikara so aliwan samay tuan managpastol ya intultuloy a sinalambit nen Jesus: “Sikato so ilukasan na bantay pinto; tan saray carnero dengelen da so voces to: et tawagen to so saray carnero to ed dilin ngaran da, tan sikara so ipaway to. . . . Et ag da tomboken so sankaili, ingen sikato’y ibatikan da: ta agda kabat so voces na saray sankaili.”

Say “bantay pinto” na ununan panangipokokan na karnero et si Juan a Managbautismo. Bilang bantay pinto, say puerta so ‘nilukasan’ nen Juan ed si Jesus diad impangipakabat ed sikato ed saraman a simbolikon karnero a sikaray ipaway to pian tengtengen ed panagpastolan. Sarayan karnero a tatawagen nen Jesus ed ngaran tan ipapaway so diad kaunoran et aawaten ed sananey a panangipokokan, a singa ipapaliwawa to: “Tua, tua kuan ko ed sikayo, Siak so pinto [na] saray carnero,” salanti, say puerta na sakey a balon panangipokokan na karnero. Sanen inletneg nen Jesus so balon sipanan ed saray babangatan to tan manlapud tawen et inkalbo ed sikara so masanton espiritu ed tinmumbok a Pentecostes, sikara so inawat ed sayan balon panangipokokan na karnero.

Diad malaglaem nin pangipapaliwawa ed betang to, inkuan nen Jesus: “Siak so pinto: no wala’y onloob ed siak, sikato so nilaban, tan sikato’y onloob tan onpaway naani, tan makaromog na panangipakanan. . . . siak linma ak dia pian nawalaan ira na bilay, tan nawalaan ira na daakan. . . . Siak so maong a pastor; et kabat ko so saray kayarian ko, tan saray kayarian ko kabat da ak, salanti unong a say Ama kabat to ak, tan siak kabat ko so Ama; et italagak so bilay ko nipaakar ed saray carnero.”

Agano ni, inabagey nen Jesus iray patumbok to, a kuanto: “Agkayo antakot, daiset a papastolan [melag a pulok, NW]; ta kaliktan na Ama yo ya iter ed sikayo so panarian.” Sayan melag a pulok, a diad kaunoran et manbilang na 144,000, so onla ed sayan balo, odino komadua, a panangipokokan na karnero. Balet intultuloy nen Jesus ya inimano: “Wala ni ray arum a carneroc, ya ag ira taga dia ed saya a panangipokokan: kaokolan ya awiten ko ra met, et dengelen da so voces ko; et magmaliw ira’n saksakey a polok, saksakey ya pastor.”

Lapud say ‘arum a carnero’ so “ag ira taga dia ed saya a panangipokokan,” maseguron sikaray wala ed sananey a panangipokokan, odino diad komatlo. Sarayan unor a duaran panangipokokan, odino saray kural na karnero, so walaan na nandumaan ya ilalo. Say “melag a pulok” ed sakey a panangipokokan so manuley a kaiba nen Kristo ed tawen, tan say ‘arum a carnero’ ed samay sananey a panangipokokan so manbilay ed Paraison dalin. Ingen, anggaman walad duaran panangipokokan, saray karnero so ag-onibeg, nisay liknaen dan sikaray nibiig, lapud singa inkuan nen Jesus, “magmaliw ira’n saksakey a polok” ed silong na “saksakey ya pastor.”

Say Maabig a Managpastol, si Jesu-Kristo, so mabulos ya angiter na bilay to parad parehon panangipokokan na karnero. “Sikato so iter ko manlapu ed inkasiak,” inkuanto. “Wala’y pakayarik ya [mangiter] na bilay ko, tan wala so pakayarik a mangala lamet ed sikato. Saya’n gangan inawat ko ed Amak.” Sanen inkuan nen Jesus iya, awalaay inkaapag-apag ed limog na saray Judio.

Dakel ed karaklan so angikuan: “Sikato so walaan na demonio, tan makulangkulang; akin et sikato’y dengelen yo?” Balet arum so inmebat: “Saraya ag ira salita na aselepan na demonio.” Insan, mapatnag a manutukoy ed apalabas a duaran bulan ed impamaabig to ed sakey a lakin niyanak a bulag, inyarum da: “Nayarian ta na demonio so mangilukas na saray mata na bulag?” Juan 10:1-22; 9:1-7; Lucas 12:32; Apocalipsis 14:1, 3; 21:3, 4; Salmo 37:29.

▪ Anto so Piesta na Dedikasyon, tan kapigan a satan so seselebraan?

▪ Anto so ununan panangipokokan na karnero, tan siopa so bantay pinto to?

▪ Panon a say puerta so nilukasan na bantay pinto pian onloob so Managpastol, tan diad anto so angawatan ed sarayan karnero?

▪ Siopa so mangilalaman na duaran panangipokokan a walad silong na Maabig a Managpastol, tan sikaray magmaliw a pigaran polok?