Say Sankabalgan a Toon Nambilay ed Kapiganman

Kapitulo 81

Nagkalalo nin Getman Pamatey ed si Jesus

Lapud saman so panaon na ambetel, si Jesus so manaakar ed asiruman a pasen a tatawagen a pinto nen Solomon. Saman so walad gilig na templo. Dia et sikatoy niliktob na saray Judio tan ginmapon angikuan? “Kaonongan kabayag so panpaduaruam ed sikami? No sika si Cristo, ibagam a malinew ed sikami.”

“Inbagak ed sikayo,” inyebat nen Jesus, “et ag kayo manisia.” Ag-imbagan diritsa nen Jesus a sikato imay Kristo, a singa samay imbaga to’d Samaritanan walad abay na bobon. Ingen ta singa met lanlamang imparungtal to so pakabidbiran to sanen impaliwawa to ed sikara a sikato so nanlapud tagey tan niwala la sakbay nen Abraham.

Anggaman ontan, kaliktan nen Jesus a nasabin natebek na totoo ed inkasikaran dili a sikato imay Kristo diad pangipareng da ed saray aktibidad to ed samay impasakbay na Biblia a gawaen na Kristo. Satan so rason no akin a diad asasakbay et binilin toray babangatan ton ag-ibaga ed siopaman a sikato imay Kristo. Tan satan so rason no akin ya intuloy ton imbaga ed sarayan maruksan Judio: “Saray gawa a gawaen ko ed ngaran nen Amak, sikara ya so mantasi ed siak. Balet ag kayo manisia.”

Akin a sikara so agmanisia? Kasin lapud kulang so ebidensya a si Jesus imay Kristo? Andi, noagta lapud rason ya inter nen Jesus sanen inkuanto’d sikara: “Aliwa kayo a kaiba na saray carnerok. Saray carnerok dengelen da so voces ko, et kabat ko ra, tan ontombok ira ed siak: Et iter ko ed sikara so maando a bilay; et ag ira natawtaw angan kapigan, tan angapo so mansamsam ed sikara ed limak. Si Amak, ya angiter ed sikara ed siak, sikato so balbaleg nen amin; et angapo so makayari’n manamsam ed sikara ed lima na Ama.”

Insan deneskribe nen Jesus so maapit a siglaotan to ed kinen Ama to, ya ipapaliwawa: “Siak tan say Ama saksakey kami.” Lapud si Jesus so walad dalin tan say Ama to so walad tawen, malinew a sikatoy agmangibabagan sikato tan say Ama to so literal, odino pisikal, a saksakey. Imbes, labay ton ibaga a sikaray walaan na saksakey a gagala, a sikara so walaan na pankakasakey.

Diad inkasanokan ed saray salita nen Jesus, saray Judio so anukdok na saray bato pian sikatoy pateyen, a singa ginawa ra’d asasakbay, legan na Piesta na saray Tabernakulo, odino kobongkobong. Sipapakpel ya aarapen iray magmaliw-komon a managpatey to, inkuan nen Jesus: “Amayamay a maong a gawa so inparongtal ko ed sikayo a nanlapu ed Ama; dinan ed saratan a gawa so makasengeg na panupakan yo ed siak?”

“Ag mi ka tupaken nisengeg ed maong a gawa,” inyebat da, “ingen lapu ed salita a mabanday; tan lapu ed sika, anta too ka, gawaen mo so inkasika a [sakey a dios, NW].” Bangta agbalot imbaga nen Jesus a sikatoy sakey a dios, akin ya ibabaga iya na saray Judio?

Mapatnag a saman so lapud ipapasen nen Jesus ed inkasikato iray pakayari a sisiaen dan say Dios lambengat so walaan na kanepegan. Alimbawa, kapkapangibaga to lambengat nipaakar ed saray ‘carnero,’ “Iter ko ed sikara so maando a bilay,” a bengatlan agnagawaan na too. Anggaman ontan, agnaimano na saray Judio so katuaan a bibidbiren nen Jesus a sikatoy akaawat na autoridad manlapud Ama to.

A bibidbiren nen Jesus a sikatoy agmatalona nen say Dios, intumbok ton impanengneng diad panetepet: “Ag ta nisulat ed gangan yo [diad Salmo 82:6], Inkuan ko, Sikayo dirios kayo? No sikato inngaran to ra a dirios so saray sinabian na salita na Dios, . . . Inkuan yo ed saya so pinasantos tan inbaki nen Ama dia ed mundo, Sika mansalita ka na mabanday; nisengeg ed inkuan ko, Siak so Anak na Dios?”

Lapud say Kasulatan so manatawag ed anggan saray agmakatunongan ya ukom bilang “dirios,” anton lingo so naromog na sarayan Judio diad pangibabaga nen Jesus, “Siak so Anak na Dios”? Inyarum nen Jesus: “No ag ko gawaen so saray gawa nen Amak, ag yo ak sisiaen. Balet no sikara so gawaen ko, angan ag yo ak sisiaen, sisiaen yo so saray gawa: pian nakabatan yo tan natalosan yo ya say Ama wala ed siak, tan siak wala ak ed Ama.”

Sanen imbaga nen Jesus iya, sinali na saray Judio a sikatoy singkaten. Balet ta sikatoy akabatik, a singa agawaan to diad Piesta na saray Tabernakulo. Sikato so tinmaynan ed Jerusalem tan nambaroy a binmaliw ed Ilog Jordan ya angigapoan nen Juan a manbautismo a ngangalin apatiran taon ed akadkauna. Mapatnag a sayan pasen so ag-arawi manlapud mamaabalaten a baybay na Dayat na Galilea, a duay-agew a panbaroy odino onsulok ni manlapud Jerusalem.

Dakel a totoo so linma ed kinen Jesus diad sayan pasen tan ginmapon angikuan: “Si Juan peteg ya ag [nanggawa] na tanda: balet ami bengabengatla’n sinalita nen Juan nipaakar ed saya’n too sikara so tua.” Kanian dakel dia so anisia ed si Jesus. Juan 10:22-42; 4:26; 8:23, 58; Mateo 16:20.

▪ Diad panamegley na anton paraan a kaliktan nen Jesus a sikatoy nabidbiran na totoo bilang samay Kristo?

▪ Panon a si Jesus tan say Ama to so saksakey?

▪ Mapatnag, akin ya ibabaga na saray Judio a gagawaen nen Jesus so inkasikaton sakey a dios?

▪ Panon a say impangaon nen Jesus manlapud Salmo et mangipapanengneng ya agto ibabagan sikatoy kasimbang na Dios?