Manepeg Kasin Manpikasi Ka ed si Jesus?

IPAPASEN na arum a totoo a matukoy so panpikasi ed si Jesus. Diad Alemanya, dakel so nababangatan legan na inka-ugaw a sakbay na pangan et kaukolan dan pantekepay dakulap da tan misalamat ed si Jesu-Kristo.

Unong ed Biblia, talagan si Jesus et walaay atagey a posisyon ed tawen. Anggaman ontan, kasin satan et kabaliksan ton sikatayo so kaukolan a manpikasi ed sikato? Nayarin sakey ka ed saramay, lapud aro ed si Jesus et direktan manpikasi ed sikato, balet anto kasi mismon panmoria nen Jesus ed ontan iran pikakasi?

Ununa, akin ta apalesa irayan tepet? Lapud ibabaga na Biblia a si Jehova a Dios so “Dumerengel na Pikakasi.” Agpankelawan, sirin, a saray ariripen na Dios ed kadaanan a panaon, a singa saray Israelita, so nampikasi lambengat ed si Jehova a Dios, say Makapanyarin-amin.​—Salmo 5:1, 2; 65:2, NW.

Kasin anguman iray bengatla sanen si Jesus, say Anak na Dios, so sinmabi’d dalin pian iliktar so katooan manlapud kasalanan tan ipapatey? Andi, saray pikakasi so siansian nipapaarap ed si Jehova. Sanen wadiad dalin a mismo, si Jesus so mabetbet a nampikasi ed mangatatawen ya Ama to, tan imbangat toray arum ya ontan met so gawaen da. Isipen pa lambengat so modelon pikakasi, no maminsan et tatawagen a Pikakasi na Katawan odino say Ama Mi, a sakey ed saray kabkabat a tuloy a pikakasi ed mundo. Ag-itayo imbangat nen Jesus a manpikasi ed sikato; inter to ed sikatayo iyan modelo: “Ama mi’n wala ka ed tawen, nagalang komon so ngaran mo.”​—Mateo 6:6, 9; 26:39, 42.

Natan imanoen tayo pa so teman nagkalalo ni diad pangusisa no anton talaga so pikakasi.

Anto so Pikakasi?

Kada pikakasi et sakey a pormay panagdayew. Pepekderan iya na The World Book Encyclopedia, a kuanto: “Say pikakasi so sakey a pormay panagdayew a diad panamegley to et say sakey a too et mangiter na debosyon, pisasalamat, panangipatua, odino kerew ed Dios.”

Diad sakey ya inkagawa et inkuan nen Jesus: “Nisulat, Mikasika ed Katawan [Jehova, NW] a Dios mo tan sikato lambengat so panlingkoran mo.” Nansiansia si Jesus ed manunan katuaan a say panagdayew​—sirin ontan met ed pikakasi​—so nepeg a nipaarap ed kinen Ama to lambengat, si Jehova a Dios.​—Lucas 4:8; 6:12.

Panamidbir ed si Jesus Diad Saray Pikakasi Tayo

Si Jesus so inatey ya onkanan dondon bagat parad katooan, pinaoli na Dios, tan nitandoro ed atagtagey a posisyon. Singa naisip mo, amin na saya so talagan angitarok na pananguman nipaakar ed naabobonan iran pikakasi. Diad anton paraan?

Dedeskribien nen apostol Pablo so baleg ya impluensya na posisyon nen Jesus ed saray pikakasi a singa onggendan: “Kanian say Dios met sankatageyan so inpangidayew to ed sikato, tan inter to ed sikato so ngaran ya analonggaring ed amiamin a ngaran; A dia ed ngaran a Jesus so talimokoran na amin a pueg, na saray wala ed tawen, tan wala ed dalin tan wala ed dalem na dalin, tan pian ganagana a dila nepeg da a patuaen ya si Jesu-Cristo sikato so Katawan, a kidayewan na Dios Ama.”​—Filipos 2:9-11.

Kasin saray salitan “dia ed ngaran a Jesus so talimokoran na amin a pueg” et kabaliksan ton sikatayoy manpikasi ed sikato? Andi. Say sasaglawien a Griegon balikas dia et “mangipapabitar ed ngaran a nepeg a talimokoran, ya amin so mankakasakey (πᾶν γόνυ) a mandayew. Say ngaran ya inawat nen Jesus so mamapakiwas ed amin ed nankakasakey a panagdayew.” (A Grammar of the Idiom of the New Testament, nen G. B. Winer) On, pian naabobonan so sakey a pikakasi, nepeg itan a niparungtal “dia ed ngaran nen Jesus,” balet, anggaman kuan et nipaarap ed si Jehova a Dios tan onkanan kigloriaan to. Lapud saya, onia so inkuan nen Pablo: “Noag dia ed ganagana lapu ed pikakasi tan pikekerew a tekep na pisasalamat nipakabat komon ed Dios so saray kerew yo.”​—Filipos 4:6.

No panon a say basbas et mangipaarap ed sakey a pugtaan, ontan met a si Jesus so “dalan” a mangipaarap ed Dios a Makapanyarin-amin. “Siak so dalan, tan say katuaan, tan say bilay: angapo so ondateng ed Ama, no ag dia ed panamegley ko,” so imbangat nen Jesus ed apostoles to. (Juan 14:6) Kanian, nepeg tayon iparungtal iray pikakasi tayo ed Dios diad panamegley nen Jesus tan aliwan direkta ed si Jesus a mismo.a

‘Balet,’ nayarin itepet na arum, ‘agta ibabaga na Biblia a namparan si babangatan ya Esteban tan si apostol Pablo so akisalita ed si Jesus diad tawen?’ Tua itan. Anggaman ontan, sarayan ebento, so ag-angilanor ed saray pikakasi, unong a si Esteban tan Juan so akanengneng ed si Jesus diad pasingawey tan akisalita ed sikaton direkta. (Gawa 7:56, 59; Apocalipsis 1:17-19; 22:20) Tandaan a say pitongtong lambengat ed Dios so agmankabaliksan a sakey a pikakasi. Si Adan tan si Eva so akitongtong ed Dios, a nambabaraan ed baleg a kasalanan da, sanen inukom To ra kayari impankasalanan da ed Eden. Say impitongtong da ed sikato ed ontan a paraan so aliwan sakey a pikakasi. (Genesis 3:8-19) Kanian, aliwan susto so pangisitas ed impitongtong nen Esteban odino si Juan ed si Jesus bilang ebidensya a sikatayo so talagan manepeg a manpikasi ed sikato.

Panon a say Ngaran nen Jesus so ‘Tinawag’?

Walaan ka ta ni na panduaruwa, a siansian ipapasen a manepeg so panpikasi ed si Jesus? Onia so insulat na sakey ya asawan bii ed sangan opisinay Watch Tower Society: “Makapaermen, agak ni siansian kumbinsido a saray inmunan Kristiano so agnampikasi ed si Jesus.” Walad kanonotan toray salita nen Pablo diad 1 Corinto 1:2, a sinaglawi to ditan ya “amin a manawag ed ngaran na Katawan tayo a Jesu-Cristo ed balang pasen.” Anggaman ontan, nepeg ya imanoen na sakey a diad orihinal a lenguahe, say balikas a “manawag” so mankabaliksan na dakel a bengatlan nilikud ed panagpikasi.

Panon a say ngaran nen Kristo so ‘tatawagen’ ed inerman? Sakey a paraan et sanen saray patumbok nen Jesus ed Nazaret so parungtalan ya amidbir ed sikato bilang say Mesias tan “Manangilaban na mundo,” a nanggawa na dakel a mamilagron gawa diad ngaran to. (1 Juan 4:14; Gawa 3:6; 19:5) Kanian, onia so ibabaga na The Interpreter’s Bible nipaakar ed satan a balikas a “manawag ed ngaran na Katawan tayo . . . et kabaliksan toy pangipatua ed inka-katawan to imbes ed say panpikasi’d sikato.”

Say pangawat ed Kristo tan pangagamil na pananisia ed nipaagos a dala to, a manggawan posibli’d kaperdonay kasalanan, so nipasen met a “manawag dia ed ngaran na Katawan, Jesu-Cristo.” (Ipareng so Gawa 10:43 ed 22:16.) Tan literal a sasaglawien tayoy ngaran nen Jesus kapiganman a sikatayoy manpikasi ed Dios diad panamegley to. Kanian, bangta nipapanengneng a sikatayoy makatawag ed ngaran nen Jesus, ag-ipapanengneng na Biblia a sikatayoy nepeg a manpikasi’d sikato.​—Efeso 5:20; Colosas 3:17.

No Anto so Nagawaan nen Jesus Parad Sikatayo

Malinlinew ya insipan nen Jesus ed saray babangatan to: “No onkerew kayo na anto kaman ed ngaran ko, satan so gawaen ko.” Kakaukolanen ta na saya so panpikasi ed sikato? Andi. Say ikekerew et nipaarap ed si Jehova a Dios​—balet diad ngaran nen Jesus. (Juan 14:13, 14; 15:16) Kekerewen tayo ed Dios a say Anak To, si Jesus, so mangusar ed baleg a pakayari tan autoridad to ed biang tayo.

Panon a mitatalosan si Jesus ed saray tuan patumbok to natan? Say deskripsyon nen Pablo ed kongregasyon na alanaan a Kristianos so nayarin onkanan sakey ya ilustrasyon. Impareng to iya ed sakey a laman tan si Jesu-Kristo so ulo. Say “Olo” so mangiiter ed saray membro na espiritual a laman na saray pankaukolan da diad paraan na “saray nanlalangoan tan saray olaolat,” odino diad saray paraan tan saray oksuyan na panangitarok na espiritual a katagano tan panangiwanwan ed kongregasyon to. (Colosas 2:19) Diad mipadparan dalan, uusaren natan nen Jesus so “langkap iran totoo, NW” odino kualipikadon lalaki ed espiritual, pian mangidaulo ed kongregasyon, a mangipapakurang ni ingen na panangorihe no satan so nakaukolan. Anggapo so probisyon parad saray membro na kongregasyon pian direktan mitalosan ed si Jesus odino manpikasi ed sikato, balet maseguron sikaray kaukolan​—on, nepeg​—a sikaray manpikasi ed Ama nen Jesus, si Jehova a Dios.​—Efeso 4:8-12.

Panon Mon Igagalang si Jesus?

Nipaakar ed kililiktar na totoo, agaylan baleg so betang nen Jesus! Onia so inyabawag nen apostol Pedro: “Et angapo so arum ya kilabanan: ta angapo so arum a ngaran ed lepsag na tawen, ya niiter ed saray totoo, a nayarin kilabanan tayo.” (Gawa 4:12) Kasin antam so kaimportantian na ngaran nen Jesus?

Agtayo leleglemewen so posisyon to diad agpangipapaarap na saray pikakasi ed si Jesus a personal. Imbes, si Jesus so gagalangen sano manpipikasi tayo ed ngaran to. Tan no panon a saray anak et igagalang daray ateng da diad pagmaliw a matulok, gagalangen tayo si Jesu-Kristo diad itulok ed saray ganggan to, nagkalautla ed balon ganggan a manaaroan so sakey tan sakey.​—Juan 5:23; 13:34.

Naabobonan Iran Pikakasi

Kasin pilalek moy pangitarok na naabobonan iran pikakasi? Sirin ipaarap mo iratan ed si Jehova a Dios, tan gawaen itan diad ngaran na Anak to, si Jesus. Amtaen so linawa na Dios, tan ipatnag mo ed saray pikakasim a natatalosan mo itan. (1 Juan 3:21, 22; 5:14) Mangala na biskeg manlapud saray salita na Salmo 66:20: “Nagalang so Dios, sikato ya agto inyarawi so pikakasik, nisay inyarawi to so panangasi to ed siak.”

Unong ya anengneng tayo la, saray pikakasi so pormay panagdayew a nikabkabiig a kien lambengat na Makapanyarin-amin a Dios. Diad pangipapaarap na amin a pikakasi tayo ed si Jehova a Dios, ipapatnag tayo a tutumboken tayo so bilin nen Jesus ya ipikasi: “Ama mi’n wala ka ed tawen.”​—Mateo 6:9.

[Paimano ed leksab]