Report na Saray Manangiyabawag na Panarian
Mabulbulos ya Iyaapay na Totoo na Dios so Inkasikara
JOSE so ngaran to, tan sikatoy niyanak ed isla na Cyprus. Sikatoy sakey ed inmunan-siglon Kristianos ya angilako na kaumaan tan abu-abung pian makatulong ed pinansyal parad kiyabanti na Inkakristiano. Lapud sayan inkamaaro tan inkabunlok, sikatoy akabatan bilang Bernabe, a mankabaliksan na “Anak na Ligliwa.”—Gawa 4:34-37, NW.
Say ontan a masimoon ya interes ed arum so lawas tatak na saray tuan managdayew nen Jehova. Ontan met iray Tastasi nen Jehova natan, unong ya ipapabitar na onggendan ya eksperiensia manlapud Solomon Islands.
Sakey a grupo na masulok a 60 Tastasin nanlapud Australia tan New Zealand so nanbiahe a mamaarap ed Honiara, say kabisera ed Solomon Islands ed Guadalcanal. Linma ira diman pian ontulong ed panangipaalagey ed sakey ya Assembly Hall parad baleg a Kristianon pantitipon. Sikaray angusar na kulang a duaran simba lambengat pian ipaalagey so hall a say nayarin makayurong et ngalngali 1,200!
Diad saman met a panaon, saray lokal ya autoridad na melag a baley na Munda, ed isla na New Georgia, so amalabo ed kongregasyon na Tastasi nen Jehova na sakey a lote diad mismon sentro na baley. Nilabay day mangipaalagey na sakey a Kingdom Hall, sakey a panagdayewan. Tan talagan nakaukolan da iman. Sikaray manmimiting ed sala na leaf house, balet andian ira na gastosen ed pangipaalagey na Kingdom Hall.a Say kongregasyon so tugyopen na maslak et matatatken la tan walaan na sakit tan ugugaw, tan anggapoy anggan sakey a walaan na eksperiensia ed panangipaalagey.
Ngalngali 380 a kilometro so kaarawi, diad isla na Guadalcanal, Saray Tasi ed syudad na Honiara so mabulbulos ya angiyapay ed inkasikara. (Salmo 110:3) Inkatunongan da: “No saray agagi tayo ed arum a bansa so mabulbulos da itayon ipaalageyan na sakey ya Assembly Hall ed loob na duaran simba, sirin et seguradon natulongan tayoray agagi tayo ed Munda tan ipaalageyan ira na Kingdom Hall ed loob na duaran simba.”
Ontan so agawa. Sakey a ferryboat a walaay lugan a malikeliket tan magunaet a Tastasin bulontaryo so sinmabi ed Munda. Lalaki tan bibii, matatken tan ugaw, so okupado ed pangididiskarga ed saray kargada ra tan akaparaan ya onggapon mangipaalagey ed materyales a kiew, semento, balatyang a pangatepan, tan arum niran akauna lan sinmabi ed Munda.
Diad kapangigapo-gapo na kimey, apakset so serbisyo na danum na baley lapud mabiskeg a karol tan kirmat. Anggaman ontan, saya so agnagmaliw ya agnatalonaan a problema. Angotkot na bobon iray Tastasi a nansuplay na danum ed interon panaon na panagpaalagey. Komusta met iray tagano na komikimey? Aliwa met itan a problema. Saray bulontaryon nanlapud Honiara so linma diman a walaan na daakan a tagano ya intarya na saray kongregasyon ed Honiara. Angawit nira ingen na saray managluto ra!
Mankelaw iray kakaabay legan a babantayan day pantutultuloy na proyekto. Inkuan na sakey ed sikara: “Agnasusumpal iray bengatla dia ed loob lambengat na saray agew. Mankaukolan iraya na taon.” Sananey nin kaabay, sakey a relihyoson pangulo, so amidbir a say simbaan to so ipapaalagey la ed loob na 20 taon lay apalabas tan satan so agni asumpal. Diad pidumaan, say balon Kingdom Hall na Tastasi nen Jehova ed Munda so asumpal ed samploran agew labat!
[Paimano ed leksab]
a Say sakey a leaf house so ginawa ed materyales a binatang manlapud katakelan. Say taglang to so ginawa ed palpalitek tan posposte, tan say atep tan saray dingding so pinaklapan na saray entrepanyo a ginawa ed saray bulong na palma ya inlaga ed palpalitek tan tinaker na saray yakal.
[Mapa ed pahina 30]
(Parad aktual a format, nengnengen so publikasyon)
South Pacific Ocean
SOLOMON ISLANDS
Munda
GUADALCANAL
Honiara
[Mapa]
AUSTRALIA
NEW ZEALAND