Say Sankabalgan a Toon Nambilay ed Kapiganman

Kapitulo 112

Asabi la so Pinal a Paskua nen Jesus

Legan a say Martes, Nisan 11, so mansamposampot la, susumpalen nen Jesus so panbabangat to ed saray apostol diad Palandey na saray Olibo. Agaylan okupado, matrabahon agew iman! Natan, anganko legay ipapawil ed Betania pian manpalabi diman, inkuanto’d saray apostol to: “Kabat yon duaran agew manlapud natan et nagawa so Paskua, tan say Anak na too so niiter pian ipasak.”

Mapatnag ya inusar nen Jesus so ontumbok ya agew, Mierkoles, Nisan 12, diad mareen a panpapainawa a kaiba iray apostol to. Sakbay na saman ya agew, mapublikon binaat toray relihyoson pangulo, tan amoria ton sikatoy getma ran pateyen. Kanian diad Mierkoles et sikatoy agmaparungtal ya inmapireng, lapud agto labay a walay bengatlan makasbel ed panselebra to na Paskua ed ontumbok a labi a kaiba iray apostol to.

Kaleganan to, nantitipon iray manunan saserdote tan mamasiken na totoo ed sabanan na atagey a saserdote, si Caifas. Asakitan lapud apalabas a panangataki nen Jesus, plaplanoen day panerel ed sikato diad masilib a paraan tan pian ipapatey. Ingen naynay dan ibabaga: “Aliwan diad piesta, pian anggapo so gulo ya onlesa ed limog na totoo.” Sikaray natatakot ed totoo, a mamapabor ed si Jesus.

Legan a saray relihyoson pangulo so mannononong ed ontanlan inkauges pian pateyen si Jesus, sakey a bisita so sinmabi. Diad inkabigla ra et sakey ed dilin apostoles nen Jesus, si Judas Iscariote, say sakey ya angitaneman nen Satanas na marelmeng a kanonotan a mangitapat ed Katawan to! Agaylan aliketan ira sanen tinmepet si Judas: “Anto so iter yo’d siak pian sikatoy itapat ko ed sikayo?” Sikaray malikeliket ya inmabobon a manbayar ed sikatoy 30 piraso na pilak, say bili na sakey ya aripen unong ed Mosaikon Ganggan a sipanan. Nanlapulad saman, manaanap si Judas na maabig a pankanawnawa pian itapat si Jesus ed sikara ya arawi ed karaklan.

Onggagapo so Nisan 13 diad kaselek na agew na Mierkoles. Sinmabi manlapud Jerico si Jesus na Biernes, kanian saya so komanem tan pinal a labi ya usaren to ed Betania. Diad ontumbok ya agew, Huebes, say pinal a panangiparaan so kaukolan a gawaen parad Paskua, ya onggapo ed kaselek na agew. Saman so panaon sano say karneron parad Paskua so kaukolan a pateyen tan insan ikalot ya intero. Iner da selebraan so piesta, tan siopay mangiparaan?

Ag-angitarok si Jesus na saray detalye, anganko pian naamper si Judas manlapud pangipaamta ed saray manunan saserdote ompan erelen da si Jesus legan na selebrasyon na Paskua. Balet natan, anganko ta masasakbay na ngarem na Huebes, imbaki nen Jesus si Pedro tan Juan manlapud Betania, ya ibabaga: “Onla kayo tan iparaan so paskua parad sikatayo a mangan.”

“Iner so labay mon pangiparaanan itan?” tepet da.

“Sano onloob kayo ed syudad,” kuan nen Jesus, “sakey a toon akaawit na buyog na danum so onabet ed sikayo. Tumbok yo ed abung a looban to. Tan ikuanyo ed akan-abung, ‘Ipapaibaga na Managbangat ed sika: “Iner imay kuartoy bisita a piakanan ko na paskua ed saray babangatan ko?”’ Tan satan a too so mangipanengneng ed sikayo na sakey a baleg a kuarto ed tagey ya alinisan. Iparaan yo diman.”

Anggapoy duaruwa a say makan-abung so sakey a babangatan nen Jesus a nayarin maniilalo’d ikerew nen Jesus pian usaren so abung to parad sayan nikabkabiig ya okasyon. Anggaman ontan, sanen akasabi si Pedro tan Juan ed Jerusalem, aromog day amin a bengatlan unong ed impasakbay nen Jesus. Kanian sikaran dua so anegurado a say karnero so akaparaan tan amin niray uksoyan so nagawa pian naasikaso iray pankaukolan na 13 manselebra na Paskua, si Jesus tan saray 12 apostol to. Mateo 26:1-5, 14-19; Marcos 14:1, 2, 10-16; Lucas 22:1-13; Exodo 21:32.—NW.

▪ Antoy mapatnag a ginawa nen Jesus ed Mierkoles, tan akin?

▪ Anton pandaragup so ginawa ed abung na atagey a saserdote, tan parad anton gagala so imbisita nen Judas ed saray relihyoson pangulo?

▪ Siopa so imbaki nen Jesus ed Jerusalem ed Huebes, tan parad anton gagala?

▪ Anto so aromog na saraya ya angipatnag lamet na mamilagron pakayari nen Jesus?