Say Sankabalgan a Toon Nambilay ed Kapiganman

Kapitulo 113

Inkamapaabeba Diad Kaunoran a Paskua

Si Pedro tan Juan, a binilin nen Jesus, so akasabi la ed Jerusalem pian gawaen iray panangiparaan parad Paskua. Si Jesus, mapatnag a kaiba iray arum a samploran apostoles, so sinmabi a ngakngarem la. Onseselek la so agew legan a si Jesus tan saray kaiba to so onleleksab ed Palandey na saray Olibo. Saya so kaunoran ya impamantag nen Jesus ed syudad legan na agew manlapud sayan palandey anggad kayari kioli to.

Ag-abayag et si Jesus tan saray kaiba to so akasabi ed syudad tan amaarap ed ayaman a panselebraan da na Paskua. Sikara so sinmegep ya amaarap ed maawang a kuarto ed tagey, ya akaromogan da na amin a panangiparaan parad pribadon panselebra ra na Paskua. Nanilalo si Jesus ed sayan okasyon, a singa ibabaga to: “Pinilalek kon tuloy so pangan ko na sayan paskua a kaiba kayo sakbay na panirap ko.”

Diad itumbok ed niugali la, apatiran kopa na alak so iinumen na mibibiang ed Paskua. Kayari impangawat ed mapatnag a komatlon kopa, si Jesus so akisalamat tan inkuanto: “Ala yo iya tan ipasa’d sinansakey ed limog yo; ta ikuanko ed sikayo, Manlapud natan et agak la oninum manlapud bunga na ubas anggad isabi panarian na Dios.”

Legan a mamangan ira, si Jesus so inmalagey, nanekal na akinpaway a kawes to, angala na tualya, tan angibales na danum ed palanggana. Gendagendat, sakey a managparawes so manseguron saray sali na bisita so naurasan. Balet lapud sayan pankanawnawa et anggapoy wadman a managparawes, si Jesus so angasikaso ed sayan personal a serbisyo. Siopaman ed saray apostol so nayarin anganamot ed pankanawnawa a manggawa ed satan; ingen, mapatnag lapud wala nin siansia so panlalaslasan ed limog da, anggapo so nanggawa. Natan et sikaray abaingan sanen ginapoan nen Jesus ya orasan iray sali ra.

Sanen inmasingger si Jesus ed sikato, sinmuppiat si Pedro: “Maseguron sika so agbalot manguras na saray salik.”

“Nilikud no naurasan taka, anggapo so napibiangan mo ed siak,” kuan nen Jesus.

“Katawan,” ebat nen Pedro, “aliwan saray salik lambengat, noagta ontan met ed saray limak tan say ulok.”

“Sikato a nanames,” ebat nen Jesus, “so agmankaukolan na labas nen say saray sali to a naurasan, noagta malinis ed kabalgan. Tan sikayon lalaki so malinis, balet aliwan amin.” Inkuan to iya lapud amta ton iplaplano nen Judas Iscariote a sikatoy itapat.

Sanen naurasan nen Jesus iray sali na 12, pati saray sali met na manangitapat to, si Judas, insulong toy akinpaway a kawes to tan tinmameg lamet ed lamisaan. Insan intepet to: “Amta yo no anto so ginawak ed sikayo? Tatawagen yoak na, ‘Managbangat,’ tan, ‘Katawan,’ tan susto so panasalita yo, ta lapud ontan ak. Sirin, no siak, anggaman Katawan tan Managbangat, anguras ed saray sali yo, nepeg yo met ya urasan iray sali sakey tan sakey. Ta angiletneg ak na padron parad sikayo, pian, singa say ginawak ed sikayo, nepeg yo met a gawaen. Tua kuanko ed sikayo, Aliwan babaleg so aripen nen say amo to, nisay say sakey ya imbaki et babaleg nen say sakey ya angibaki ed sikato. No amta yo irayan bengatla, maliket kayo no sikaray gawaen yo.”

Agaylan sakey a marakep a leksion ed mapaabeban serbisyo! Nepeg ya ag-anapen na saray apostol so manunan pasen, ya iisipen a sikaray ontanlan importanti a lawas a paserbian ed arum. Kaukolan dan tumboken so padron ya inletneg nen Jesus. Saya so aliwan ritual a panag-uras na sali. Andi, noagta sakey ya inkamabulos a manserbi ya andiay panangidumaduma, anggaman panon kaabeba odino aglabalabay so sakey a kimey. Mateo 26:20, 21; Marcos 14:17, 18; Lucas 22:14-18; 7:44; Juan 13:1-17.—NW.

▪ Anto so nikadkaduma nipaakar ed panmoria nen Jesus ed Jerusalem legan na iloloob to ed syudad pian selebraan so Paskua?

▪ Legan na Paskua, mapatnag ya anton kopa so impasa nen Jesus ed saray 12 apostol kayari impamendisyon?

▪ Anton personal a serbisyo so niyugali lan itatarok ed saray bisita sanen walad dalin si Jesus, tan akin ya ag-intarok itan legan na impanselebra nen Jesus tan saray apostol to?

▪ Anto so gagala nen Jesus ed impanggawa to ed abeban klase na serbisyon pananguras na kasalian na saray apostol to?