Say Sankabalgan a Toon Nambilay ed Kapiganman

Kapitulo 114

Say Pakanodnonotan a Pangdem

Kayari impanguras nen Jesus ed kasalian na saray apostol to, sikato so angaon ed kasulatan diad Salmo 41:9, a kuanto: “Sikato a datin mamangan ed tinapay ko so kinmulandit sumpad siak.” Insan, agonigon ed espiritu, inkuanto: “Sakey ed sikayo so mangitapat ed siak.”

Saray apostol so naermenan tan sansakey ya angikuan ed si Jesus: “Aliwan siak, agta ontan?” Anggan si Judas Iscariote so akibiang ed pantepet. Si Juan, a kaiba nen Jesus ed lamisaan, so sinmaral ed pagew nen Jesus tan tinmepet: “Katawan, siopa itan?”

“Sakey itan ed labindua, a mangidepdep a kaibak ed kalapagan a yaong,” ebat nen Jesus. “Tua, say Anak na too so ontaynan, unong a singa nisulat nipaakar ed sikato, balet ta kasi la iman a too a diad panamegley to et say Anak na too so nitapat! Maabig ni parad satan a too a sikatoy ag-inyanak.” Kayari na saman, si Satanas so linmoob lamet ed si Judas, a mangaanamot ed alukasan a puso to, a nagmaliw a mauges. Diad saginonor ed saman a labi, matukotukoy so impanawag nen Jesus ed si Judas a “say anak na kadederal.”

Inkuan nen Jesus natan ed si Judas: “Gawam a nagkalalon maples so gagawaen mo.” Anggapo ed saray arum ya apostol so akatebek ed no anto so labay ya ibaga nen Jesus. Lapud bebenbenan nen Judas so pananginay kuarta, inisip na arum a si Jesus so mangibabaga ed sikato: “Saliw mo iray bengatlan kaukolan tayo parad piesta,” odino sikatoy onla tan mangiter na bengatla ed saray duruka.

Kayari intaynan nen Judas, si Jesus so angiparungtal na sakey a duman tuloy a selebrasyon, odino pakanodnonotan, ed saray matoor ya apostol to. Sikato so angala na tinapay, akisalamat diad pikakasi, pinisag itan, tan initer itan ed sikara, ya ibabaga: “Ala kayo tan mangan.” Ipapaliwawa to: “Saya so mankabaliksay laman ko a niiter ed biang yo. Itultuloy yon gawaen iya bilang pakanodnonotan ed siak.”

Sanen kada sakey ed sikara so akapangan lay tinapay, si Jesus so angala na kopa na alak, a mapatnag a samay komapat a kopan uusaren ed serbisyo na Paskua. Sikatoy akisalamat met diad pikakasi, tan kuanto: “Sayan kopa so mankabaliksan na balon sipanan diad biskeg na dalak, a niibong ed biang yo.”

Kanian saya so, diad tua, sakey a memoryal na ipapatey nen Jesus. Kada taon ed Nisan 14 et satan so uuliten, a singa imbaga nen Jesus, ed pakanodnonotan ed sikato. Satan so mangipanonot ed saray managselebra ed ginawa nen Jesus tan say mangatatawen ya Ama to pian mangitarok na kililiktar parad katooan manlapud panangondena na ipapatey. Parad saray Judion magmaliw a patumbok nen Kristo, say selebrasyon so onsalat ed Paskua.

Say balon sipanan, ya oneepekto diad panamegley na nipaagus a dala nen Kristo, so onsasalat ed daan a Ganggan a sipanan. Satan so pepegleyan nen Jesu-Kristo diad baetan na duaran grupo​—diad sakey a dapag, si Jehova a Dios, tan diad biek a dapag, saray 144,000 ya atagibi-ed-espiritun Kristiano. Likud ed pangitatarok parad kaperdona na saray kasalanan, say sipanan so mangiyaabuloy parad katugyop na sakey a mangatatawen a nasyon na saray arin-saserdote. Mateo 26:21-29; Marcos 14:18-25; Lucas 22:19-23; Juan 13:18-30; 17:12; 1 Corinto 5:7.—NW.

▪ Anton propesiyay Biblia so inaon nen Jesus nipaakar ed sakey a kaulop, tan anton panangiyaplika so ginawa to nipaakar ed satan?

▪ Akin a naermenan a tuloy iray apostol, tan antoy intepet na kada sakey ed sikara?

▪ Anto so imbaga nen Jesus a gawaen nen Judas, balet panon ya impatalos na arum ya apostol irayan bilin?

▪ Anton selebrasyon so imparungtal nen Jesus kayari intaynan nen Judas, tan anton gagala so kakanaan to?

▪ Sioparay partido ed balon sipanan, tan antoy susumpalen na sipanan?