Say Sankabalgan a Toon Nambilay ed Kapiganman

Kapitulo 115

Tinmerak so Sakey a Sangsangan

Asasakbay ed labi, si Jesus so angibangat na sakey a nikadkaduman leksion ed mapaabeban serbisyo diad impanguras ed kasalian na saray apostol to. Kayari to, imparungtal toy Memoryal na manasingger ya ipapatey to. Natan, nagkalautla nisesengeg ed agano nin agawa, sakey a makapabiglan insidente so agawa. Saray apostol to so alanor ed ampetang a sangsangan no siopa ed sikara so singa ompatnag a sankabalgan! Mapatnag, saya so kabiangan na mantultuloy a suppiatan.

Nonoten a kayarin si Jesus so nauman-ed-nengneng ed palandey, saray apostol so nansasangsangan no siopa ed sikara so sankabalgan. Niarum ni, kinmerew si Santiago tan Juan na prominente iran posisyon ed Panarian, a nansumpal ed lalo nin panggugulaan na saray apostol. Natan, ed sayan kaunoran a labi a sikaray kaiba to, maseguron naermenan si Jesus ed impakanengneng to’d sikaran mantataloan lamet! Anto so ginawa to?

Imbes a panpasnokan iray apostol lapud walna ra, siaanos ya akikatunongan lamet ed sikara: “Saray ari na saray nasyon so mamapakatawan ed sikara, tan saraman so walaan na autoridad ed sikara so tatawagen a Managpalangkap. Anggaman kuan, agkayo magmaliw a singa ontan. . . . Ta siopay babaleg, say sakey ya akatameg diad lamisaan odino say sakey a manlilingkor? Agta samay sakey ya akatameg diad lamisaan?” Insan, diad pangipapanonot ed ehemplo to, inkuanto: “Balet ta siak so walad utel yo bilang say sakey a manlilingkor.”

Anggaman ed agda inkayadyari, saray apostol so nansiansia ed si Jesus legan na subsubok to. Kanian inkuanto: “Manggawa ak na sipanan ed sikayo, a singa say Amak et nanggawa na sipanan ed siak, parad sakey a panarian.” Sayan personal a sipanan ed baetan nen Jesus tan saray matoor a patumbok to so mangipapakasakey ed sikara ed sikato a mibiang ed panuley to. Sakey lambengat a limitadon bilang a 144,000 so diad kaunoran et ipapasen ed sayan sipanan parad sakey a Panarian.

Anggaman saray apostol so inopresian na sayan makapakelaw ya ilalon miuley a kaibay Kristo ed uley na Panarian, diad kaplesan et sikaray maletey ed espiritual. “Amin yo so nagapol nipaakar ed siak ed sayan labi,” kuan nen Jesus. Anggaman ontan, diad pangibabaga ed si Pedro a Sikatoy nampikasi ed biang to, impaseseg nen Jesus: “Kabektan sika so akapawil, paseseg mo so agagim.”

“Ankelag ya ananak,” paliwawa nen Jesus, “wala ak ni ed sikayoy daiset a panaon. Anapen yoak; tan singa imbagak ed saray Judio, ‘No iner so laen ko, sikayoy agmakaonla,’ ibabagak met ed sikayo ed kaplesan. Siak so mangiiter ed sikayo na balon ganggan, a sikayoy manaaroan ed sakey tan sakey; unong na impangarok ed sikayo, a sikayo met so manaaroan ed sakey tan sakey. Diad saya et naamtaan na amin a sikayoray babangatan ko, no walaan kayo na aro ed sakey tan sakey.”

“Katawan, iner so laen mo?” tepet nen Pedro.

“No iner so laen ko et agka makatumbok ed siak natan,” ebat nen Jesus, “balet ta ontumbok ka’d siak ed saginonor.”

“Katawan, akin a siak so agmakatumbok ed sika diad kaplesan?” labay ya amtaen nen Pedro. “Isukok so kamarerwak ed biang mo.”

“Isukom ta so kamarerwam ed biang ko?” tepet nen Jesus. “Tua kuan ko ed sika, Sika natan, on, diad sayan labi, sakbay na komaduan ikokaok na sakey a lalong, sika ni ingey mamitlo a mangiburi’d siak.”

“Anggaman siak so ompatey a kaibam,” insuppiat nen Pedro, “agta kan balot iburi.” Tan bangta saray arum ya apostol so akibiang ed pangibabaga na parehon bengatla, impasirayew nen Pedro: “Anggaman amin niran arum so nagapol nipaakar ed sika, siak so agbalot nagapol!”

Diad panutukoy ed panaon sanen imbaki toray apostol ed sakey a baroy a panagpulong ed Galilea ya anggapoy supot na kuarta tan pananginay tagano, intepet nen Jesus: “Anggapoy bengatlan kinaukolan yo, agta ontan?”

“Anggapo!” inyebat da.

“Balet iyabuloy natan ed sakey a walaan supot na kuarta et mangawit ed satan, ontan met ed pananginay tagano,” kuanto, “tan iyabuloy natan ed sakey ya anggapoy kampilan a mangilako ed akinpaway a kawes to tan mangaliw na sakey. Ta ikuanko ed sikayo a saya a nisulat so kaukolan a nasumpal ed siak, salanti, ‘Tan sikatoy imbilang ed saray matunganga.’ Ta samay nipapaakar ed siak so nawawalaay kasumpalan.”

Si Jesus so manutukoy ed panaon sano sikatoy ipasak a kaiba iray managgaway mauges, odino saray matunganga. Ipapatnag to met a manlapud saman et makaabet na mapalalon panamasegsegang iray patumbok to. “Katawan, nia! wadia so duaran kampilan,” kuanda.

“Magenap la,” ebat to. A singa nanengneng tayo, say pakawalaan na saray kampilan ed sikara so agmabayag et mangiyabuloy ed si Jesus a makapangibangat ni sananey ya importantin leksion. Mateo 26:31-35; Marcos 14:27-31; Lucas 22:24-38; Juan 13:31-38; Apocalipsis 14:1-3.​—NW.

▪ Akin a makapabigla so sangsangan na saray apostol?

▪ Panon ya akidenengan nen Jesus so sangsangan?

▪ Anto so susumpalen na sipanan a ginawa nen Jesus ed saray babangatan to?

▪ Anton balon ganggan so inter nen Jesus, tan kaunongan kaimportanti itan?

▪ Anton alabas a talek so impanengneng nen Pedro, tan anto so imbaga nen Jesus?

▪ Akin a saray bilin nen Jesus nipaakar ed pangawit na supot na kuarta tan pananginay tagano so duma manlapud saramay inter to’d asasakbay?