Tepetepet Manlapud Managbasa
Anton awawey so kaukolan ya ipanengneng ed saray Kristianon bautismo?
Satan so makapainteres a tepet, ta anggaman dakel ed saray managbasa tayo so bautismado la, sikaray nalalanor, a singa met ed saramay manpabautismo. Komentoan tayon ununa iramay manpabautismo, ya ondalan ed kumpleton kipalgep. Anto so kaukolan ya awawey da?
Diad Mateo 28:19, 20, imbaga nen Jesus ed saray patumbok to ya onla tan manggawa na saray babangatan a totoo, a bangatan tan bautismoan ira. Agto imparungtal so bautismo bilang ma-emosyonal ya eksperiensia, kiwas a papawalaen na panliket a magano. Satan so seryoson kundang, a singa nanengneng tayo manlapud alimbawa nen Jesus. Kuan na Lucas 3:21: “Si Jesus met nen abinyagan, tan nen nanpikasi, say tawen nilukas.” On, say Ehemplo tayo so angipasen ed bautismo a seryoso, sipipikasi. Agtayo naisip a sikato, kayari inyimwas to et man-andawes na tanday impanbiktorya, ya oneyag, odino manwasiwas na saray taklay to, anggaman diad agano ni et walaray manggagawa na onia. Mogmon si Juan Bautista so wadman a kaiba to, inmarap si Jesus ed Ama to diad pikakasi.
Anggaman kuan, ag-isusuheri na Biblia a say bautismo et nepeg a magmaliw a maermen ya ebento, a mankaukolan na espesyal iran postura odino orasyon legan na bautismo, a singa kakaukolanen na pigaran iglesia na Kakristianoan natan. Siempre, isipen pay agew na Pentecostes, sanen nilibon Judios tan proselitas so dinmalan ed Kristianon bautismo. Naaralan da lay Ganggan na Dios tan awalaan na siglaotan ed sikato. Kanian kaukolan da lambengat ya aralen tan awaten so Mesias, si Jesus. Bektaman ya agawaan da, sikaray nayarin bautismoan.
Irereport na Gawa 2:41: “Saraman sirin so angawat na salita to, nanbinyag ira.” Say patalos na Biblia nen Weymouth so pakabasaan: “Saraman, sirin, so sigagayagan angabrasa ed salita to so abautismoan.” Aromog day gayaga diad makapasagyat iran balita nipaakar ed Mesias, tan maseguron satan ya impapuson gayaga et ninmatnat ed mismon bautismo, bautismo diad arap na nilasus iran maliket a manangimaton. Anggan saray anghel diad tawen so mangiimaton tan manliliket. Tandaan iray salita nen Jesus: “Kuan ko ed sikayo, wala so liket ed arap na saray angeles na Dios nisengeg ed sakey a managkasalanan a magbabawi.”—Lucas 15:10.
Walaray nanduruman dalan a balang sakey ed sikatayo so makapangisindag ed inkaseryoso tan gayaga ed bautismo. Diad arum ya iglesia et saramay manpabautismo et mangisulong na amputi odino andeket iran aysing. Anggapo so Makasulatan a panuporta ed ontan a kakaukolanen. Siansia, say mapitat odino mankaninag iran bathing outfit so agmatukoy, balanglan parad lalaki odino parad bibii. Tan singa naimano, kaimwas, say balon Kristiano so agnakaukolan a manggawa na nikadkaduma iran andawes odino onkiwas a singano analo ed baleg a biktorya. Say arum ed Kristianon impanaagi so maliket a say balo ni et nanpabautismo. Nepeg ton talosan a sayan demostrasyon na pananisia et gapoan lambengat na andukey a kurang na katooran pian nagamoray panangabobon na Dios.—Mateo 16:24.
Sikatayo, bilang mangiimaton diad sakey a publikon bautismo, so minabang ed gayagay okasyon, nagkalautla no say manpabautismo et sakey a kanayon odino sakey ya iyaaralan tayoy Biblia. Anggaman ontan, pian sigpot a makapinabang, kaukolan tayoy ontalineng ed interon diskurso a kaiba iray kandidato, denglen iray mapublikon ebat da ed tepetepet a niparungtal ed sikara, tan mikasakey diad pikakasi. Say panggawa ed ontan so ontulong ed sikatayon mansiansia ed aktual a bautismo diad dugan panmoria et nawalaan tayo na panmoria a singa ed panmoria na Dios. Kayari panagbautismo, agkakaukolanen na gayaga tayo so selebrasyon, na gumpol na rosas, odino sakey a party diad pamagalang ed abautismoan. Balet naasinggeran tayo so balon agin laki odino agin bii pian ibalikas so liket tayo ed maabig a kundang ya inala to tan ipanabang so ampetang a panangabrasa ed sikato diad Kristianon impanaagi tayo.
Sirin, diad panegek, amin tayo a pati saramay manpasakup ed kipalgep ed danum, so nepeg a mangipasen ed bautismo ed matukoy ya inkaseryoso. Aliwan panaon itan na paneyag-eyag, parad party, odino parad panliliket. Nisay satan et panaon na ermen. Manepeg lambengat a manggayaga tayo a saray balo ni so akiulop ed sikatayo a mamaarap ed andi-anggaan a bilay. Tan makapanggayaga tayon mangabrasa ed balon agagi tayon lalaki tan bibii.
[Interon-pahina a litrato ed pahina 31]