Mangungguna Manlapud Inagew-agew a Panagbasay Biblia

“Mapalar so too . . . a say gayaga to wala ed gangan nen Jehova; tan diad’ gangan to mandalepdep ed agew tan labi.”​—SALMO 1:1, 2.

1. (a) Anton sankanengneng a karatula so walad diking na pagawaan na Watch Tower Society ed saray hedkuarter ed mundo? (b) Panon tayon nagunggunaan no personal tayon ipapuso iyan simbawa?

“BASAEN SO SALITAY DIOS SAY MASANTON BIBLIA YA INAGEW-AGEW.” Diad ankabaleg iran letra, saraman a salita so nanengneng ed sakey a diking na pagawaan diad Brooklyn, New York, no iner ya iyiimprinta iray Biblia tan literaturay Biblia na say Watchtower Bible and Tract Society. Satan a panonot so agginetma lambengat parad totoo ed mundon makanengneng ed satan a karatula. Namomoria na Tastasi nen Jehova a kaukolan da met ya ipapuso itan. Saramay maparanay a manbabasa na Biblia tan personal a mangiyaaplika ed satan so nagunggunaan ed pakabangatan, pakasimbawa, pakakorehi, tan pakadisiplina ed inkatunong ya itatarok to.​—2 Timoteo 3:16, 17.

2. Panon ya indanet nen Brother Russell so kaimportantian na panagbasay Biblia?

² Aapresyaen a tuloy na Tastasi nen Jehova iray katulongan ed panagaral ed Biblia, pati Say Panag-Bantayan, tan maparanay dan uusaren iraya. Balet kabat dan anggapo’d saratan so nayarin onsalat ed Biblian mismo. Nen 1909, si Charles Taze Russell, say inmunan presidenti na Watch Tower Bible and Tract Society, so nansulat ed saray managbasa na say magasin a Watch Tower: “Agbalot lilingwanan a say Biblia so Estandarte tayo tan kaunongan may kaepektibo na saray katulongan a nanlapud Dios, saratan so ‘tulong’ tan aliwan kasandi Biblia.”

3. (a) Antoy epekto na “salita na Dios” ed saramay nipapaarap ed satan? (b) Kaunongan kabetbet a manbabasa tan manaaral na Kasulatan iray taga Berea?

³ Say impuyan a Kasulatan so walaan na kaaralem tan puersan agnaromog ed arum a libro. “Ta say salita na Dios sikatoy mabilay tan mabiskeg, tan makdem nen say angan dinan ya kampilan a duara’y tarem, tan ontalos ya anga ed pansianan na kamarerwa tan espiritu, tan anga ed saray langolangoan tan saray utek, tan masiglat ya mangibiig ed saray nonot tan saray getma na puso.” (Hebreos 4:12) Ampetapetang a kinomendaan na babangatan a si Lucas iray taga Berea a tatawagen iran “mas mapagalang.” Agda lambengat sigugunaet ya inawat so salita unong ya impulong nen apostol Pablo tan kaulop to a si Silas noagta ‘inagewagew ya inusisa ra so Kasulatan’ pian determinaen so Makasulatan a basiyan na nibabangat.​—Gawa 17:11.

Panbasa ed Satan ya Inagew-agew

4. Anto so ipapanengneng na Kasulatan ed kaunongay kabetbet so kaukolan tayon panbasa ed Biblia?

⁴ Ag-ispisipikon ibabalikas na Biblia no kaunongan kabetbet so nepeg a panbasa tayo’d satan. Anggaman ontan, irerekord to so simbawa nen Jehova ed si Josue a ‘basaen so libro na gangan ya omamengen ed agew tan labi’ ta pian onkiwas a sikakabat tan matalona ed pananumpal ed inter-Dios ya asainmin to. (Josue 1:8) Ibabaga to ed sikatayo a siopaman a manuley bilang ari ed kadaanan ya Israel et kaukolan a basaen toy Kasulatan “ed amin ya agew a panbilay to.” (Deuteronomio 17:19) Ituloy to nin ibaga: “Mapalar so too ya ag manakar ed panangibangat na saray ag matunong . . . a say gayaga to wala ed gangan nen Jehova, tan diad’ gangan to mandalepdep ed agew tan labi.” (Salmo 1:1, 2) Ontan met, ibabaga’d sikatayo na Ebanghelyon inkurit nen Mateo a sanen impulisay nen Jesu-Kristo iray sagpot nen Satanas a panukso ed Sikato, Sikatoy angaon manlapud apuyanan a Hebreon Kasulatan, a mangibabagan: “Wala’n nisulat, Aliwa a say tinapay labat so napanbilay na too, noag say amin a salitan onbesngaw ed sangi’ Dios.” (Mateo 4:4) Kaunongan kabetbet a nakaukolan tayoy pisikal a tagano? Inagew-agew! Say katagano ed espiritual a taganon inagew-agew so nagkalalon importanti lapud aapektaen toray ilalo tayo parad maandon bilay.​—Deuteronomio 8:3; Juan 17:3.

5. Panon a say inagew-agew a panagbasa ed Biblia so ontutulong ed sikatayo a ‘mankorang a makana ed Jehova,’ sano nipaarap ed sikatayo iray subok?

⁵ Balang sakey ed sikatayo so nakakaukolan a napabiskeg ya inagew-agew na Salitay Dios. Inagew-agew​—diad ayaman, diad trabaho, diad eskuelaan, ed saray lansangan, sano manasaliw, diad ministeryo tayo​—saray angat ed pananisia so nipapaarap ed sikatayo. Panon tayon pidenengan iraya? Kasin nanonotan tayon tampol iray ganggan tan prinsipyos ed Biblia? Imbes a manilalo’d sarili, mamapasakbay so Biblia: “Say manisip a manalalagey, imanoen to komon ompan napelag.” (1 Corinto 10:12) Say inagew-agew a panagbasay Biblia so ontulong ed sikatayon ‘mankorang a makana ed Katawan [Jehova, NW] ya onarap ed amin a makapaliket’ imbes ya abuloyay mundo a mangimoldi ed sikatayo.​—Colosas 1:9, 10; Roma 12:2.

Say Pankaukolan a Panbasan Paulit-ulit ed Biblia

6. Akin a makagunggunay paulit-ulit a panbasa ed Biblia?

⁶ Say panbasa ed Biblia so duman tuloy manlapud panbasay libron is-istorya. Maslak ed papular ya is-istorya so dinisenyon parad minsanan a panagbasa; bektan amta la na tooy istorya tan panon ya angangga itan, anggad ditan lambengat. Diad kasuniyan to, anggan aminpigan danay lan binasa tayoy Biblia, nagunggunaan itayon tuloy ed paulit-ulit a panggawa ed ontan. (Uliran 9:9) Parad makatebek a too, say Kasulatan so naynay a nawawalaan na balon kabaliksan. Lalon makapakiwas ed sikato iray propesiyan nipaakar ed kaunoran iran agew diad liwawa na nanenengneng, narerengel, tan personal a naeeksperiensia to ed agano niran bulan. (Daniel 12:4) Legan ya onlalaknab so dilin eksperiensia to’d bilay tan natatalonaan iray problema, say walaay-pakatebek a managbasay Biblia so mangaapresyan sigpot ed simbawa a diad inmuna et nayarin pasapasay impanbasa to. (Uliran 4:18) No sikatoy nidunget ed graben sakit, saray sipan na Biblia nipaakar ed kaekal na ot-ot tan kipawil na bunigas so walaan na aralem a kabaliksan ed sikato nen kapiganman. Sano naandi’d-bilay iray maapit a kaaro tan membro na pamilya, say sipan a kioli so magmamaliw a nagkalalon mabli.

7. Anto so ontulong ed sikatayo sano nawalaan tayo na balon responsabilidad ed bilay, tan akin?

⁷ Nayarin personal yon abasa so Biblia tan inyaplikay simbawa to ed loob na pigara lan taon. Balet anganko ta walaan kayo na saray balon responsabilidad natan ed bilay. Kasin plaplanoen yoy mangasawa odino miasawa? Kasin magmaliw kayo lan sakey ya ateng? Kasin apabtangan kayo na responsabilidad diad kongregasyon bilang sakey a matatken odino ministeryal ya aripen? Kasin nagmaliw kayo lan sakey a sigpot-panaon ya ebanghelisador, tekep na kaaruman niran pankanawnawan manpulong tan manbangat? Agaylan makagungguna so pakabasa-lamet ed interon Biblia a walad isip iratan a balon responsabilidad!​—Efeso 5:24, 25; 6:4; 2 Timoteo 4:1, 2.

8. Panon a nayarin say anguman iran sirkumstansya so mangipatnag na pankaukolan ya araley dakel niran bengatla a say amta tayo et kabat tayo la?

⁸ Diad apalabas et nayarin maong so impakapangipatnag yo na saray bunga na espiritu. (Galacia 5:22, 23) Ingen lapud anguman iran sirkumstansya et kaukolan ya aralen yo so dakel ni nipaakar ed saraman a maridios a kualidad. (Ipareng so Hebreos 5:8.) Sakey a datin managbaroy a manangasikaso ya akaromog a kapilitan a taynan so espisyal a serbisyo ta pian asikasoey maedad lan atateng to so nankuan: “Dati et isipen kon magenap lay pangipapatnag ko na saray bunga na espiritu. Natan et liknaen kon singano onggagapo ak lamet.” Ontan met, saray kaasawaan a lalaki tan kaasawaan a bibii a say kapareha ra so manasagmak na pisikal odino emosyonal a sakit so makakaimanon diad pangitatarok da na personal a panangasikaso et tunggal paminsan ya onlesay gonigon lapud reaksion da’d saray makadismaya’d sikara. Say regular a panagbasay Biblia so lapuan na baleg a ligliwa tan tulong.

No Kapigay Nayarin Panbasay Biblia

9. (a) Anto so makatulong ed sakey ya okupadon tuloy a makaromog na panaon parad inagew-agew a panagbasay Biblia? (b) Akin a say panagbasay Salita na Dios so nagkalautlan importanti parad mamatatken?

⁹ Siempre, parad totoon okupado lan tuloy, sakey ya angat so pangitalagay panaon pian gawaen a regular so sakey a kaaruman a bengatla. Anggaman ontan, nagunggunaan itayo manlapud alimbawa nen Jehova. Ipaparungtal na Biblia a gagawaen toray bengatla ed ‘aturon panaon.’ (Genesis 21:2; Exodo 9:5; Lucas 21:24; Galacia 4:4) Say apresasyon ed kaimportantian na regular a panagbasay Salita na Dios so makatulong ed sikatayo a mangigetar na panaon parad satan diad inagew-agew ya eskedyul tayo. (Efeso 5:15-17) Saray matatken so nagkalautlan nakaukolan a mangiganay panaon parad regular a panagbasay Biblia ta pian say simbawan iter da et magmaliw ya eksakton nibase’d prinsipyos na Biblia tan pian nipanengneng day espiritun mangisindag ed “kakabatan ya wala a manlapu ed tagey.”​—Santiago 3:17; Tito 1:9.

10. Kapigan a saramay inagew-agew a managbasay Biblia so makaromog na panaon a manbasa?

¹⁰ Dakel ya ontatalona ed programa na personal a panagbasay Biblia et gagawaen day panagbasa ra ed kabkabuasan sakbay ya igapo daray aktibidad da. Naiimano na arum a mas naynay dan nagawaan itan ed sananey a panaon. Saray audiocassette na Biblia (no wala) so makakatulong ed saray manbibiahe ya usaren itan diad panaoy panbiahe ra, tan arum a Tasi so ontatalineng ed saratan legan a gagawaey kimkimey ed abung. Saray programan matalona parad nanduruman Tastasi diad Europa, Aprika, Amianen ya Amerika, Abalaten ya Amerika, tan diad Orienti so nipanengneng ed pahina 20 ya anggad 21, diad artikulon “No Kapigan Dan Babasaen Itan tan No Panon a Nagugunggunaan Ira.”

11. Panon a say inagew-agew a panagbasay Biblia so nadampot anggano say walan panaon et limitadon tuloy?

¹¹ Say sanka-importantian et aliwan say karukey na panaon a nitalaga ed panagbasa yo’d Biblia ed dinanman a kipapasen noagta say inkaregular ed satan. Nayarin naromog yon makatumang so panbasa ed loob na sakey ya oras odino onsulok ni a minsanan, a manggawa na kaaruman a pansukimat tan diad ontan et niyapasakey ed materyal. Balet kasin iyaabuloy na eskedyul yo so panggawa ed satan a regular? Imbes a paulyanan ya onlabas iray agew ya anggapo lambengat so panbasa ed Biblia, agta magmaong a basaen itan ed loob na 15 minuto odino anggan diad loob na 5 minuto ya inagew-agew? Panpelengan yon inagew-agew a basaen so Biblia. Insan tekepan itan a panagbasa na araldalem a panagsukimat kapiganman a posibli.

Nanduruman Istiloy Panagbasay Biblia

12. Anton programa na panagbasay Biblia so niwala ed saray balon membro na pamilyay Bethel tan saray estudyante ed Gilead?

¹² Dakel so paraan pian nabasay Biblia. Makagungguna a basaen itan manlapud Genesis ya anggad Apocalipsis. Amin a membro na pamilyay Bethel ed sankagloboan a manlilingkor ed saray hedkuarter ed mundo odino sakey ed saray sanga na Sosyedad so kinaukolan a basaen day interon Biblia ed loob na ununan taon na serbisyo ra’d Bethel. (Gendagendat a kabaliksan toy panbasa na talora ya anggad limaran kapitulo, dependi ed dukey na saraya, odino apatira ya anggad limaran pahina, ed kada agew.) Nepeg met a basaen na saray estudyante ed Watchtower Bible School of Gilead so interon Biblia sakbay na pan-graduar da. Iilaloan ya ontulong iya ed sikara a gawaen a kabiangay bilay da so inagew-agew a panagbasay Biblia.

13. Anton kalat so nirerekomenda ed saray balo nin bautismadon Tasi?

¹³ Makagungguna parad balo niran bautismadon Tasi ya iletneg da so kalat ed panbasa’d interon Biblia. Nen 1975, diad panpaparaan to parad bautismo, tinepetan na sakey a matatken so sakey a kalangweran a laki ed Pransya no kasin walaan na pihon programay panagbasay Biblia. Nanlapulad saman et babasaen to lay interon Biblia a kada taon, genda-gendat a manbabasa’d kabuasan sakbay ya onlan mantrabaho. No nipaakar ed resulta, kuanto: “Nagkalalon akabat ko si Jehova. Nanenengneng ko no panon ya amin a bengatlan gagawaen to so mitukoyan ed gagala to tan no panon so ikikiwas to sano walaray babeng. Natalosan kon si Jehova met so matunong tan maong ed amin a kiwakiwas to.”

14. (a) Ta pian nigapo so personal a programan panagbasay Biblia a mantultuloy, anto so nakakaukolan? (b) Anto so nayarin ontulong pian natandaan tayo so inkalapagan a datak na kada libroy Biblia legan a babasaen itan?

¹⁴ Kasin abasa yo lay interon Biblia? No andi, natan so maabig a panaon ya igapo. Mangidatak na pihon programa, tan magmaliw a mapeget ed satan. Determinaen no pigaran pahina odino pigaran kapitulo so nabasa yo ed kada agew, odino amtaen no kaunongan kabayag so usaren yon panaon tan kapigan. Aliwan amin so makakumpleto ed Biblia ed sakey taon, balet say importantin bengatla et say maparanay a panagbasay Salitay Dios, a gawen itan ya inagew-agew no posibli. Legan a babasaen yo so Biblia, naromog yon makatulong so pangusar na pigaran reperensyan libro pian nipaslep ed kanonotan yo so inkalapagan a datak na say materyal. No wala so Insight on the Scriptures ed lenguahe yo, sakbay yon igapoy panbasa ed partikular a libro na Biblia, repasoen so antikey a datak ed saray pabitar ton nitarok ed Insight.a Nagkalautla et imanoen iray nipabakat a paulo ed outline. Odino usaren met so mas malaknab a sumaryon walad libron “All Scripture Is Inspired of God and Beneficial.”b

15. (a) Antoran suhestion a niyopresi ed pahina 16 tan 17 so makatulong pian napaaligwas so panagbasa yoy Biblia? (b) Imbes a manggawa na ritual a panagbasa ed pigaran pahina, diad anton makanan pamaakaran so nepeg a nagkalalon imanoen tayo?

¹⁵ Makagungguna so mantutumbokan a panagbasay Biblia, balet agkomon magmaliw a ritual a managbasa. Agmanbabasa na pigaran pahina ed inagew-agew diad pakabasa lambengat ed interon Biblia ed sakey taon. Singa nipanengneng ed kahon a “Saray Suhestion pian Napaaligwas so Panagbasa Yo ed Biblia” (pahina 16 tan 17), walaray dakel a paraan a nabasa tan napanggayagaan yo so Biblia. Antokaman so metodon uusaren yo, seguroen yon natatagano yo so kanonotan tan kapusoan yo.

Talosay Babasaen Yo

16. Akin ya importanti pangipanaon ed pandalepdep no antoy babasaen tayo?

¹⁶ Sanen manbabangat ed saray babangatan to, indanet nen Jesus so kaimportantian ed pakatalos da ed imbaga to. Say importanti et aliwan say intelektual a pakarandan lambengat, noagta “makatalos ira ed puso” ta pian niyaplika ra itan ed kabibilay da. (Mateo 13:14, 15, 19, 23) Say importanti ed Dios et no antoy talagan walad akindalem na too, tan saya et no antoy irerepresenta na puso. (1 Samuel 16:17; Uliran 4:23) Kanian, niarum ni ed paneguron natatalosan tayoy ibabaga na Biblia, kaukolan tayon dalepdepen iratan, a kukunsideraey ibabaga ra ed dilin bilay tayo.​—Salmo 48:9; 1 Timoteo 4:15.

17. Antoray pigaran anggulo a nayarin dalepdepen tayoy abasa tayo ed Kasulatan?

¹⁷ Panbanikelan a nibiig iray manunan prinsipyo ed saray salaysay ed Biblia ta pian niyaplika yo iraya ed saray situasyon a kidudungetan yo. (Ipareng so Mateo 9:13; 19:3-6.) Legan a nababasa tan nadadalepdep yo so nipaakar ed saray makapakelaw a kualidad nen Jehova, usaren so pankanawnawan pabiskegen so personal a siglaotan yo ed sikato, pian nabayuboan yo’d inkasikayon dili so mabiskeg a liknaay maridios a debosyon. Sano babasaen yoray balikas nipaakar ed gagala nen Jehova, isipen no antoy nagawaan yo pian mankimey a mitunosan ed saraya. Sano nabasa yo so direktan simbawa, imbes a basta ibagam ed inkasika, ‘Amtak la ’tan,’ itepet, ‘Kasin gagawaen koy ibabaga to?’ No ontan, tepetan yoy inkasikayo, ‘Diad antoran dalan a nagawaan ko itan a “nagkalalon sigpot?”’ (1 Tesalonica 4:1, NW) Legan ya aaralen yoray kakaukolanen na Dios, imanoen met iray peteg-ed-bilay ya alimbawa na saramay nambilay a mitunosan ed sarayan kakaukolanen tan saramay agnambilay ya ontan. Kunsideraen no akin a ginetma ray kurson tinumbok da tan antoy nansumpalan na satan. (Roma 15:4; 1 Corinto 10:11) Sano basaen yo so nipaakar ed bilay nen Jesu-Kristo, tandaan a si Jesus so sakey ed saramay angimatalekan nen Jehova na inkaari ed amin a dalin; usarey pankanawnawa pian pabiskegen ed inkasikayoy panpirawat parad balon mundo na Dios. Ontan met, analisaen iray paraan a nagkalalon naalig yo so Anak na Dios.​—1 Pedro 2:21.

18. Panon tayon nasimbang so panagbasay Biblia ed pangusar ed aaralen a materyal ya itatarok na “matoor tan makabat ya aripen”?

¹⁸ Siempre, agsandian na panagbasay Biblia so panangusar yo ed ekselentin aaralen a materyal a niwawala diad panamegley na “matoor tan makabat ya aripen.” Satan met so kabiangan na probisyon nen Jehova​—mabmablin tuloy. (Mateo 24:45-47) Seguroen a say regular a panagbasay Salitay Dios a mismo so walaay manunan pasen diad bilay yo. No posibli komon et, “BASAEN SO SALITAY DIOS SAY MASANTON BIBLIA YA INAGEW-AGEW.”

[Saray paimano ed leksab]

Panon Yon Ebatan?

◻ Akin a makagungguna so panbasay Biblia ya inagew-agew?

◻ Akin a kaukolan tayon basaen so Biblia a paulit-ulit?

◻ Diad dilin eskedyul yo, anto so maabig a panaon parad inagew-agew a panagbasay Biblia?

◻ Legan a paulit-ulit yon babasaen so Biblia, antoy niarum ed nanduruman programa yo ed panagbasay Biblia?

◻ Akin ya importantin tuloy so pandalepdep ed babasaen yo?

[Kahon ed pahina 16, 17]

Saray suhestion pian napaaligwas so panagbasa yo ed Biblia

(1) Dakel a totoo so manbabasay Biblia diad alasir na inkaimprinta, manlapud Genesis ya anggad Apocalipsis. Nabasa yo met iratan diad alasir na orihinal ya inkisulat da. Tandaan a say Biblia et koleksyon na 66 apuyanan a libro, sakey a madibinon librarya. Parad panduruma, nayarin labay yon basaen so pigaran libron mangipaparungtal ed awaran, insan say pigaran mapropetikon lugan da, a tumbokan na pigaran sulat na simbawa, imbes a basta tumboken so alasir na pahina. Irekord so abasa yo la, tan seguroen a basaen so interon Biblia.

(2) Kayari pakabasa yo na kabiangan na Kasulatan, tepetan yo so inkasika no antoy ipaparungtal to nipaakar ed si Jehova, say gagala to, say paraan na panggagawa to’d bengabengatla; no panoy nepeg a pangapekta to ed mismon bilay yo; no panon yon nausar itan pian natulongay sananey.

(3) Diad pangusar bilang giya ed tsart a “Main Events of Jesus’ Earthly Life” ya impalapag ed silong na paulon “Jesus Christ” ed Insight on the Scriptures (ontan met diad “All Scripture Is Inspired of God and Beneficial”), basaen iray istoryan mangisasalaysay ed parehon ebento ed kada kabiangan na saray Ebanghelyo, a mantutumbokan. Aruman iya diad pangonsulta ed misimbangan iran seksion diad libron The Greatest Man Who Ever Lived.

(4) Sano manbasa kayo manlapud saray Gawa na Apostoles ed salaysay na bilay tan ministeryo nen Pablo, basaen met iray mitukoyan ya apuyanan a sulsulat. Kanian, sano agaway impanaglawi ed nanduruman syudad odino paspasen a nanpulongan nen Pablo, ontunda tan basaen iray sulat ya insulat to ed saginonor ed kaparan Kristianos ed saraman a pasen. Makatulong met a tumboken iray impanbaroy to ed sakey a mapa, a singa samay walad beneg na apis na New World Translation.

(5) Tekep na panbasa yo ed Exodo ya anggad Deuteronomio, basaen so sulat ed Hebreos pian natalosay dakel ed mapropetiko iran padron. Diad silong na “Law” diad Insight on the Scriptures, mangonsulta ed tsart a “Some Features of the Law Covenant.”

(6) Sano babasaen iray mapropetikon libro, iyeskedyul so panrepaso ed mitukoyan a maawaran ya abenegan diad Biblia. Alimbawa, sano babasaey libro na Isaias, repasoen no antoy nibaga nipaakar ed ararin Uzias, Jotam, Akaz, tan Ezekias, a nasasaglawi ed Isaias 1:1. (2 Arari, kapitulo 15-20; 2 Awaran, kapitulo 26-32) Odino sano babasaen so Aggeo tan Zacarias, mangiyeskedyul na panrepaso ed naromog diad libro na Esdras.

(7) Mamili na sakey a libro ed Biblia, basaey kabiangan to (anganko sakey a kapitulo), insan mansukimat, ya usarey Watch Tower Publications Index odino say ni-computer a Watchtower Library no wala ed lenguahe yo. Iyaplika so materyal ed dilin bilay yo. Usaren itan diad saray paliwawa tan diad lawak a ministeryo. Insan basaey sananey a seksion.

(8) No wala so palapagan na Watch Tower a mangitatarok na komentaryo ed libro na Biblia odino say kabiangan na satan, mabetbet a mangonsulta ed satan legay pamabasa yo ed satan a kabiangay Biblia. (Alimbawa: ed say Kanta nen Solomon, The Watchtower, Disyembre 1, 1957, pahina 720-34; ed Ezequiel, “The Nations Shall Know That I Am Jehovah”​—How?; ed Daniel, “Your Will Be Done on Earth” odino Our Incoming World Government​—God’s Kingdom; ed Aggeo tan Zacarias, Paradise Restored to Mankind​—By Theocracy!; ed Apocalipsis, Revelation​—Its Grand Climax At Hand!)

(9) Legan a babasaen yo, nengnengen iray pigaran cross-references. Imanoey 320 a balikas manlapud Hebreon Kasulatan a direktan inaon na Kristianon Griegon Kasulatan tan saray nilasus niran balikas ya atukoy, ontan met ed niiter ya aplikasyon. Idadanet na saray cross-reference so kasumpalan na propesiyan nirekord diad Biblia, unong ed saray detalye na panaon tan pasen, tan ed mipadparan kanonotan a nayarin mamalinew ed saray balikas a nayarin mairap yon talosan.

(10) Diad pangusar na Reference Edition of the New World Translation, no walad lenguahe yo, sukayan iray paimanod leksab tan saray artikulo ed appendix ed babasaen yo. Ipapanengneng na saraya so basiyan ed nausar a patalos tan arum niran paraan a pakapitalosan na saray importantin balikas. Nayarin labay yo met ya ikumparay patalos na pigaran bersikulo ed arum niran patalos na Biblia.

(11) Kayari pambasa yo ed kada kapitulo, mansulat na antiktikey a segek na manunan ideya ed satan a kapitulo. Usaren itan bilang basiyan parad saginonor a panrepaso tan pandalepdep.

(12) Legan yon babasaey Biblia, markaan iray apilin teksto a nagkalautlan labay yon tandaan, odino kopyaen iratan ed saray kard tan ipasen iraya ed magmainomay yon nanengneng ed inagew-agew. Ipatlep iratan; dalepdepen iratan; usaren iratan. Agyo sasalien ya ipatlep so dakerakel ed maminpinsan, anganko sakey lambengat odino duara ed kada simba; insan mamili mas dakel ed ontumbok a panaon a pamasa yo ed interon Biblia.

[Saray litrato ed pahina 15]

Kasin babasaen yo so Biblia odino dedengelen iray recordings na satan ya inagew-agew?