Saray Duruka Diad Israel
AGGAGALA nen Jehova a walay siopaman ed saray Israelita a manirap ed inkaduka. Naikday nasyon na sakey a tawir a dalin. (Numeros 34:2-12) Amin a pamilya na Israelita, nilikud ed saray Levita, ya akawat na kakaplo na bungay dalin parad serbisyo ra ed santuaryo, so minabang ed satan a tawir tan sirin walaan na panuporta ra ed inkasikara. (Numeros 18:20, 21) Agamoran iray pankayariay dalin. Saray ganggan ed panagpatawir so amaseguro a say dalin so mantultuloy a kayarianen na pamilya odino say tribun akankien. (Numeros 27:7-11; 36:6-9; Deuteronomio 21:15-17) Agnilako itan a tuloytuloy. (Levitico 25:23) Diad taon na Jubileo et amin a tawir a dalin a nilako so nipawil ed makanepegan iran akankayarian. (Levitico 25:13) Kanian anggan say toon nandarak ed kayarian to, say tawir so agmagnayon a nabalang ed kailalakan to.
Say matoor a katutulok ed ganggan na Dios so abalbaleg ya angamper komon ed inkaduka ed limog na Israelitas. (Deuteronomio 15:4, 5) Anggaman ontan, no matunganga, ag-ira bendisyonan nen Jehova, tan saya so mangipaarap ed mairap a kipapasen nisesengeg ed saratan a kalamidad a singa say panaglusob na kakabusol iran armada tan agaylan kelang. (Deuteronomio 28:22-25; ipareng so Uko-ukom 6:1-6; 1 Arari 17:1; 18:17, 18; Santiago 5:17, 18.) Saray sinansakey, lapud inkangiras (Uliran 6:10, 11; 10:4; 19:15; 20:13; 24:30-34), panagbuanges, inkasiba (Uliran 23:21), odino nailuam ed panliliket (Uliran 21:17), so makapangitarok na inkaduka ed sikara tan saray pamilya ra. Insan, ontan met ed agnailaloan iran sirkumstansya so nayarin onlesan mangilereg ed totoo ed inkaduka. Say patey so mangitilak na saray ulila tan balo. Saray aksidenti tan sakit so temporaryo odino permanentin mangamper ed too a manumpal ed kaukolan a kimey. Nisesengeg ed saraya a nibaga nen Jehova ed Israel: “Ta say duka agnaebas a balot naani ed dalin.”—Deuteronomio 15:11.
Anggaman ontan, baleg so agawaan na Ganggan a mamainomay parad duruka a talonaay kipapasen da. Legan na panagani et awalaan iray kanepegan a mantudtor diad kaumaan, ubasan tan, sirin, agkaukolan a mipayabol parad tinapay odino mantakew. (Levitico 19:9, 10; 23:22; Deuteronomio 24:19-21) Say mankakaukolan ya Israelita so makabayes na kuarta ya agkaukolanen a manbayar na interes, tan say awawey na inkamabunlok so nepeg ya ipanengneng ed sikato. (Exodo 22:25; Levitico 25:35-37; Deuteronomio 15:7-10) Pian napabaleg iray pinansyal a kayarian to, nayarian ton ilako so dalin odino say inkasikato ed inkaaripen, diad temporaryon paraan. (Levitico 25:25-28, 39-54) Ta pian agmamairap ed duruka, inabuloyan ira na Ganggan a mangiyapay na agtanton mablin iyaapay diad santuaryo.—Levitico 12:8; 14:21, 22; 27:8.
Ipapatnag na ganggan na Dios so asimbang ya inkahustisya parad saray mayaman tan duruka, ya aglalabien so sakey lapud posisyon to. (Exodo 23:3, 6; Levitico 19:15) Balet legay inkaplag lamet na nasyon na Israel ed ag-inkamatoor, nanirap a tuloy iray duruka.—Isaias 10:1, 2; Jeremias 2:34.