Say Sankabalgan a Toon Nambilay ed Kapiganman

Kapitulo 122

Manlapud si Pilato Anggad si Herodes tan Papawil Lamet

Anggaman agsinali nen Jesus ya iyamot manlapud si Pilato a sikatoy ari, impaliwawa ton say Panarian to et agpansesgaan ed Roma. “Say panarian ko so agkabiangan na sayan mundo,” kuan nen Jesus. “No say panarian ko so kabiangan na sayan mundo, akilaban komon iray igaganggan ko a siak so agkomon niyawat ed saray Judio. Balet, singa ontan, say panarian ko aliwan diad sayan lapuan.” Taloran danay sirin ya imparungtal nen Jesus a sikatoy walaan na Panarian, anggaman satan so aliwan diad dalin.

Ingen, sikatoy tuloy-tuloy a dinesdes nen Pilato: “Bueno, sirin, kasin sakey kan ari?” Salanti, kasin sika so sakey ya ari anggaman aliwan diad dalin?

Impaamta nen Jesus ed si Pilato a sustoy impangikuanto, ya iyeebat: “Sikan mismo so mangibabagan siak so sakey ya ari. Ta lapud saya et siak so niyanak, tan lapud saya et siak so linma ed sayan mundo, a tasian ko so katuaan. Kada sakey ya walad dapag na say katuaan so ondengel ed boses ko.”

On, say mismon gagala na kiwawala nen Jesus diad dalin et pian tasian so “say katuaan,” nagkalautla ed katuaan nipaakar ed Panarian to. Akaparaan si Jesus a manmatoor ed satan a katuaan anggan satan so sengegay ipatey to. Anggaman intepet nen Pilato: “Anto so katuaan?” sikato so agmanaalagar na nagkalalon paliwawa. Susto lay arengel to pian mangitarok na panangukom?

Pinmawil si Pilato ed karaklan a manaalagar ed paway na palasyo. Mapatnag a walad abay to si Jesus, imbaga to’d saray manunan saserdote tan saramay kaiba ra: “Anggapoy aromog kon kasalanan ed sayan too.”

Asanokan ed say desisyon, impilit na saray karaklan: “Guguloen to so totoo diad panbabangat ed interon Judea, ya inggapo manlapud Galilea anggad dia.”

Maseguron nikelawan si Pilato ed agmakatunongan ya inkapanatiko na saray Judio. Kanian, legan na pantultuloy ya ikekelyaw na saray manunan saserdote tan mamasiken, inmarap si Pilato ed si Jesus tan intepet: “Narerengel mo ta no kaunongan karakel iray bengatlan itetestigo ra sumpad sika?” Ingen, agsinali nen Jesus so onebat. Say inkakalmado to ed arap na maingal a panangakusa so sengegay impankelaw nen Pilato.

Diad impakaamtan si Jesus et sakey a taga Galilea, akaisip na paraan si Pilato pian sikatoy makaiwas ed eebatan. Say manuley na Galilea, si Herodes Antipas (anak nen Herodes a Baleg), so walad Jerusalem parad Paskua, kanian impaiyakar nen Pilato si Jesus ed sikato. Akadkauna ni, impaputot nen Herodes Antipas so ulo nen Juan a Managbautismo, tan insan atalagnaw si Herodes sanen arengelan to so nipaakar mamilagron kimkimey a gagawaen nen Jesus, natatakot ompan si Jesus so diad kapetegan et si Juan ya apaoli.

Natan, si Herodes so aliketan a tuloy diad iilaloan a nanengneng si Jesus. Saya so aliwan lapud sikatoy mapaga ed pankaabigan nen Jesus odino labay ton peteg a salien ya amtaen no saray panamakasalanan sumpad sikato so tua odino andi. Imbes, sikatoy basta maupapet tan maniilalon nanengneng si Jesus a manggaway pigaran milagro.

Anggaman ontan, impulisay nen Jesus a penekey inkamaupapet nen Herodes. Diad tua, legan a sikatoy tetepetan nen Herodes, sikatoy ag-inmesel. Diad inkabaingan, si Jesus so niludlurey nen Herodes tan saray sundalo to. Sikatoy kinawesan da na masnag ya abel tan nilurey da. Insan sikatoy impawil da ed si Pilato. Bilang resulta, si Herodes tan Pilato, a datin mankalaban, so nagmaliw a maapit a sankaaro.

Sanen nipawil si Jesus, tinawag nen Pilato iray manunan saserdote, saray Judion manuley, tan saray totoo a mantitipon tan inkuanto: “Inawit yo dia iyan too ed siak a singa mamapaseseg ed totoon manrebelde, tan, nia! sikatoy inusisak ed arapan yo balet ta ag-akaromog ed sayan too na basiyan parad saray panamakasalanan ya itatarok yo sumpad sikato. Diad tua, nisay si Herodes, ta sikatoy impawil tod sikami; tan nia! anggapoy antokaman a makanepegan na patey so nitetel ed sikato. Sikatoy ekalan ko sirin na kasalanan tan ibulos ko.”

Kanian amidua ya inyabawag nen Pilato a si Jesus so anggapoy kasalanan. Sikatoy magunaet a mangibulos ed si Jesus, ta amoria ton lapu lambengat ed imon a sikatoy impaerel na saray saserdote. Legan na pantutultuloy a panasali nen Pilato ya ibulos si Jesus, sikatoy akaawat na nagkalalon motibasyon a gawaen itan. Legan a sikatoy walad yurongan ton panangukoman, angipawit so asawa to na sakey a mensahe, a mamapaseseg ed sikato: “Agmo pibabalian itan a matunong a too, ta siak so nanirap a tuloy natan ya agew ed sakey a kugip [mapatnag a manlapud madibinon lapuan] lapud sikato.”

Ingen, panon a nibulos nen Pilato iyan anggapoy kasalanan a too, unong ya amta ton kaukolan to gawaen? Juan 18:36-38; Lucas 23:4-16; Mateo 27:12-14, 18, 19; 14:1, 2; Marcos 15:2-5.—NW.

▪ Panon ya inebatan nen Jesus so tepet nipaakar ed inkaari to?

▪ Anto so “say katuaan” ya angusaran nen Jesus na mangaraldalin a bilay to pian tasian?

▪ Anto so husga nen Pilato, panon so inkiwas na totoo, tan anto so ginawa nen Pilato ed si Jesus?

▪ Siopa si Herodes Antipas, akin a sikatoy aliketan a tuloy a nanengneng si Jesus, tan anto so ginawa to ed sikato?

▪ Akin a magunaet si Pilato ya ibulos si Jesus?