Say Sankabalgan a Toon Nambilay ed Kapiganman

Kapitulo 121

Diad Arap na Sanhedrin, Insan Diad si Pilato

Nasusumpal lay labi. Amitlon danay ya imburi nen Pedro si Jesus, tan saray membro na Sanhedrin so asumpal la’d ludlurey a panagusay da tan nansisian la. Anggaman ontan, kapelnak na liwawa ed Biernes, sikara so nantitipon lamet, natan et diad bulwagan na Sanhedrin da. Maseguron say gagala ra et pian ompatnag a legal so impangusay da ed labi. Sanen inawit si Jesus ed arapan da, inkuanda, a singa ginawa ra ed labi: “No sika so Kristo, ibagam ed sikami.”

“Anggan ibagak ed sikayo, agyo itan panisiaan,” ebat nen Jesus. “Niarum ni, no tepetan takayo, agkayo onebat.” Anggaman ontan, sipapakpel a tinukoy nen Jesus so inkasikato, ya ibabaga: “Manlapud natan et say Anak na too so manyurong diad makapanyarin nikawanan a dapag na Dios.”

“Sirin, kasin sika so Anak na Dios?” labay dan amin ya amtaen.

“Sikan mismo so mangibabagan siak,” ebat nen Jesus.

Parad sarayan lalakin say gagala ra et mamatey, sayan ebat so magenap la. Ikukunsidera ra itan a panangayew. “Anto ni kaaruman a pankaukolan tayo na tastasi?” tepet da. “Ta sikatayon mismo so akarengel ed satan manlapud dilin sangi to.” Kanian tinaker day Jesus, inawit, tan impalima ra ed gobernador na Romano a si Ponsio Pilato.

Si Judas, say manangitapat nen Jesus, so mangiimaton ed saray nagagawa. Sanen anengneng ton akondena si Jesus, alikna toy pagbabawi. Kanian sikatoy linma ed manuna iran saserdote tan mamasiken pian ipawil so 30 piraso na pilak, ya ibabaga: “Nankasalanan ak sanen intapat koy matunong a dala.”

“Anto itan ed sikami? Akauley ka’d satan!” anggapoy-pililikna ran inyebat. Kanian insabuyag nen Judas iray piraso na pilak ed templo tan tinmaynan tan sinali ton ibitay so inkasikato. Anggaman ontan, say sangan angisingeran nen Judas so mapatnag ya aputer, tan sikatoy naplag ed batobato ed leksab, ya abuyak.

Agnaseguro na manuna iran saserdote so gawaen ed saray piraso na pilak. “Aliwan unong ed ganggan ya ipelag iratan ed sagradon panangisimpenan na kayamanan,” imbaga ra, “lapud saratan so bili na dala.” Kanian, kayari impantutuplegan da, insaliw da so kuarta ed uma na domadamili pian pangikotkotan na saray sankaili. Diad ontan et say lawak so tinawag a “Uma na Dala.”

Masakbay nin siansiay kabuasan sanen inawit si Jesus ed palasyoy gobernador. Balet saray Judion nanulop ed sikato so ag-inmabuloy ya onloob lapud sisiaen dan say ontan ya inkamaapit ed saray Gentil so mamarumsis ed sikara. Kanian pian pagustoan ira, si Pilato so pinmaway. “Anton akusasyon so itatarok yo sumpad sayan too?” tepet to.

“No sayan too so agmanaggaway-mauges, agmi komon inyawat ed sika,” ebat da.

Diad panpilalek a napaliisay pakalanlanor, inyebat nen Pilato: “Sikatoy ala yo tan ukom yo unong ed ganggan yo.”

Apatnagan so manamatey a gagala ra, imbaga na saray Judio: “Aliwan unong ed ganggan parad sikami so pamatey ed siopaman.” On, no pinatey da si Jesus legan na Piesta na Paskua, maseguron satan so mamawala na mapublikon gulo, lapud dakel so atagey a mangipapasen ed si Jesus. Balet no sikatoy naipapatey da ed saray Romano diad mapulitikan panamakasalanan, saya so manggawan sikaray naekalan na responsabilidad diad arap na totoo.

Kanian saray relihyoson pangulo, agsasaglawien so asasakbay a panangusay a legan ed satan et kinondena ray Jesus parad panangayew, natan et angimbento na sananey iran panamakasalanan. Nanggawa ira na nankatlon akusasyon: “Sayan too so nalmoan min [1] manggugulo ed nasyon mi tan [2] mangisesebel ed panagbayar na saray buwis ed kinen Cesar tan [3] mangibabagan sikaton mismo et Kristo ya ari.”

Samay panamakasalanan ya ibabaga nen Jesus a sikatoy sakey ya ari so paninteresan nen Pilato. Sirin, sikatoy linmoob ed palasyo lamet, tinawag ya onasingger si Jesus ed sikato, tan intepet: “Kasin sikay ari na saray Judio?” Diad arum a salita, kasin binuyak moy ganggan diad pangiyaabawag ed inkasika bilang sakey ya ari a sumpad kinen Cesar?

Labay ya amtaen nen Jesus no kaunongan lay arengelan nen Pilato nipaakar ed sikato, kanian intepet to: “Kasin unong itan ed sikan dili ya ibabagam iya, odino arum so angibaga ed sika nipaakar ed siak?”

Nankunwarin anggapoy amta nen Pilato nipaakar ed sikato tan sakey a pilalek ya amtaen so katuaan na saray agawa. “Aliwa ak a Judio, agta ontan?” ebat to. “Say dilin nasyon mo tan saray manunan saserdote so angiyawat ed sika ed siak. Anto so ginawam?”

Diad antokaman a paraan et agsinali nen Jesus ya arawian so isyu, a saman et say inkaari. Say ebat ya iiter natan nen Jesus so andi-duaruwan amigla ed si Pilato. Lucas 22:66–23:3; Mateo 27:1-11; Marcos 15:1; Juan 18:28-35; Gawa 1:16-20.​—NW.

▪ Parad anton gagala a say Sanhedrin so nantitipon lamet ed kabuasan?

▪ Panon so impatey nen Judas, tan anto so ginawa ed 30 piraso na pilak?

▪ Imbes a sikaran mismoy mamatey ed sikato, akin a labay na Judios a saray Romano so mamatey ed si Jesus?

▪ Antoran panamakasalanan so ginawa na Judios sumpad si Jesus?