Say Sankabalgan a Toon Nambilay ed Kapiganman

Kapitulo 120

Panangiburi ed Lolooban

Kayari impanaynan ed si Jesus ed harden na Getsemani tan imbatik a kaibay arum ya apostoles lapud takot, si Pedro tan Juan so tinmunda ed ibabatik da. Anganko et nabotan da si Jesus sanen sikatoy aawiten ed abung nen Annas. Sanen sikatoy imbaki nen Annas ed Atagey a Saserdote a si Caifas, arawdawin tinmumbok si Pedro tan Juan, mapatnag ya uyo-uyo lapud takot parad dilin bilay da tan say kapagaan dan tuloy ed no antoy nagawa ed Katawan da.

Diad insabi ed maawang a residensya nen Caifas, akaloob si Juan ed lolooban, lapud sikatoy kabkabat na atagey a saserdote. Balet, si Pedro so atilak a manalalagey ed paway na pinto. Balet ag-abayag et amawil si Juan tan akitongtong ed bantay-pinto, sakey ya aripen a bii, tan inabuloyay Pedro a makaloob.

Natan et ambetel la, tan saray igaganggan ed abung tan saray opisyal na atagey a saserdote so amarlang na dangdangan. Si Pedro so akiulop ed sikara pian napetangan legan ya aalagarey pansumpalan na panangusay ed si Jesus. Diman, diad liwawa na apuy, say bantay-pinto ya amaloob ed si Pedro so akaimanon maong ed sikato. “Sika met, so kaulop nen Jesus a taga Galilea!” inkelyaw to.

Maingongot diad impakabidbir, imburi nen Pedro ed arapan dan amin ya agto kabat si Jesus. “Sikatoy agko kabat nisay natatalosan ko so ibabagam,” kuanto.

Diad saman, si Pedro so pinmaway asingger ed wangalan. Diman, sananey lamet a bii so akaimano ed sikato tan inkuanto met ed saramay manalalagey: “Sayan too so kaulop nen Jesus a Nazareno.” Aminsan lamet ya imburi nen Pedro, a mansasamba: “Agko kabat so too!”

Si Pedro so nansiansia ed lolooban, a mangugunaet ya agnaim-imano anggad posibli. Anganko ta diad sayan bekta et sikatoy abigla diad inkokaok na sakey a lalong ed kabilungetan na palbangon. Kaleganan to, peles a nagagaway panangusay ed si Jesus, mapatnag a nagagawa’d kabiangay abung diad tagey na lolooban. Anggapoy duaruwan nanenengneng nen Pedro tan saray arum so manaalagar ed leksab so isasabi tan itataynan na nanduruman tastasi a palolooben pian mantestigo.

Ngalngali sakey oras lay linmabas nanlapud unor ya impakabidbir ed si Pedro bilang kaulop nen Jesus. Pigara natan ed saramay manalalagey so inmasingger ed sikato tan kuanda: “Petepeteg a sakey ka met ed sikara, ta, diad tua, nabibidbiran ka lapud salitam.” Sakey ed grupo so kanayon nen Malco, a say layag to et atigpas nen Pedro. “Anengneng ta ka ed harden a kaiba to, agta ontan?” inkuanto.

“Agko kabat so too!” so impilit nen Pedro. Diad tua, sinali ton kumbensien ira a sikaran amin so nalilingo diad panusumpa tan panasamba ed pamaakaran, a diad katuaan, sumpaen da kono no sikatoy agmangibabaga na katuaan.

Legan na komatlon panangiburi nen Pedro, sakey a lalong so kinmokaok. Tan diad saman a bekta, si Jesus, a mapatnag a linmabas ed sakey a balkon diad tagey na lolooban, so linmingaw tan binmantag ed sikato. Tamtampol, anonotan nen Pedro no anto so imbaga nen Jesus pigara lambengat ya oras ed asasakbay ed kuarto’d tagey: “Sakbay na komaduan ikokaok na sakey a lalong, sika ni ingey mamitlo a mangiburi’d siak.” Naermenan a tuloy ed belat na kasalanan to, si Pedro so pinmaway tan nannangis na ampaipait.

Panon iya agawa? Panon, kayarin makakaseguro’d espiritual a biskeg to, a niburi nen Pedro so Katawan to ya amitlon danay a mantutumbokan? Anggapoy duaruwan narel si Pedro ya agto aliklikas ed saraman ya inkagawa. Say katuaan so pipikeweten, tan si Jesus so ompapatnag a sakey a marelmeng a kriminal. Say katuaan so gagawaen ya ompatnag ya aliwa, say inosente bilang makasalanan. Kanian lapud saray desdes ed saman, abalang nen Pedro so inkabalansi to. Biglan say suston liknaan ton inkamatoor so asuni; lapud ermen to et sikatoy atalonaay takot ed too. Agkomon nagawa itan ed sikatayo? Mateo 26:57, 58, 69-75; Marcos 14:30, 53, 54, 66-72; Lucas 22:54-62; Juan 18:15-18, 25-27.​—NW.

▪ Panon ya akaloob si Pedro tan Juan ed lolooban na atagey a saserdote?

▪ Legan a si Pedro tan Juan so walad lolooban, anto so nagagawa ed abung?

▪ Pigaran danay a kinmokaok so sakey a lalong, tan pigaran danay ya imburi nen Pedro a kabat toy Jesus?

▪ Antoy kabaliksan na panusumpa tan panasamba nen Pedro?

▪ Antoy sengegay impangiburi nen Pedro a kabat toy Jesus?