Report na Saray Manangiyabawag na Panarian

“Sikaray Nantultuloy ya Andi-tunda”

NANLAPULAD saray agew nen Jesu-Kristo tan saray apostol to, inusar na relihyoson papangulo so antokaman a posiblin paraan ed saray sagpot dan pakesayen so panangipulong ed maong a balita na Panariay Dios. Paulit-ulit tan ‘binilin a malet’ na lokal iran autoridad ed Jerusalem iray apostol ya “ag da salitaen so ngaran nen Jesus.” (Gawa 5:27, 28, 40) Anggaman kuan, ibabaga na salaysay na Biblia a “manbaleg so salita na Dios; et say bilang na saray binangatan dinmakerakel a toloy ed Jerusalem.”​—Gawa 6:7.

Duaran milenyo ed saginonor et siansia nin naromog tayoray relihyoson papangulo ed Israel a mangiimpluensya ed lokal iran autoridad a sebelan so kimey na saray tuan Kristiano ed satan a bansa.

Diad silong na pananesdes ya isesekar na saray alablabas a relihyoson elemento, nen Nobyembre 1987, ingganggan na lokal iran autoridad ed Tel Aviv, Israel, ya itunda na Tastasi so Kristianon panmimiting da diad Kingdom Hall a naromog diad sangan opisina na Watchtower Society. Say ganggan so inmipekto nen Oktubre 1989. Bilang katutulok, nanmiting iray Tasi ed inabangan iran pasilidad diman diad loob na taloran taon bangta nansiansian ag-inusar so Kingdom Hall da.

Diad kaleganan to, impaimano so pamaakaran ed Atagey a Korte na Hustisya ed Israel. Nirepaso na opisinay estado na abogado so argumento ya inyarap na Tastasi tan inyabawag ya anggapo so posiblin depensa sumpad apela ra nisengeg ed agmakatunongan a relihyoson panangidumaduma a nalalanor. Diad ontan et apaskar iray lokal ya autoridad a baliktaren so desisyon da, tan saray Tasi nen Jehova so malikeliket a pinmawil ed Kingdom Hall da.

Kasin say kimey a panangipulong ed saray katuaay Biblia so kinmesay legan na saratan a taon? Andin balot! Diad panaon na impangisara na Kingdom Hall, wala so duaran kongregasyon ed Tel Aviv tan sakey a biig a grupoy panagaral na Biblia ed kabangibang a baley na Lod. Taloran taon ed saginonor, sanen nilukasan-lamet so Kingdom Hall, saray Tasi nen Jehova so dinmakel anggad apatiran kongregasyon, tan sakey a balon grupoy panagaral na Biblia so manmimiting diad Beersheba.

Say ibubulaslas ed Israel so aglimitado ed saray grupoy manunan lenguahe, Arabiko tan Hebreo. Niwala so baleg ya indagsa na saray emigrante manlapud datin Union Sobyet, kanian okupadon mangipapanabang iray mansasalitay-Ruso a Tasi nen Jehova na maong a balita ed sikara. Pigaran Ruson-lenguahen miting so gagawaen ed taloran kongregasyon; masulok a sanlasus a totoo so nantitipon ed agano ni parad sakey a Ruson asamblea.

Anggapoy-duaruwa, saray manangidumaduman relihyonista ed Israel, so mangituloy ed kampanya ra sumpad tuan panagdayew. Balet mantultuloy iray manangiyabawag na Panarian diad pangaalig ed inmunan-siglo iran Kristiano ya, anggaman ed isusumpa, “ag . . . tinmonda a nanbabangat tan nanpupulong a si Jesus et Cristo.”​—Gawa 5:42.