Panamaliket ed Bilay na Pamilya Yo
Kapitulo 4
Sakey ya Asawan Lakin Makagamor na Aralem a Respeto
1, 2. Panon so pakagamor ed respeto, tan panoy inkiyilustran maong na saya ed kipapasen nen Jesu-Kristo?
Say respeto so agnagamoran diad pangiganggan lambengat ed sakey a manrespeto ed sikato. Nakaukolan mon gunggunaen so respeto ed no panon so pansalitam tan ikiwas mo tan ed no anto ka.
2 Saya so niyilustra ed kipapasen nen Kristo Jesus. Agamoran toy respeto bilang sakey a managbangat diad nengneng na panagbangat to. Kayari Sermon to ed Palandey “say epekto et saray ulop na totoo so nikelawan ed paraan na panagbangat to.” Antoy angungguna’d sikato na onian respeto? Say insaral to’d salitay Dios say Biblia imbes a saray opinyon na arum a totoo. Si Jehova a Dios tan say salita Ton katuaan so sigpot ya autoridad to. Agamoran nen Jesus so respeto manlapud kaaro tan kabusol, diad impansagpot to.—Mateo 7:28, 29; 15:1-9; Juan 7:32, 45, 46.
3. Anton obligasyon so impasen na Efeso 5:33 ed sakey ya asawan bii, tan antoy kakaukolan na saya ed sakey ya asawan laki?
3 “Say asawan bii so nepeg a walaan na aralem a respeto ed asawa to,” so niiter a bilin diad Efeso 5:33. Ingen say asawan laki so nepeg a maseet pian sayan respeto so nakapet to; tano andi, sankamairapan ed asawan bii so mitunosan ed sayan bilin. Panon na asawan laki a sumpalen so betang to a singa nidatak ed Biblia ta pian nagamoran to so ontan a respeto?
Diad Pangagamil toy Manepeg ya Inkaulo
4. Anton pasen so impabtang na Biblia ed sakey ya asawan laki?
4 Ipapabtang na Biblia ed asawan laki so sakey a posisyon na inkaulo diad areglo na panamaley, a kuanto: “Komon saray asawan bibii so pauleyan ed kaasawaan dan lalaki unong ed Katawan, lapud say asawan laki so ulo na asawa to unong a si Kristo met so ulo na kongregasyon, unong ta sikatoy manangilaban na sayan laman. Diad tua, unong a say kongregasyon et pauleyan ed kinen Kristo, sirin saray kaasawaan a bibii met so pauleyan ed kaasawaan dan lalaki ed amin a bengatla.” (Efeso 5:22-24, NW) Kasin sayan areglo so peteg a mangiter na liket ed sankaabungan? Arum a bibii so mansalita sumpad dedeskribien dan male chauvinism, salanti, say inkapaspasirayew odino sobran panmoria na arum a lalaki diad posisyon da a misiglaotan ed bibii. Balet ikuan tayo ed gapo a saray bangat na Biblia so agmangitutulak ed ontan a male chauvinism.
5. Antoy nepeg a bidbiren na sakey ya asawan laki nipaakar ed inkaulo, tan siopan uliran so nepeg ton tumboken?
5 Say Biblia so mangidadanet ed katuaan ya, aliwa labat lan say bii, noagta ontan met ed laki so walad silong na inkaulo. Ibukay ed libroy Biblia ed 1 Corinto, kapitulo 11, bersikulo 3, NW, naromog tayo ya insulat nen apostol Pablo irayan salita ed kongregasyon diad Corinto: “Labay kon naamtaan yo a say ulo na balang laki si Kristo; et say ulo na bii say laki; et say ulo nen Kristo say Dios.” Si Kristo so ulo na laki, tan manlapud Dios tan Kristo bilang uliran tan managbangat pian sika, say asawan laki, so makaaral ed no panon ya agamilen so inkaulo.
(Ituloy ed ontumbok a paway.)