Sakey a Leksion Manlapud Saray Manok tan Rosas

ANTO so mabetbet a panpapagaan na totoo natan nen say antokaman ni? Parad say karaklan, satan et say pakawalaan na magenap ya itarok parad pamilya ra odino say pakayarin mamaaligwas ed estandarte na kabibilay da.

Say pangapet ed bengabengatla so sakey met a manunan kapagaan sanen walad dalin si Jesu-Kristo. Balet impasakbay to a sayan lehitimon kapagaan so nayarin magmaliw ya alablabas a kapagaan a mangipupulisay ed espiritual a bengabengatla. Pian iyilustray punto to, imbaga nen Jesus ed saray babangatan to a maapit ya onnengneng ed saray manok tan rosas.

Kaukolan a mangan iray manok ya inagew-agew​—mas dakel nin tuloy no ipareng ed kakanen tayo lapud maples a pananunaw da ed naaakan da. Niarum ni, ag-ira makapantanem, makapan-ani, odino makapangisimpen na tagano parad arapen. Ingen, unong a naiimano nen Jesus, ‘tataganoen ira na mangatatawen ya Ama tayo.’ (Mateo 6:26) Mipadpara, kakawesan na Dios ed sankasantingan iran pandurumaan so mararakep a “lirios ed uma.”​—Mateo 6:28-30.

Papaseguroan itayo nen Jesus a no ipasen tayo so materyal iran pankaukolan ed dugan pasen tan iyuna so espiritual a bengabengatla, seguroen na Dios a nawalaan tayo met na nakakaukolan a tagano tan kawesen. No aasikasoen nen Jehova a Dios iray manok tan rosas, maseguron asikasoen to iraman so mangaaro ed sikato tan ‘mangaanap ni’n unona ed panarian tan say inkatunong to.’ (Mateo 6:33) Kasin iyuuna yo so intereses na Panariay Dios ed bilay yo?