Nantasi so Inkahon a Nakan

DIAD saray agew kayari na yegyeg ed Kobe, Hapon, nen imbeneg ya Enero, saray totoo ed apektadon lugar so nairapan a mananap na tagano. Anggaman ontan, ag-akulangan na tagano so Tastasi nen Jehova, salamat ed maaron tulong na kakaaro ra. Diad inmunan duara odino taloran agew kayari yegyeg, saray kabangibang a kongregasyon so angitarok na nilempek iran niluto. Ag-abayag, saray maaron kakaaro so angitarya na inkahon a nakan. Diad loob na inkahon iran nakan et dakel so angipeket na ankekelag a sulat a mangibabalikas ed panagmalasakit ed saray apektado. Inkuan na saray angawat na panangan a kada panangan et “naasinan” lapud agda napokpokay panlua ra diad impakabasa ed saray sulat.

Innabang na Tastasi nen Jehova so tagano ra ed arum a mankakaukolan. Sakey a Tasi so manguugto legan a manbibiahen akakotsen kaibay aliwan Tasin katrabahoan ed parehon kompanya. Kanian innabang to so sakey ed saray inkahon a nakan a naawat to.

“Iner so angaliwan mo na sayan inkahon a nakan?” so intepet na kaiba to. Insalaysay na agi so pananulong a kimey na Tastasi. “Pigaran agew lan agak akapangan na pising. Mangikera ak na isempet ko parad pamilyak,” so siaapresyan inkuan na laki.

Diad komatlon danay ya agawa iya, say kaiba to so angiderew na 3,000 yen (ngalngali $35, E.U.) ed say Tasi tan inkuanto: “Pamilyar ak ed saray aktibidad yo, kanian ipangasin abuloyan moak a mangidonasyon parad kimey yo. Pisalamatan koy impanginabang mo ed siak na ugtom. On, saray kaarom so maabig a totoo.”