Panangitaryay Tulong Diad Pegley na Saray Aderal

SAY sagpot na too ed pangitarya na tulong diad kasumsumpal na desyang so peteg a makapadinayew. Makakatulong so dakel a relief program ed panangipaalagey lamet na saray abung, pankakasakey na saray pamilya, tan, manuna’d amin, say panangisalba ed saray bilay.

Sano ondapo so desyang, uusaren na Tastasi nen Jehova​—tan otang na linawa ra​—so antokaman a probisyon a niiiter diad panamegley na sekular iran relief program. Ontan met, walaan ira na Makasulatan ya obligasyon pian ‘manggawa na maabig . . . nagkalalo ed saray kaamong [da] ed pananisia.’ (Galacia 6:10) On, liknaen na Tastasi a singa ira sankakanayon; a manpapasenan ira bilang “pamilya.” Kanian satan so rason no akin mantatawagan ira na “brother” tan “sister.”​—Ikompara so Marcos 3:31-35; Filemon 1, 2.

Kanian sano apektado na desyang so sakey ya asingger a lugar, saray mamatatken ed limog na Tastasi nen Jehova so impasyan mansasagpot pian seguroen so kawalaan tan saray kakaukolanen na balang membro na kongregasyon tan iyareglo so kapilitan a panangasisti. Konsideraen pa no panon a tua iya diad Accra, Ghana; San Angelo, E.U.A.; tan Kobe, Hapon.

Accra​—“Memelag ya Agew nen Noe”

Ginmapon inmuran ed ngalngali alas 11:00 ed labi, tan agtinmunda so balasubos na uran ed loob na pigaran oras. “Agaylan kasil na uran ya agla makaugip so entiron pamilyak,” inkuan nen John Twumasi, sakey ed saray Tastasi nen Jehova ed Accra. Tinawag itan na Daily Graphic a “memelag ya Agew nen Noe.” “Sinali min isegep iray importantin kagawaan mi,” intuloy nen John, “balet nen lukasan mi so puerta et biglan linmoob so danum.”

Amasakbay iray autoridad ya ontaynan la, balet dakel so masuyat, ya ontatakot iran say bakantin abung​—anggamano napnoy danum​—et ompan looban na saray matakew. Arum so agmakataynan anggaman labay da. “Agmi nilukas nen inak so puerta,” so kuan na sakey a biin manngaray Paulina. “Manatagey so danum, kanian tinmotoon kami’d saray a barilis tan pinmeket ed pagsen na atep. Kabekta, diad nayarin ala-singko ed kabuasan, saray kakaabay mi so angisalba’d sikami.”

Tampol a kinmiwas iray Tastasi nen Jehova legan a posibli. Onia so salaysay na sakey a Kristianon agin bii a manngaray Beatrice: “Saray mamatatken ed kongregasyon so nanaanap ed sikami, tan nalmo da kami’d abung na kaparan Tasi, a nansalimbengan mi. Taloran agew labat kayari na delap, tinmulong iray mamatatken tan saray mamalangwer a kabiangan na kongregasyon ed sikami tan kinarkar da so pitek ed loob tan paway na abung mi. Angisuplay so Watch Tower Society na saray sabon, panagdisimpekta, pinta, dokolan, ules, abel, tan kawes na ugugaw. Angipawit iray agagi na tagano mi ed loob na pigaran agew. Agaylan siak so atenyeg!”

Inreport nen John Twumasi, ya asaglawi lan inmuna: “Imbagak ed saray arum a manaabang a say Sosyedad mi so angipawit ed sikami na saray sabon tan panagdisimpekta​—magenap a panlinis ed entiron abung. Onliligada ed 40 a manaabang so tinmulong a nanlinis. Angiter ak met na sabon diad saray kakaabay, anggan samay pari ingen na lokal a simbaan. Lingon inisip na saray katrabahoan ko a saray Tastasi nen Jehova so mangipapanengneng na panangaro ed saray membro to labat.”

Inapresyan tuloy na saray Kristianon agagin lalaki tan bibii so maaron pananulong a niiter ed sikara. Onia so inkuan nen brother Twumasi: “Anggaman baleg a kantidad na kayarian ko so apirdi nen say nitulong a bengatla, sikamin sankapamilyaan so akalikna a lapud sayan makatenyeg a probisyon manlapud Sosyedad, akagamor kami na babaleg nen say apirdi ed sikami.”

San Angelo​—“Manongol a Singa la Mangangga so Mundo”

Say alimbosabos ya angaygay ed San Angelo nen Mayo 28, 1995, so amagot ed saray kakiewan, amuterputer ed saray poste na koryente, tan insiwaklat toray linya na koryente ed saray kalye. Binmanengbeng so dagem ed 160 kilometro kada oras, a dinederal toray panpublikon palpaalagey. Masulok a 20,000 a kaabungan so naandiay silew. Tan sinmabi so uran a yelo. Inreport na The National Weather Service a “singa ra kabaleg na bolay golf,” insan, “singa ra kabaleg na softball,” tan kabekta “singa ra kabaleg na lukban.” Say banesbes to so makatelek. Onia so inkuan na sakey a residinti: “Manongol a singa la mangangga so mundo.”

Tinmumbok ed bagyo so makapakebbiew ya inkakalmada. Kalkalnan pinmaway iray totoo’d agaygay iran abung da pian nengnengen iray aderal. Aparotan iray kakiewan a manalalagey ni. Singa alokanitan iray kaabungan ya akaalagey. Tinabonan na uran a yelo iray arum a pasen anggad sakey metron kaaralem. Minisimisi na bagyo iray nilibon bintana na kaabungan tan luluganan, kanian mansiayap iray apisitpisit a salming ya akalaok ed uran a yelo ya anakbong ed dalin. “Sanen akasempet ak,” kuan na sakey a bii, “inmirong ak labat ed kotsek a walad dalanan tan inyakis ko. Pirmi so aderal, pinaermen to ak a maong.”

Maples ya intarya na saray relief program tan saray ospital so pinansyal a tulong, materyales ed panagpaalagey, tambal, tan panangiwanwan. Maabig ta, dakel ya indibidual a biktima met na bagyo so tinmulong ed arum ed anggaay nayarian da.

Kinmiwas met iray kongregasyon na Tastasi nen Jehova. Inreport nen Aubrey Conner, sakey a matatken ed San Angelo: “Tamtampol kayari na bagyo, tinmatawag kami’d telepono pian amtaen so kipapasen na sakey tan sakey. Naniibaan kami tan saray aliwan-Tasin kakaabay pian paklapan iray bintana, mangiyan na plastic ed saray atep, tan pinaletan a maong iray ayaman. Insan angisalansan kami na rekord na balang too ed kongregasyon ya apektado so abung to. Onliligada’d sanlasus ya ayaman so kaukolan ya apigeren, tan agmagenap so materyales ya insuplay na saray ahensia na relief. Kanian analiw kami ekstran materyales tan inorganisa mi so kimey. Ami-amin, onliligada’d 1,000 a Tastasi so nanboluntaryon tinmulong, manga 250 kada sampot simba. Nanlalapu ira anggad kaarawi 740 kilometro. Nankimey iran amin ya andi-tunda, mabetbet diad ngalngali 40°C a kapetang. Nantrabaho met a kaiba mi so 70-anyos ya agin bii kada sampot simba nilikud ed aminsan, tan satan et sanen aapigeren lay abung to. Diad saman a sampot simba sikatoy walad atep na abung to ya ontutulong ed pangaapiger!

“Mabetbet kamin makakarengel na balikas na saray makakaimaton a singa say, ‘Agta alay abig no gawaen met iya na arum iran relihyon ed kamembroan da?’ Pandinayewan na kakaabay mi so pakanengneng ed grupo na 10 anggad 12 boluntaryo (pati agagin bibii) ya onsasabin masakbay ed kabuasan na Biyernes diad abung na sakey a kaparan Tasi, ya akaparaan a mangapiger odino anggan mangipaalagey lamet ed entiron atep a libre. Kaslakan, nasusumpal so kimey ed sakey a sampot simba. No maminsan et sakey a taga paway a managkontrata so mamapasyan mangaatep sanen sinmabi so grupon mankimey ya asingger ed sikara. Bagbagen tan ikabit mi lamet iray atep tan sakbay dan nasumpal so kimey a gagawaen da et alinisan mi lay arapan mi. No maminsan et ontunda iran mankikimey pian bantayan da kami labat!”

Sinampotan nen agin Conner: “Nailiwan mi irayan amin ya eksperiensian nanggayagaan mi. Akabatan mi balang sakey ed nanduruman panmoria diad panangipanengneng tan pakapanengnengan na inaagin aro nen say kapiganman. Liknaen min mustra labat iya no anto so nengneng ed balon mundo na Dios, kaiba so agagi a mantutulongan lapud talagan kaliktan da.”​—2 Pedro 3:13.

Kobe​—“Say AKitongilang a Kiew, Plaster tan Bangbangkay”

Ompatnag ya akaparaan la ra so manaayam ed Kobe. On, kada Setyembre 1 et seselebraan da so Disaster Prevention Day. Ipapasal na saray ugugaw ed eskuelaan so dugan gawaen no yegyeg, iyiinsayo na militar so misyon a panangisalba diad panamegley na helikopter, tan ipaparaan na saray departamento na pool iray makinan earthquake-simulation, no iner et ipapasal na saray boluntaryo so dunong da ed panangiliktar diad singa kuarton-kaawang a kahon a nayeyegyeg tan nawewegweg a singa tudtuan yegyeg. Balet sanen agawa so tudtua la nen Enero 17, 1995, pinmatnag ya andi kana so amin a panagparaan da. Akusbo iray samplon nilibon atep​—bengatlan agbalot agawa ed dalem na simulators. Abalintuag iray tren ed rilis da; linmelengat iray seksyon na kalsada; linmeletak iray ankakabaleg a tubo na gas tan danum; akusbo iray kaabungan a singa karton. Dineskribi na Time magazine so eksena bilang “say akitongilang a kiew, plaster tan bangbangkay.”

Insan agawa iray pool. Linmiyab iray bilding legan a saray dismayadon bombero so agmakaalis ed andukurukey a trapiko. Saramay akarateng ed pool so maslak ya akaimanon anggapo so naalan danum manlapud saray aderal a water system na syudad. “Makapatalagnaw so unaan ya agew,” kuan na sakey ya opisyal. “Agkon balot alikna so inkapuy ed entiron bilay ko, diad pakaamtan walay dakel a totoon nitabon ed saraman a napopoolan ya abung. Tan diad pakaamta ya anggapo so nagawaan ko.”

Ami-amin, walay 5,000 a totoon atigway, tan ngalngalin 50,000 a bilding so agaygay. Wala labat so akataryan kakatlo a tagano diad Kobe. Pian makalay danum arum so angaor na marutak a danum manlapud saray linmeletak a tubo na danum. Dakel ya andiay ayaman so linma ed saray siroman, ya arum so nirarasyonay tagano, a gineteran so kada too na sankaakop a niluto kada agew. Linmaknab a tampol so agpakapenek. “Anggapon balot so nagawaan na saray autoridad,” inreklamo na sakey a too. “Ompatey itayo ed eras no manilalo ti labat ed sikara.”

Inorganisan tampol na saray kongregasyon na Tastasi nen Jehova ed Kobe tan ed saray walad asingger a pasen so inkasikara. Anengneng a mismo na sakey a piloto na helikopter so kimey da a kuanto: “Siak so linmad pasey desyang ed saman ya agew na yegyeg tan sakey simba ak diman. Sanen sinmabi ak ed sakey a siroman, anggapo so uksoy na saray bengatla. Anggapo so nagagawan itutulong. Saray Tastasi nen Jehova lambengat so apuradon linmad pasen, ya inasikaso iray bengatla.”

On, dakerakel ni so trabaho. Samploran Kingdom Hall so agla nayarin usaren, tan masulok a 430 a Tastasi so andiay panayaman. Wala ni kaaruman a 1,206 ya ayaman a panaayaman da so kaukolan a naapiger. Aliwan satan labat noagta pati saray pamilya na 15 a Tastasin inatey ed desyang so mankaukolan a tuloy na ligliwa.

Nanboluntaryo so ngalngali 1,000 a Tastasi a nanlapud entiron bansa pian ontulong ed panag-apiger. “Sanen nankimey kami ed kaabungan na estudyante Biblia ya agni abautismoan,” inkuan na sakey ya agin laki, “naynay da kamin tinepetan, ‘Pigaran amin so bayaran mi’d saya?’ Sanen imbaga mi ed sikara a say kimey so sinuportaan na saray kongregasyon, akisalamat ira’d sikami, a kuandan, ‘Say nanaaralan mi so peteg la natan!’”

Dakel so nandinayew ed maples tan sigpot ya inkiwas na Tastasi ed desyang. “Siak so nandinayew a tuloy,” kuan na piloton asalambit la’d inmuna. “Mantatawagan kayo na ‘brother’ tan ‘sister.’ Anengneng ko no panon so pantutulongan yo; sikayo ran totoo so talagan sakey a pamilya.”

Akaaral iray Tastasi na mabli iran leksion manlapud yegyeg. Onia so inaksobi na sakey ya agin bii: “Naynay kon liliknaen a no baleg so organisasyon, mairap met so mangipanengneng na personal a panagpaga.” Balet inuman na matamoy ya impangasikaso ed sikato so panmoria to. “Kabat ko la natan a si Jehova so mangaasikaso ed sikatayo aliwa labat a bilang sakey ya organisasyon noagta bilang indibidual met.” Anggaman ontan, asingger la so permanintin tulong manlapud saray desyang.

Magano la so Permanintin Tulong!

Onnenengneng iray Tastasi nen Jehova ed panaon sano aglan balot pakseten na saray desyang so bilay na too tan say panbilay to. Diad balon mundo na Dios, nibangat so toon mikoopera ed kaliberliber na dalin. Legan ya iwawaklit na totoo so sinisiblet ya agagamil, aliwa ran magmainomay a naapektoan na desyang.

Sakey ni, si Jehova a Dios​—say Manamalsay natural iran puersa​—so maneguron say atooan a pamilya tan say mangaraldalin a palsa to so aglan balot pagyawen na saray puersa na palsa. Diad ontan say dalin so peteg a magmaliw a paraiso. (Isaias 65:17, 21, 23; Lucas 23:43) Maglorian nasumpal so propesiya ed Apocalipsis 21:4: “Tan punasen to so amin a lua ed kamataan da, tan andi gapo la naani ipatey, tan anggapo la naani onnangis o dageyem, o ot-ot. Ta saray una a bengatla sikara so linmabas la.”

[Litrato ed pahina 5]

Idedemostra nen Beatrice Jones (kawigi) no panon a sikato tan saray arum so naneegnaan pian makabaliw ed delap

[Litrato ed pahina 6]

Pananulong kayari na alimbosabos