Sano Ondapo Iray Natural a Desyang
Accra, Ghana, Hulyo 4, 1995: Say pirmin beyebeye ed ngalngalin 60 taon so nansengegan na pirmin indelap. Wala so 200,000 a naandiay kaykayarian, 500,000 so agmakaloob ed ayaman da, tan 22 so akabalang na bilay da.
San Angelo, Texas, E.U.A., Mayo 28, 1995: Saray alimbosabos tan uran a yelo so aneral ed sayan syudad a panaayaman na 90,000, a sengegan na impakapirdi akalkulan $120 milyon (E.U.).
Kobe, Hapon, Enero 17, 1995: Intilak na sakey a yegyeg a binmayag labat na 20 segundo so nilibon inatey, samplon nilibon asakitan, tan nilasus nilibon andiay ayaman.
SIKATAYO so manbibilay ed naikuan a panaon na saray desyang. Ipaparungtal na sakey a report na Nasyones Unidas a diad 30-taon a peryodo manlapud 1963-92, say bilang na totoon inatey, asakitan, odino intayak na saray desyang so dinmaak ed promedyon 6 porsiento kada taon. Say makapadismayan situasyon so anagdag ed NU a mangidesigna ed dekada na 1990 a bilang say “International Decade for Natural Disaster Reduction.”
Siempre, say natural iran puersa—singa say bagyo, say iteterak na bulkan, odino say yegyeg—so aliwan naynay a mangitatarok na desyang. Nilasus so nagagawa’d kada taon ya anggapoy pamasakit da’d totoo. Balet sano nalalanor lay baleg a pakaperdian ed bilay tan kaykayarian, saya so matukoy lan tawagen a sakey a desyang.
Say idaraak na natural iran desyang so ompatnag ya agnapaliisan. Oniay kuan na libron Natural Disasters—Acts of God or Acts of Man?: “Saray totoo so manguuman ed kaliberliber da diad paraan a mainomay a nadesyang, tan onkikiwas ira ed lalon agda pakatalona ed saraman a desyang.” Iprepresenta na libro so sakey ya isisipen ya alimbawa: “Sakey a makalnan yegyeg ed sakey ya iskwater a saray kaabungan et agawa ed laryo diad tambib na nikelas a pangdel so talagan pansengegay desyang no asunto ed ipatey tan panirap na too. Balet kasin say desyang et resulta na inkiwegweg na dalin odino lapud bengatlan saray totoo so manaayam ed saratan a mapeligron kaabungan ed mapeligro nin pasen?”
Parad saray estudyante na Biblia, wala so sananey nin rason no akin ya agmakapakelaw so idaraak na saray natural a desyang. Ngalngalin 2,000 lan taoy apalabas, impasakbay nen Jesu-Kristo a “say anggaan na mundo” so nabidbiran na, nilikud ni ed arum, “eraeras tan yegyeg ed nambabangil a pasen.” (Mateo 24:3, 6-8) Impasakbay met na Biblia a legan na “saray kaunoran ya agew,” saray totoo so maaro ed inkasikaran dili, maaro na kuwarta, andiay panamabli ed nianakan, tan andiay aro ed kamaongan.a (2 Timoteo 3:1-5) Sarayan ugali so mabetbet a mamakiwas ed too a sumlang ed kurang na kaliberliber to, a sengegay mainomay a pakaapektaan na totoo ed natural iran puersa. Saray ginaway-toon desyang so pinalesa met na andiay aron sosyedad a kaukolan a panbilayan na karaklan.
Bangta ondarakel so populasyon ed planeta tayo, bangta say atooan a walna so lalon mangiiyan ed pakarisgoan na totoo, tan bangta say kayamanan ed dalin so agsuston nipapakurang, saray desyang so mantultuloy a mamakbak ed too. Say pangitarya na tulong so mangipapaarap na saray angat, a singa ipanengneng na ontumbok ya artikulo.
[Paimano ed leksab]
a Parad kaaruman ya impormasyon nipaakar ed tanda na say kaunoran iran agew, nengnengen so libron Pikakabat a Mangitonton ed Andi-Anggaan a Bilay, pahina 98–107, impalapag na Watchtower Bible and Tract Society of New York, Inc.
[Picture Credit Line ed pahina 3]
Tagey: Information Services Department, Ghana; kawanan: San Angelo Standard-Times
[Picture Credit Line ed pahina 2]
COVER: Maxie Roberts/Courtesy of THE STATE