Pangaligan Iran Presentasyon

Pian Makapangigapoy Panangiyaral na Biblia ed Unonan Sabado na Disyembre

“Segurado ak ya onabobon kan kaukolan tayon amin so nawalaay kakaaro. Antoy labalabay mon ugali na sakey ya kaaro? [Abuloyan ya onebat.] Nengneng moy ibabaga na sayan magasin no akin ya kaukolan tayon maalwar a pilien iray pikaaroan tayo.” Iderew ed householder so sakey a kopya na Disyembre 1 ya isyu na The Watchtower, insan basaen tan pantongtongan so unonan tepet ed pahina 16. Ibasa so anggan sakey a teksto. Iyopresi iray magasin, tan iyuksoy so ipawil mo pian ebatan so onsublay ya tepet.

The Watchtower Disyembre 1

“Asalim ta lan inisip no akin ya amayamay so agawan kalamidad ed sarayay imbebeneg? [Abuloyan ya onebat.] Diad tua, impasakbay na Biblia so sakey a panaon ya nabidbiran lapud saray kalamidad. [Basaen so Mateo 24:7, 8.] Naebatan ed sayan magasin irayan tepet: Akin et amayamay so nagagawan kalamidad natan? Kasin dusa na Dios iratan? Akin et makapanisia tayo a maganon lan panampoten na Dios iray kalamidad?”

Awake! Disyembre

Basaen so 2 Timoteo 3:16. Insan ibaga: “Walaray manisia a say Biblia et impuyan na Dios, saray arum balet et andi. Sika ey? [Abuloyan ya onebat.] Anggaman nandurumay opinyon na totoo ed satan ya tepet, dakel so mipakna ya anggapo lay arum a libron nanggunaetan ya paandien. Isasalaysay na sayan magasin so pigara ed saray sagpot pian deralen so Biblia tan isebel so pambasad satan diad apalabas iran siglo. Nabasa met dia no akin ya nansiansia itan anggad natan.”