“Kimey Itan nen Jehova”

Satan so paulo na sakey ya artikulo ed El Norte, peryodiko ed Monterrey City, Mexico. Say artikulo so nipaakar ed sakey a balon Assembly Hall na Tastasi nen Jehova.

Say Monterrey so sakey a syudad a walaan na populasyon a 2,300,000 (pati saray distrito) ed mamaamianen a parti na Mexico, tan walaan itan na 19,200 a manangipalapag na Panarian. Diad loob na ngalngali sakey tan kapalduan taon, impankasakey na Tastasi iray sagpot da a mamaalagey na sakey a marakep tan praktikal ya Assembly Hall a walaan na 3,000 a komportablin yurongan tan air conditioning. Nanliket iray lokal a Tastasi sanen sakey a membro na Mananguley ya Ulop na Tastasi nen Jehova so angiarap na paliwawa ed dedikasyon. Say programa so angilaktip na sakey ya antikey ya awaran ed kimey diad Monterrey, tan ininterbio iramay akibiang ed konstruksion. Insan say 4,500 ya inmatendi ed miting so nanggayaga ed paliwawa ed dedikasyon.

Saya so komatlo ed agano niran Assembly Hall ya impaalagey ed Mexico a deniskribe bilang sakey a kampanya parad “Mas Dakel, Mas Baleg, tan Mas Maong Iran Kingdom Hall tan Assembly Hall.”

Lapud masulok nen 443,000 a manangipalapag ed Mexico, tan 1,492,500 ya inmatendi diad Memoryal nen 1995, saray balon Assembly Hall, a singa samay sakey ed Monterrey, so petepeteg a manserbi parad madibinon gagala.