Kasin Sikay Balansin Payunir?

MANKISLAP iray mata na ama legan ya akaunat iray taklay ton manatalaran ed anak ton biin alanganin ed unaan iran kundang to. Sano sikatoy biglan natumba, pasesegen ton salien to lamet. Kabat ton agmanbayag et sikato lay makabalansi tan makatalindeg.

Diad mipadparan dalan, say balo nin ministron payunir so nayarin mankaukolan na panaon tan panamaseseg sakbay a narapat to so kaukolan a balansi pian ontalona bilang sakey a sigpot-panaon a manangiproklama na Panarian. Dakel a payunir so mantultuloy a sigagayagan manlilingkor ed loob na dakel a dekada. Wala met iray pigaran akabalang na inkabalansi lapud ag-inilaloan iran pananguman ed sirkumstansya ra. Arum ni ingen so akabalang na gayaga ra. Diad sakey a bansa, 20 porsiento ed saraman so ginmapon manpayunir so tinmunda ed loob na duaran taon na sigpot-panaon a serbisyo ra. Anto kasi rason ed iyekal na sakey a payunir ed sayan sankagayagaan a serbisyo? Wala tay nagawaan pian napaliisan irayan pakasbelan?

Anggaman say makapuy a laman, kagipitan ed pinansyal, tan responsabilidad ed pamilya so nayarin pansengegan ed itunda na arum ed sigpot-panaon a ministeryo, say makakasamben ed arum et say isaew ed panmantini na maong ya inkabalansi ed nanduruman obligasyon na Kristiano. Say pagmaliw a balansi et mangipapanengneng na “sakey a kipapasen a ditan et anggapoy sakey a kabiangan, elemento, sengegan, odino impluensya ya ambetbelat nen say arum odino agkasimbangan na arum.”

Impanengneng nen Jesu-Kristo ed saray babangatan to no panon a say panagpulong tan panaggaway babangatan so nasumpal. Diad dilin ministeryo to, inyilustra to met no panon a napansiansia so inkabalansi. Impanengneng nen Jesus a saray Judion papangulo na relihyon so agbalansi, oniay kuanto ed sikara: “Iiter yo so kakaplo na yerbabuena tan say anis tan say komino, balet imbaliwala yo so ambetbelat iran pamaakaran na say Ganggan, salanti, inkahustisya tan panangasi tan katooran. Sarayan bengatla so nepeg a gawaen, ingen aliwan say pangibaliwala ed arum a bengatla.”​—Mateo 23:23.

Matukotukoy met iyan prinsipyo natan, nagkalalo la ed ministeryo na panagpayunir. Pinakiwas na entusiasmo tan maong ya intensyon, arum so nanpayunir ya andian na sigpot a panagparaan odino panangonsidera ed amin a nalalanor. (Lucas 14:27, 28) Say arum met so nalalamlaman ed lawak a ministeryo a nibabaliwala daray arum ya importantin aspeto na Inkakristiano. Panon dan nagamoran tan napansiansia so inkabalansi?

Mantultuloy a Mabiskeg ed Espiritual!

Agbalot pinaulyan nen Jesus so espiritualidad to. Anggaman kinaukolan so ngalngali amin ed panaon parad totoon labay day ondengel ed sikato tan manpatambal, angiyeskedyul na panaon parad madalepdep a pikakasi. (Marcos 1:35; Lucas 6:12) Say balansin panagpayunir natan met et kakaukolanen toy suston pangusar ed amin a probisyon ta pian mantultuloy a mabiskeg ed espiritual. Inkatunongan nen Pablo: “Anggaman ontan, kasin sika, say sakey a manbabangat ed sananey, so agmanbabangat ed inkasika?” (Roma 2:21) Maseguron sakey a lingo so pangusar na sakey ed interon panaon to ed panpulong ed arum bangta naaandian na panaon parad magenap a personal a panagaral tan regular a panagpikasi.

Si Kumiko so payunir ed loob la na duaran dekada. Anggaman sikato so walaan na taloran anak tan agmananisian asawa, nalmoan to manlapud eksperiensia a say sankaabigan a panaon parad sikaton basaen tan aralen so Biblia et sakbay a tuloy na kakaugip to ed labi. Legan a sikato so manaaral, partikular ton isusulat iray punto a nausar to ed lawak a ministeryo ta pian napantultuloy ton tariwa tan makapainteres so inagew-agew a ministeryo to. Say arum met a maaligwas a payunir so ombabangon a mas masakbay ed arum a kapamilyaan pian panggayagaan so espiritual a pakapabiskeg-lamet ed mareen iran oras na kabuasan. Nayarin walaan ka met na matukoy iran nigeter a panaon pian manparaan parad saray miting tan makapibansag ed sankabaloan iran Kristianon publikasyon. No pilalek mon namantini so gayaga ed ministeryo, say personal a panagaral so bengatlan agnayarin apuraen odino paulyanan.

Balansien Iray Responsabilidad ed Pamilya

Kaukolan met a nonoten na manpapayunir ya atateng a sakey ed baleg a kabiangan na “say linawa nen Jehova” parad sikara so manasaglawi ed panangasikaso parad pisikal, emosyonal, tan espiritual a pankaukolan na dili ran pamilya. (Efeso 5:17; 6:1-4; 1 Timoteo 5:8) No maminsan et anggan say mananisian kapareha tan saray membro na pamilya so onaburido ompan agda la naawat so ligliwa tan suporta manlapud say asawa tan ina sano onggapo lan manpayunir. Saratan a liknaan so manresulta ed samet ya entusiastikon kiwas ed say pilalek ton magmaliw a payunir. Anggaman ontan, tekep na maong a panagplano tan maalwar a panangonsidera ed arapen, namantini inkabalansi.

Panbabanikelan na dakel a payunir a gawaey amin a panagpulong a kimey sano saray membro na pamilya so andi ed abung. Si Kumiko ya asaglawi la ed inmuna, so kaiba na pamilya to ed panag-almusal da, ya alageren to nin onalis so masiken tan ananak to ed kabuasan, tan wala la’d ayaman sakbay na isempet da. Uusaren to so Lunes a panluto na pigaran putahe a masasakbay ta pian sikato so makapanrelaks tan makapidungo ed pamilya to imbes a magmaliw ya okupado ed kusina. Makatulong met so panggawa to na masulok nen sakey a kimey ed sakey a panaon, singa say panggawa na arum a kimey ed abung legan a manpaparaan na kakanen. Diad ontan et nawawalaan na panaon ni si Kumiko ya imbitaan iray kakaaro na ananak to tan iparaanan ira na sakey a surprisa.

Legan ya ombabaleg iray anak ed taon na inkatinedyer, mabetbet a mankaukolan ira na lalon atensyon manlapud atateng da ed panalona ed balo iran emosyon, pilalek, panduaruwaan, tan pakatatakotan a mangilelereg ed sikara. Mankakaukolan iya na inka-alisto tan pananguman ed iskedyul na sakey ya ateng a payunir. Konsideraen si Hisako, sakey ya ina a payunir a walaan na taloran anak. Anto so ginawa to sanen say panguloan ya anak ton bii so angipatnag na kakulangay gayaga tan entusiasmo ed saray Kristianon miting tan lawak a serbisyo lapud say impluensya na minumundon kakaaro ed eskuelaan? Say peteg a pankaukolan na parad anak ton bii a gawaen ton kien to so katuaan tan sigpot a nakombinsen say inkabiig manlapud mundo so sankaabigan a kurso.​—Santiago 4:4.

Kuan nen Hisako: “Denesidek so pangiyaral lamet ed sikato na saray manunan doktrina ed libron Manbilay na Ando lan Ando ya inagew-agew. Diad gapo et pigara labat a minuto panaaral mi, ta mabetbet ya irereklamo na anak ko so pirmin sakit na eges tan ulo sano oras lay panaral. Balet ginawak a regular so panagaral. Kayari pigaran bulan, abalbaleg so inaligwasan na disposisyon to, ya angitonton ed dedikasyon tan bautismo to ed loob na antikey a panaon lambengat.” Panggagayagaan la natan nen Hisako so sigpot-panaon a ministeryo a kaibay anak to.

Saray kaamaan a manpapayunir so nakaukolan met a maalwar ya agnilebleb diad pangasikaso ed saray interesado diad lawak tan ed saray kanepegan ed kongregasyon a sikaray onsaew a mangiter na mabiskeg ya emosyonal a suporta tan panangidirehi a kaukolan na saray ombabaleg ya anak da. Saya so bengatlan ag-ipasa na asawan laki ed say asawa to. Say okupadon Kristianon matatken ya abayag lan payunir tan ontan met et mangimamaneho na melag a negosyo so mangipanaon na panangiyaral ed balang sakey ed apatiran ilalak to. (Efeso 6:4) Niarum ni, iparaan to so parad sinimba iran miting ed say pamilya to. Saray balansin payunir so agmamaulyan ed saray pamilya ra ed materyal tan espiritual.

Ekonomikon Inkabalansi

Say dugan panmoria ed inagew-agew a pankaukolan so sananey nin lugar a ditan so nepeg a panbanikelan na saray payunir pian namantini so maong ya inkabalansi. Dia lamet, dakel so naaralan tayo manlapud maabig ya alimbawa tan simbawa nen Jesus. Pinasakbayan to itayo sumpad pagmaliw a sobran maaburido ed saray materyal a kapagaan. Imbes, pinaseseg to iray babangatan to ya iyuna so Panarian, isisipan ton say Dios so mangasikaso ed sikara a singa gagawaen to ed amin a palsa. (Mateo 6:25-34) Diad panumbok ed sayan maong a simbawa, dakel a payunir so akapansiansia ed sigpot-panaon a serbisyo ed saray taon, tan benendisyonan nen Jehova iray sagpot da pian makaawat na ‘tinapay ed balang agew.’​—Mateo 6:11.

Sinimbawa nen apostol Pablo so kaparan Kristianos a ‘nakabatan da komon so katunongan da ed amin a totoo.’ (Filipos 4:5) Maseguro, kakaukolanen na inkamakatunongan a sustoy pangasikaso tayo ed bunigas tayo. Gagawaen na balansi iran payunir so amin a gunaet a nipanengneng so inkamakatunongan ed kabibilay da tan ed awawey da ed saray materyal a bengatla, a kabat dan sikaray oobserbaan na arum so kondukta ra.​—Ikompara so 1 Corinto 4:9.

Saray tobonbalo a manlilingkor bilang payunir so nepeg ya onarawi ed agmakanepegan a panganamot ed inkamabunlok na atateng da. No sikaray miaayam ed atateng da, nipatnag da so maong ya inkabalansi tan panangapresya no sikaray mitulongan ed kimey ed abung tan nawalaan na part-time a trabaho pian makatulong ira ed gastos ed panangipakurang na ayaman.​—2 Tesalonica 3:10.

Peteg a Bendisyon Iray Balansin Payunir

Nayarin sakey kan payunir a mankikimey ya impasya pian napansiansia so manepeg ya inkabalansi. Manmatalek ka. No panon a say melag ya ugaw so mankakaukolan na panaon pian makapanbalansi tan makapanakar, dakel a matatken a payunir so mangibabagan kaukolan da so panaon pian nagegemtan so inkabalansi pian naasikason amin iray obligasyon da.

Say panggawa na personal a panagaral, panangasikaso ed saray membro na pamilya, tan panustini ed dilin materyal a pankaukolan so pigara ed saray lugar a ditan et saray payunir so manbanikel na inkabalansi. Ipapanengneng na report a dakel a payunir so makakasumpal ed responsabilidad da diad matalonggaring a dalan. Sikaray talagan bendisyon ed komunidad tan kredito ed si Jehova tan say organisasyon to.