Tepetepet Manlapud Managbasa

Natalosan kon say salitan Griego a “toʹte” (insan) so inusar pian ipaamta a wala so ontumbok a nagawa. Kanian akin a nabasa so Mateo 24:9 [NW] ya onia: “[Insan, NW] [toʹte] yawat da kayo ed pakapasegsegang,” bangbalet say kapetekan ton salaysay ed Lucas 21:12 oniay ibabaga to: “Balet [sakbay, NW] na sarayan amin a bengatla, erelen da kayo naani, tan pairapen da kayo”?

Suston say toʹte so nausar pian ipaamtan walay ontumbok a nagawa, bengatlan kasuldongan, a singa panangibaga. Balet agtayo iisipen ya onia labat so kausaran to ed Biblia.

Say A Greek-English Lexicon of the New Testament and Other Early Christian Literature, nen Bauer, Arndt, tan Gingrich, so mangipapanengneng a say salitan toʹte so inusar ed duaran manunan pantalos ed Kasulatan.

Sakey ed satan et “diad satan a panaon.” Nayarin saya so “ed saman ya apalabas.” Sakey ya alimbawa so niiter et say Mateo 2:17: “[Insan, NW] la asumpal so sinalita nen propeta Jeremias.” Ag-itan ontutukoy ed bengatla ed sakey a serye noagta ipapanengneng to so sakey a partikular a punto ed apalabas, salanti, ed satan a panaon. Mipadpara, say toʹte so nausar “ed arapen ya insan.” Sakey ed saya et say naromog ed 1 Corinto 13:12: “Ta natan onnengneng itayo ed sakey a salming ed mabilunget, balet insan lupalupaan. Et [insan, NW] kabaten ko a nagnap a singa met inpakapikabat ed siak a nagnap.” Inusar dia nen Pablo so toʹte ed pantalos ‘ed arapen a punto.’

Unong ed sayan diksyunaryo, say arum ya inkausar na toʹte et “pian ipakabat so katumbokan na panaon.” Iiter na sayan diksyunaryo so dakel ya alimbawa a naromog ed taloran salaysay ed ebat nen Jesus ed tepet na saray apostol nipaakar ed tanda na kiwawala to.a Bilang alimbawa ed kausar na toʹte “pian ipaamta so ontumbok a nagawa ed panaon,” insita na diksyunaryo so Mateo 24:10, 14, 16, 30; Marcos 13:14, 21; tan Lucas 21:20, 27. Say pangonsidera ed konteksto so mangipapanengneng no akin a say bengatlan onggendan ed panaon so suston pakatalos. Tan saya so makatulong diad pakatalos ed propesiya nen Jesus a mankarga na kagawa ed arapen iran ebento.

Balet, agtayo nibagan kada kipatnag na toʹte ed sarayan salaysay et nepeg a pihon mangipakabat ed no antoy tumbokan na panaon. Singa bilang, diad Mateo 24:7, 8, nabasa tayo ya ontalindeg naani so nasyon sumpa ed nasyon tan wala naani eraeras tan saray yegyeg. Intuloy na Mat 24 bersikulo 9: “[Insan, NW] yawat da kayo ed pakapasegsegang, tan pateyen da kayo naani, tan gulaen da kayo naani na saray amin a nasyon nisengeg ed ngaran ko.” Kasin makatunongan so pantalos a say nipasakbay iran bakal, kakulangan na saray tagano, tan saray yegyeg so nepeg a nagawa tan anganko ontunda sakbay ya onggapo so panamasegsegang.

Satan so aliwan lohikal, pekderan na satan diad panamegley ed no anto so kabat tayo ed kasumpalan ed inmunan-siglo. Ipapatnag na salaysay na libro na Gawa a satan so tamtampol kayarin saray membro na balon Kristianon kongregasyon so ginmapon nanpulong, naeksperiensia ra so graben isusumpa. (Gawa 4:5-21; 5:17-40) Agtayo maseguron nibaga ya amin a bakal, eras, tan saray yegyeg a sinalita nen Jesus so agawa sakbay na satan ya asasakbay ya isusumpa. Diad pidumaan, satan ya isusumpa so sinmabi “sakbay” a dakel ed arum iran bangatlan nipasakbay, a satan so mitunosan ed paraan na impangisalaysay nen Lucas ed saray pamaakaran: “Balet sakbay [NW] na saraya’n amin a bengatla, erelen da kayo naani, tan pairapen da kayo.” (Lucas 21:12) Isusuheri na satan a say Mateo 24:9, say toʹte so inusar ed lalon susto diad panamegley na balikas a “diad satan a panaon.” Legan na peryodo na saray bakal, eras, tan saray yegyeg, odino diad satan a panaon, saray patumbok nen Jesus so napasegsegang.

[Paimano ed leksab]