Ipasal Ira Manlapud Inkaugaw

IPAPATNAG na modernon panagsukimat a “saray fetus et walaan na pisiolohikal a reaksion ed saray boses.” Oniay kuan na Winnipeg Free Press: “Aromog [na saray managsukimat na University of North Carolina] a kayari pangibasa na kainaan ed saray lukon da, walay reaksion na saray kapkapangianak sano nibasa lamet ed sikara iray parapo.” Sano manbabasan maksil iray malukon, ontutulong iya ed pangipaslep ed ugaw na saray maong ya ugali ed moral. Inkuan na Biblia a si Timoteo et ‘kabat to so masanton sulsulat manlapud inkaugaw.’ (2 Timoteo 3:14, 15) Mapatnag, inapresya na ina to tan bai to so kablian na impangipasal ed sikato manlapud inkaugaw, maseguron satan so angisakop ed impanbasan maksil.

Say panagbasa so “sankabiskegan a dunong a niwala ed sosyedad tayo natan,” so inkuan na autor a si Jim Trelease. Saray dunong ed lenguahe tan bokabularyo so napaaligwas diad maksil a panagbasa.

Makabat so pangibasan maksil bektaman a mitongtong ka la ed kapkapangianak mo. Anggaman agni natalosan na say lukon mo odino kapkapangianak mo so ibabagam, say potensyal a manbayag iran gungguna so makana. Oniay ibabaga na Uliran 22:6: “Ibangat mo so anak mo ed dalan a nepeg ton laen, tan anggan sano masiken la ag-onarawi ed sikato.”

Anto kasi nabasam a namparan praktikal tan makagungguna? Ibasan maksil so Biblia ed anak mo ed kada agew. Ontan met ibasa iray makagunggunan publikasyon, a singa say Listening to the Great Teacher, My Book of Bible Stories, The Greatest Man Who Ever Lived, tan saray artikulo ed magasin a Panag-Bantayan tan Awake!

Tua, lalanoren toy panaon so pangiter mo’d inkasika, balet maong so inkausaran na satan. Satan so paraan a pakapatnagan ya iyaansakit tan aaroen moy anak mo.