Nawalaan Ka na ‘say Puso na say Leon’

NO maminsan et uusaren na Biblia so leon bilang simbolo na tepel tan kompiyansa. Nadedeskriben walaan na ‘say puso na say leon’ iray mataraki odino makpel a lalaki, tan saray matunong so nikuan a “makpel a singa leon.” (2 Samuel 17:10; Uliran 28:1) Nagkalalo la sano sungguan, ya ipapanengneng na leon so reputasyon to bilang “sankamakapanyarian ed saray ayep.”​—Uliran 30:30.

Say inkaandi takot na leon so angiyalilingan nen Jehova a Dios ed determinasyon ton salimbengan so totoo to. Isasalaysay na Isaias 31:4, 5: “Singa say leon tan say kilaw na leon manngayemngem ira ed tapew na naerel da, no say sakey a karakel na saray pastol natawag ira na sumpa ed sikato, agnaani natakot ed boses da, tan agnaani ontalaw ed dalagorog da; ontan naani yaakseb nen Jehova na saray ejercito a mamakal ed Palandey Sion. . . . Sikato naani yagel to tan ilaban to, onlabas naani ed tagey to tan yagel to.” Papaseguroan sirin nen Jehova iray ariripen to na aliston panangasikaso to, nagkalautla sano nipapaarap ed kairapan.

Ikokompara na Biblia so sankabalgan a kabusol na katooan, si Satanas a Diablo, ed sakey ya onmuang, manangasiban leon. Pian napaliisan so pakabiktima to, nibaga ed sikatayo diad Kasulatan: “Mandangka kayo, manbantay kayo.” (1 Pedro 5:8) Say sakey a paraan a nagawaan iya et say ipaliis ed makapatey a pantemeg ed espiritual. Nipaakar ed saya inkuan nen Jesus: “Balet manlikas kayo ed inkasikayo ompan saray puso yo napano ed inkasiba, tan panagbuek, tan saray kapagaan ed sayan bilay.” (Lucas 21:34-36) On, say pagmaliw ya aliing ed espiritual ed sarayan “kaunoran ya agew” so makapangiter ed sikatayo na ‘say puso na say leon,’ sakey a ‘masekder, ya isaral ed si Jehova.’​—2 Timoteo 3:1; Salmo 112:7, 8.