‘Kabiangan Itayon Amin na Saksakey a Pamilya’
DIAD agano niran taon saray relihyoson panangidumaduma tan rasismo so kinmayat ed sankadalinan. Saray etnikon balingaan so amarngat na panagpatey, panamairap, tan arum nin mabanday a panamairap. Unong ed sakey a report na Amnesty International, say pananumlang ed kanepegan na too so amaskar ed masulok a 23 milyon a totoo ed sankamundoan a manaynan ed ayaman da nen 1994.
Diad Rwanda labat, onliligada ed 500,000 a totoo so pinatey tan masulok a 2,000,000 nin arum so nagmaliw a takas kayarin binmetag so karawalan ed baetan na saray Tutsi tan saray Hutu. “Nagkalalo lan pinasegsegang so Tastasi nen Jehova,” so inreport na peryodiko na Belgian a Le Soir, “lapud panangipulisay day pan-armas.” Agmibibiang iray Tastasi nen Jehova ed armadon gutgutan. Ingen, nilasus ed sikara so inatey lapud karawalan. Saya so mangipapanonot ed sikatayo ed saray salita nen Jesus ed saray babangatan to: “Lapud aliwa kayo a taga mundo, . . . say mundo busolen to kayo.”—Juan 15:19.
Sakey a pamilyan Tasi—Eugène Ntabana, say akulaw to, tan duaran ilalak to—so manaayam ed kabesira, Kigali. Sano ipapaliwawa so Kristianon neutralidad ed kakaabay to, mabetbet nen Eugène a tukoyen so boginbilya, sakey ya onkakalab a wakal ya onsalumpapak ed ampetang a klima.—Mateo 22:21.
“Diad Kigali,” salaysay nen Eugène, “say boginbilya so manrorosas na ambalanga, derosa, tan no maminsan et amputi. Ingen, saratan so saksakey a klase. Ontan met ed totoo. Anggaman nandurumay rasa, kolor na baog, odino etnikon abenegan, sikatayon amin so kabiangan na saksakey a pamilya, say pamilya na katooan.”
Makapaermen, anggaman ed mareen ya ugali ra tan neutral a talindeg da, say pamilyan Ntabana so pinatey na sakey a napgaan-ed-dala a pangkat. Anggaman ontan, sikaray inatey a matoor. Maseguro itayon sumpalen nen Jehova a Dios so sipan to ed saratan, tan sikaray paolien pian manawir ed mundon anggapo lay panangidumaduma ed rasa. (Gawa 24:15) Sirin, say pamilyan Ntabana, pati arum ni, so “manliket ira a dili ed inkadaakan na kareenan.”—Salmo 37:11.