Akin a Mangiter ed si Jehova?
LEGAN a mansasnit so agew ed melag a baley na Sidon diad Sarepta, sakey a balo a bii so yinmuko pian manipon na bislak. Kaukolan toy mamarlang ta pian makapanlutoy samet a tagano—anganko ta say unor a taganon naakan to tan say anak ton ugaw a laki. Sikatoy nambunek pian nabilay toy inkasikato tan say anak to ed andukey a kelang tan eras, a nansumpal ed onian makapasinagem a kipapasen. Nanaerasan ira.
Sakey a laki so inmasingger. Say ngaran to et Elias, tan ag-abayag et atebek na balo a bii a sikatoy propeta nen Jehova. Ompatnag a nadngelan to so nipaakar ed sayan Dios. Duma si Jehova ed si Baal, say maruksa tan mauges a panagdayew ed sikato so kasmak diman ed Sidon a kawalaan na balo. Kanian sanen kinmerew si Elias na nainum, sikatoy magunaet ya ontulong. Anganko ta isisip ton diad panggawa na ontan et nagamoran toy pabor nen Jehova. (Mateo 10:41, 42) Balet nagkalalo ni kinerew nen Elias—kapirason tagano. Impaliwawa ton say walan tagano et magenap lambengat parad unor a panangan. Ingen, mapilit si Elias, ya impaseguro ed sikato a mamilagron taryaan nen Jehova na tagano anggad pakasumpal na kelang. Anto so ginawa to? Ibabaga na Biblia: “Et linma tan ginawa to so unong na kuan nen Elias.” (1 Arari 17:10-15) Sarayan malinew a salita so maneskribe na kiwas na baleg a pananisia—ontanlan baleg, diad tua et indayew nen Jesu-Kristo iman a balo sanlibon taon ed saginonor!—Lucas 4:25, 26.
Anggaman ontan, nayarin ompatnag a makapakelaw ya onkerew si Jehova na alabas manlapud sakey a bii ya ontanlan duka. Saya so nagkalautlan tua sano konsideraen tayo so sakey a pikakasi ya inyapay na sakey a prominentin laki. Say impanosos nen Arin David parad ilalak ton Solomon ya usaren itan ed panagpaalagey na templo so nankaukolay baleg ya inkamabunlok. Diad modernon kantidad, saray regalon inter so mankantidad na binilyon a dolyar! Anggaman kuan, inkuan nen David ed pikakasi ed si Jehova: “Siopa ak, tan anto so baley ko, pian masarag kami a mangyapay dia ed ontan a mabulbulos unong na saya a nanengneng? Ta saray amin a bengatla nanlapu ra ed sika, tan ed kayarian mo a dili angiter kami ed sika.” (1 Awaran 29:14) A singa inkuan nen David, amin so kien nen Jehova. Kanian kapiganman a mangiter tayo diad kiyalibansa na puron panagdayew, diad tua et iyaapay tayo lambengat so dati lan kien nen Jehova. (Salmo 50:10) Kanian, say tepet so onlelesa, Akin ta a labay nen Jehova a sikatayoy mangiter ni?
Makanan Kabiangan Itan na Tuan Panagdayew
Say sankasimplian ya ebat et lapud manlapud inmunan panaon et ginawa la nen Jehova a say panangiter so makanan kabiangan na puron panagdayew. Say matoor a toon si Abel so angibagat na pigara ed pinablin ayayep to ed si Jehova. Saray patriarkan Noe, Abraham, Isaac, Jacob, tan Job so mipadparan angiyapay.—Genesis 4:4; 8:20; 12:7; 26:25; 31:54; Job 1:5.
Inganggan tan impasumpal ni ingen na Mosaikon Ganggan so panangiter na kontribusyon ed si Jehova. Alimbawa, amin ya Israelita so inganggan a mangiter na kakaplo, odino mangiter na kakaplo na bungay dalin tan ed idarakel na ayayep da. (Numeros 18:25-28) Arum a kontribusyon so agtanton impasumpal. Singa bilang, kada Israelita so kinaukolan a mangiter ed si Jehova na saray unonan bunga na ayayep tan pawala na sakey a too. (Exodo 22:29, 30; 23:19) Ingen, impalugar la na say Ganggan ed kada indibidual so panitermina no kaunongan karakel ed saray pawala to so iter, basta say iter to et say sankaabigan. Intarya met na Ganggan so pisasalamat tan pisisipan iran apay, a saratan so sigpot a boluntaryo. (Levitico 7:15, 16) Pinaseseg nen Jehova so totoo to a mangiter unong ed impamendisyon to ed sikara. (Deuteronomio 16:17) A singa ed impangipaalagey ed tabernakulo tan saginonor et say templo, inter na balang sakey no anto so impakiwas na puso ton iter. (Exodo 35:21; 1 Awaran 29:9) Maseguron say ontan iran boluntaryon kontribusyon so makapaliket a tuloy ed si Jehova!
Diad silong na “say ganggan ed si Kristo,” amin a panangiter so kaukolan a boluntaryo. (Galacia 6:2; 2 Corinto 9:7) Agkabaliksan na satan a saray patumbok nen Kristo so tinmundan mangiter odino mangiter ira na mas daiset. Kasunian na satan! Legan a nampulong si Jesus tan saray apostol to ed Israel, sakey a grupo na bibii so tinmutumbok ed sikara tan nanlilingkor ed sikara manlapud dilin kaykayarian da. (Lucas 8:1-3) Si apostol Pablo met so akaawat na saray regalo ya anuporta ed impanmisionero to, tan sikato met so amaseseg ed arum a kongregasyon a mangiter na saray pundo ed arum no bilang ta wala so pankaukolan. (2 Corinto 8:14; Filipos 1:3-5) Say mananguley ya ulop ed Jerusalem so angi-asain na responsablin lalaki pian seguroen a saray ninagnag a bengatla so niutob ed saray mankakaukolan. (Gawa 6:2-4) Malinlinew, impasen na asasakbay a Kristianos a pribilihyo so panuporta ed puron panagdayew diad ontan iran paraan.
Siansia, nayarin panumamengan tayo no akin a gagawaen nen Jehova a say panangiter so kabiangan na panagdayew ed sikato. Konsideraen pa iray apatiran rason.
No Akin a Mangiter Tayo
Manuna, gagawaen nen Jehova a say panangiter so kabiangan na tuan panagdayew lapud say panggawa na ontan so maabig parad sikatayo. Idadanet na satan so apresasyon tayo ed kamaongan na Dios. Alimbawa, no say sakey ya ugaw et isaliwan odino igawaan toy regalo so sakey ya ateng, akin ya alay liket na ateng? Kasin akapet na regalo so sakey a nakakaukolan a tuloy ya agnayarian komon ya akapet? Maseguron andi. Imbes, say ateng so naliliketan a nanengneng a say ugaw et nababayuboan to so maapresya tan maiter ya awawey. Diad satan met a rason a papasesegen itayo nen Jehova a mangiter tan naliliketan sano gawaen tayo so ontan. Onia no panon a nipapanengneng tayo ed sikato a talagan aapresyaen tayo so amin ya ag-ageteran a kaabigan tan inkamabunlok to ed sikatayo. Sikato so manangiter na “amin a maong a palankap tan amin ya ayadyarin palankap,” kanian ag-itayo naupotan na rason pian sikatoy pisalamatan. (Santiago 1:17) Manuna ed amin, inter nen Jehova so dilin inad-aro ton Anak, ya inabuloyan ton ompatey pian sikatayo so makapambilay a maando. (Juan 3:16) Kasin magenagenap tayon napipisalamatan?
Komadua, no iyugali tayo so panangiter, diad ontan et nanaaralan tayo ya aligen si Jehova tan say Anak to, si Jesu-Kristo, ed sankaimportantian a dalan. Si Jehova so agmanguuman a mangiiter, tuloytuloy a mabunlok. A singa ibabaga na Biblia, papagamoran to itayo na “bilay, say linawa, tan amiami bengatla.” (Gawa 17:25) Manepeg labat a sikatoy pisalamatan tayo ed kada linawa a susungapen tayo, kada ketleb na tagano a panggagayagaan tayo, kada maliket tan makapnek a bekta ed bilay. (Gawa 14:17) Si Jesus, singa say Ama to, so angipanengneng na maiter ya awawey. Andi-siblet ton inter so inkasikato. Amtam ta a sanen nanggawa si Jesus na saray milagro, ginawa to itan diad kaandian ton dili? Masulok nen sakey ya ibabaga ed sikatayo na Kasulatan a sanen pinaabig toray mansasakit, say pakayari so ‘pinmaway ed sikato.’ (Lucas 6:19; 8:45, 46) Si Jesus so mabunlok a tuloy ya inyibung toy dilin kamarerwa to, say bilay to, ya anggad mismon ipapatey.—Isaias 53:12.
Kanian sano mangiter tayo, balanglan panaon tayo, biskeg tayo, odino saray kayarian tayo, aaligen tayo si Jehova tan paliketen so puso to. (Uliran 27:11; Efeso 5:1) Tutumboken tayo met so ayadyarin modelo parad kondukta na too ya intilak ed sikatayo nen Jesu-Kristo.—1 Pedro 2:21.
Komatlo, say panangiter so mamepenek ed peteg tan importanti iran pankaukolan. Tua, magmainomay a napenek nen Jehova iray pankaukolan na intereses na Panarian ya anggapo so tulong tayo, no panon a napansalita toray bato ya onkelyaw imbes ya usaren itayon mangipulong na salita. (Lucas 19:40) Balet ta pinili ton pagalangan itayo tekep na sarayan pribilihyo. Kanian sano mangiiter tayo na saray kayarian tayo diad kiyalibansa na intereses na Panarian, walaan tayo na baleg a kapnekan ed pakaamtan gagawaen tayoy peteg a betang tayo ed say sankaimportantian a kimey a nagagawa ed sayan mundo.—Mateo 24:14.
Mapatnag a kaukolan so kuarta pian nasapotan so sankamundoan a kimey na Tastasi nen Jehova. Legan na 1995 serbisyon taon, say Sosyedad so nangastos na ngalngali $60 milyon diad pangasikaso lambengat ed saray special pioneer, misioneros, tan saray managbiahen manangasikaso ed saray asainmin da ed lawak a serbisyo. Anggaman ontan, satan so melag a tuloy a gastos no ikompara ed say konstruksion tan panangipakurang ed saray sangan opisina tan saray pasilidad ed panag-imprinta ed interon mundo. Ingen, amin itan so agawan posibli diad panamegley na saray boluntaryon kontribusyon!
Agkalapagan ya ipapasen na totoo nen Jehova a sano sikaray andiay pakayari, ipasakbat da la itan ed arum. Say ontan ya awawey so makapangitonton ed sikatayo ed agtayo pakapibiang ed onian aspeto na panagdayew tayo. Unong ed kinen apostol Pablo, saray Kristiano ed Macedonia so nidudunget ed “aralem ya inkaduruka.” Siansia ni, pinirawat da so pribilihyon panangiter. Tan say inter da, unong ed impatua nen Pablo, so “onlabas ni ed saray pakayari ra”!—2 Corinto 8:1-4.
Komapat, ginawa nen Jehova so panangiter a kabiangan na tuan panagdayew lapud say panangiter so mamaliket ed sikatayo. Inkuan nen Jesus: “Lalo a mapalar so mangiter nen say mangawat.” (Gawa 20:35) Ontan so impandesinyo ed sikatayo nen Jehova. Sakey ni itan a rason no akin a liknaen tayo ya anggan kaunongan lay iter tayo ed sikato, agtayon balot naparaan so apresasyon a nalilikna tayo parad sikato ed kapusoan tayo. Anggaman makapaliket ta ag-iilaloan nen Jehova so nagkalalo nen say nayarian tayon iter. Makapanmatalek itayo a sikatoy naliliketan sano sigagayaga tayon mangiter na nayarian tayo!—2 Corinto 8:12; 9:7.
Saray Bendisyon so Manlapud Panangipanengneng na Maiter ya Awawey
Pawilen pay asasakbay ya alimbawa tayo, ipasen ya ibaraan na say balo a bii na Sarepta ya arum so makapangasikaso ed nakan nen Elias. Agaylan bendisyon so asaew to komon!
Anggapoy suppiat a bebendisyonan nen Jehova iramay mangipapanengneng na maiter ya awawey. (Uliran 11:25) Say balon bii na Sarepta so agkaukolan a manirap diad impangiter ed inisip ton unor a tagano to. Sikatoy tinumangan nen Jehova na sakey a milagro. A singa insipan nen Elias, say pananginan toy arina tan larak so agnaupotan anggad kayari na kelang. Balet ta sikatoy akaawat na babaleg a tumang. Sanen say anak ton laki so nansakit tan inatey, si Elias, say too na tuan Dios, so amaoli ed sikato. Agaylan maseguron amabiskeg itan ed sikato ed espiritual!—1 Arari 17:16-24.
Natan agtayo iilaloan a nabendisyonan tekep na saray milagro. (1 Corinto 13:8) Balet ta papaseguroan itayo nen Jehova a sustinien to iramay interon-kamarerwan manlilingkor ed sikato. (Mateo 6:33) Kanian makapagmaliw itayon singa samay balo na Sarepta ed satan a pamaakaran, a mangiiter a sibubunlok, matalek ya asikasoen itayo nen Jehova. Ontan met, panggayagaan tayoy baleg ya espiritual iran tumang. No say panangiter tayo so kabiangan na sakey a regular a rotina, imbes a sakey a tubat-tubat, no nanonotan labat ya okasyon, ontulong itan ed sikatayo pian pansiansiaen a simpli so mata tayo tan iyapasakey ed intereses na Panarian, a singa inrekomenda nen Jesus. (Lucas 11:34; ikompara so 1 Corinto 16:1, 2.) Ontulong met itan ed sikatayo a naliknan mas maapit ed si Jehova tan si Jesus bilang kakimeyan da. (1 Corinto 3:9) Tan satan so mangiyarum ed mabunlok, maiter ya awawey a mangipapabidbir la ed managdayew nen Jehova ed sankamundoan.
[Kahon ed pahina 31]
SARAY PARAAN A PINILI NA ARUM PIAN MANGITER
KONTRIBUSYON PARAD SANKAMUNDOAN A KIMEY
Dakel so mangigagana odino mangigegetar na sakey a kantidad ya iiyan da ed saray “contribution box” ya amarkaan na: “Contributions for the Society Worldwide Work—Mateo 24:14.” Kada bulan et ipapawil na saray kongregasyon irayan kantidad balangla diad sankamundoan a hedkuarter ed Brooklyn, New York, odino diad lokal a sangan opisina.
Saray boluntaryon donasyon a kuarta so nayarin direktan nipawit ed Watch Tower Bible and Tract Society of the Philippines, Inc., P.O. Box 2044, 1099 Manila, odino diad opisina na Sosyedad a manlilingkor ed bansa. Saray alahas odino arum niran ankablin bengatla so nayari met ya iter bilang donasyon. Sakey ya antikey a sulat a mangibabagan satan so sakey a direktan langkap so nepeg a nitekep ed sarayan kontribusyon.
UKSOYAN NA KONDISYONAL A DONASYON
Nayarin mangiter na kuarta ed Watch Tower Society pian saya so mamenben anggad ipatey na say angidona, tekep na probisyon a no bilang ta walay personal a pankaukolan, saya so ipawil ed angidona. Parad nagkalalon impormasyon, ipangasin mitalosan ed say Treasurer’s Office diad address a naimano ed tagey.
NIPLANON PANANGITER
Bilang kaaruman ed direktan langkap a kuarta tan kondisyonal a donasyon na kuarta, wala niray arum a metodo na panangiter pian nagunggunaan so Panarian a serbisyo ed sankamundoan. Nilalaktip ed saraya:
Seguro: Say Watch Tower Society so nayarin ingaran bilang benepisyari na sakey a policy na seguro-ed-bilay (life-insurance) odino sakey a plano ed panretiro/pensyon. Nepeg ya ipakabat ed Sosyedad so antokaman ya ontan iran uksoyan.
Deposito ed Bangko: Saray deposito ed bangko, sertipiko na deposito, odino indibidual a deposito ed panretiro so nayarin imatalek parad odino ibayar ed oras na ipapatey ed Watch Tower Society, unong ed saray kakaukolanen na lokal a bangko. Say Sosyedad so nepeg a pakabatan ed antokaman ya ontan iran uksoyan.
Saray Stock tan Bond: Saray stock tan bond so nayarin iter bilang donasyon ed Watch Tower Society bilang direktan langkap odino diad silong na sakey ya uksoyan a diad panamegley na say almo to et mantultuloy ya ibabayar ed angidona.
Lote tan Abung: Say panlakoan ed lote tan abung so nayarin iter bilang donasyon ed Watch Tower Society diad panamegley na direktan langkap odino pangireserba na sakey a kabiangan na satan bilang panayaman na angidona, a makapantultuloy a manayam legay bilay to. Nepeg a minengnengan nin unona ed Sosyedad sakbay ya iyalis ed ngaran na Sosyedad so antokaman a kaykayarian.
Testamento tan Inmatalek: Saray kayamanan odino kuarta so nayarin ipatawir ed Watch Tower Society diad panamegley na sakey a testamento ya inuksoy unong ed legal a paraan, odino say Sosyedad so nayarin gawaen a benepisyari na sakey a paknaan na panangimatalek. Say sakey a nimatalek a pakagunggunaan na sakey a relihyoson organisasyon so nayarin mangitarok na pigaran bentaha ed panag-buis. Say sakey a kopya na testamento odino paknaan ed pangimatalek so nepeg ya ipawit ed Sosyedad.
Parad nagkalalon impormasyon ed antokaman a pamaakaran ed tagey, mansulat ed Watch Tower P.O. Box 2044, 1099 Manila, odino diad opisina na Sosyedad a manlilingkor ed bansam.