“Sakey a Marakep a Regalon Manlalapud si Jehova”

SAY Mayo 1, 1996, a paway na Say Panag-Bantayan so nankarga na pinaaralem a diskusyon nipaakar ed Kristianon neutralidad tan no panon so panbalansi ed saray responsabilidad tayo ed si Jehova tan ed “Cesar.” (Mateo 22:21) Dakel so arengelan a balikas na panangapresya ed balon impormasyon a nitarya. Sakey ed saratan et say onggendan a sulat, ya insulat na sakey a Tasin taga-Gresya tan nipaarap ed Mananguley ya Ulop na Tastasi nen Jehova:

“Labay kon ibalikas so sankaaraleman ya otang a linawak ed sikayon amin a pinablin agagi lapud maabig a pangaasikaso yo ed sikami ed espiritual a paraan. Diad impakapriso na siameran taon lapud Kristianon pananisiak, talagan aapresyaen ko so marakep iran kanonotan ed say Mayo 1, 1996, a paway na Say Panag-Bantayan. (Isaias 2:4) Saya so sakey a marakep a regalon manlalapud si Jehova.​—Santiago 1:17.

“Legan kon panggagayagaan irayan artikulo, anonotan koy sakey a komento ed sakey ya asasakbay a Panag-Bantayan (Agosto 1, 1994, pahina 14): ‘Malinlinew, say inkamakatunongan so mabmablin kualidad, sakey a mamapakiwas ed sikatayon mangaron nagkalalo ed si Jehova.’ On, agagi, pisalamatan koy Jehova a kabiangan ak na mapangasi tan maaron organisasyon to, a malinlinew a mangisisindag ed kakabatan to.​—Santiago 3:17.

“Say apadaak a liwawa ed say Mayo 1 a Panag-Bantayan so maabig ya inawat dia ed Gresya, nagkalalo la ed saramay nipriso ed pigaran taon odino sikara nin siansia so wala ed prisoan lapud pananisia ra. Salamat lamet ed sikayo. Pabiskegen kayo komon nen Jehova tekep na espiritu to pian tuloytuloy kamin nataryaan na mablin espiritual a tagano diad sarayan panaon na kaguloan.”